Isaya 23:1-18
-
Muzimbu wa kusompa Tile (1-18)
23 Ou ukewo muzimbu wa kusompa Tile:
Mbolozokeni, eni mato a ku Tashishi!
Mwafwa cikuma banacibiisa, wahi asa kukobelamo.
Banabajombolwela ou muzimbu mu lifuti lya Kitimu.
2 Olokeni, yeni mwatunga kumukulo wa kalunga-ndonga.
Baka-kulandulula ba ku Sidoni baje bakajabuka kalunga-ndonga banamifukisa.
3 Binona* bya ku Shiho* na bimbuto bibatejele mu Nailo,Byendele ha mema amangi na kupwa bufuko bwa Tile,Byanenelele Tile profiti ya baka-mafuti.
4 Ziba shwamwa, obe Sidoni, yobe cimpaka ca kalunga-ndonga,Mwafwa kalunga-ndonga ngwendi:
“Kanda njizibeho mushongo wa kukita, co kanda njikiteho,Nambe kulela bakwenje nambe bambanda.”
5 Banu bakateta miteto mubakaziba muzimbu wa Tile,Ngwe mubatetelele mubazibile muzimbu wa Ijipiti.
6 Jabukeni muye ku Tashishi.
Mbolozokeni, yeni mwatunga kumukulo wa kalunga-ndonga.
7 Kuma ei ikeyo nganda yeni ije yakele na kulisamba kushwa kusañulu, kushwa ku mashangumukilo ndi?
Mendi abo akele na kubatwala ku mafuti a kulako mangana bakatungeko.
8 Iya nayongola kunenela Tile eci cuma,Ije ikaziki bilongo,Ije baka-kulandulula bayo bapwile bamyata,Ije baka-mingoso bayo babasingimikile ha lifuti-libu hoshe?
9 Yehova wa maswalale ikeye nayongola kulinga eci cuma,Mangana amanese kulyalesa kwayo kuje kunaija mwafwa ya bubwa bwayo bwoshe,Na kukehesa boshe baje babakele na kusingimika ha lifuti-libu.
10 Obe muna Tashishi wa munakazi, jabuka lifuti lyobe ngwe uje ajabuka ndonga ya Nailo.
Kulyesi lalo na cikuma.
11 Nolwela liboko lyendi ku kalunga-ndonga,Naningangesa bumwene.
Yehova nashiki ngwendi bibumbe bya Fonisha babinyongese.
12 Co nendeka ngwendi: “Kuukalisamba lalo,Obe muna Sidoni wa munakazi ibanalyatelela.
Katuka, jabuka uye ku Kitimu.
Nameme kuje, kuukawana kuhwima.”
13 Taleni lifuti lya baKaudiya!
Aba banu bakebo banalingi ngoco, keti baka-Asiria.
Bakebo banailingisa ipwe mwela wa tusitu ba mu mambo,Banatungu tuposhi twa nzita,Banapujula tuposhi twayo twa kukola,Banaibiisa na kuiseza ngacije bene.
14 Mbolozokeni, eni mato a ku Tashishi,Mwafwa cimpaka ceni banacinyongesa.
15 Ha litangwa olyo, Tile bakaibala ha myaka 70, simbu ije inapu hamo na simbu* ya kuyula kwa mwene umolika. Ku mamaneselelo a myaka 70, Tile ikapwa ngwe lihule ibanembi mu mwaso ngwabo:
16 “Obe lihule ibanebala, ambata kalyalya uzenguluke nganda.
Imba kalyalya kobe mu butongwe,Imba myaso yaingi,Mangana bakwanuke.”
17 Ku mamaneselelo a myaka 70, Yehova akanuka lalo Tile, co Tile ikatambula lalo fweto yayo na kulinga buhule na bumwene bwa kaye.
18 Oloni profiti yayo na fweto yayo bikapwa bya kujela kuli Yehova. Kubakabitulika nambe kubyaka kumukulo, mwafwa fweto yayo ikapwa ya banu ba Yehova, mangana balye na kukuta na kuzala bizalo byabibwa.
Majwi a kwinikila
^ Lijwi na lijwi “Bimbuto.”
^ Kulumbununa, muna Ndonga ya Nailo.
^ Lijwi na lijwi “matangwa.”
