Isaya 24:1-23
24 Taleni! Yehova atundisa banu boshe mu lifuti* na kulipwisa ngundu.
Alifulumika na kushandola banu boshe balimo.
2 Byuma bikendela banu boshe mu ngila ya kulifwa:
Mbunga ya banu na tupilistu,Ngamba wa munalume na shukulu yendi wa munalume,Ngamba wa munakazi na shukulu yendi wa munakazi,Muka-kulanda na muka-kulandesa,Muka-kukumwisa na muka-kukumuna,Muka-kukolotesa na muka-kukolota.
3 Lifuti likapwa lya mupulungwa,Byuma byoshe bilimo bakabipukula,Mwafwa Yehova ikeye nendekamo.
4 Lifuti lili mu busiwa,* lili na kunyonga.
Byuma bya mu lifuti bili na kujujwama, bili na kuhwa.
Banu ba kutsimana ba mu lifuti bali na kuzeya.
5 Banu bali mu lifuti banalibiisa,Mwafwa banajomboka mashiko,Banatengulula lishiko,Na kupokola cikumiiyo ca myaka yoshe.*
6 Mukemwo cisingo cilingisa lifuti balinyongese,Co baje bakalamo bali na mulonga.
Mukemwo baje bakala mu lifuti banatepuluka,Co banu babandondo lika banasalamo.
7 Binyu byabiha bili mu busiwa,* muti wa binyu uli na kujujwama,Co boshe baje banabwahelela mu bimbunge bali na kulinyenga.
8 Kubwahelela kwa tungoma kunahu,Kalwa ka baje bazema manene senga kanahu,Cilumo ca kubwahelela ca kalyalya cinahu.
9 Bali na kunwa binyu kwa kujeneka myaso,Co bwala bulula kuli baje bali na kubunwa.
10 Mbongi ibanaseze banaibiisa,Binjibo byoshe banabishoko mangana keti kukale umo akobela.
11 Bali na kulilila binyu mu bitapalo.
Kubwahelela kwoshe kunazimangana,Kubwahelela kwa mu lifuti kunahu.
12 Nganda inapu ngundu,Cikolo cayo banacitika-tika na kucipwisa mutumbo wa mazilo.
13 Mwafwa omu mukemwo mukukafwa mu lifuti, hakati ka miyati ya banu:
Ngwe muti wa olive ubananinganga,Ngwe simbu ya kupupulula, ku mamaneselelo a kuteja binyu.
14 Bakakuwa,Bakatambeka mu kubwahelela.
Bakambulula bukama bwa Yehova ku kalunga-ndonga.*
15 Mukemwo bakashangazala Yehova mu mutambela wa ceke,*Bakashangazala lizina lya Yehova Njambi ya Isalele ku mañanda a ku kalunga-ndonga.
16 Tuli na kuziba myaso ku mamaneselelo a lifuti-libu, ngwayo:
“Aneni Wakusungama bumpau!”
Oloni njendeka ngwange: “Njili na kuzeya, njili na kuzeya!
Njinabindama! Baka-makuli bali na kukwisa,Baka-makuli bali na kukwisa.”
17 Lyoba na mena na miheto binabandamena yobe watunga mu lifuti.
18 Woshe akatewa cilumo ca cuma cije cijujwisa, akawila mu bwina,Co woshe akatuhuka mu bwina, akatsa mu muheto.
Mwafwa bikolo bya mema a mwilu bikazikuka,Co lubula lwa lifuti lukajaja.
19 Lifuti linashama,Banalininganga,Lili na kujaja manene.
20 Lifuti lili na kutalyangela ngwe munu napende,Co lili na kuninganga noku-noku ngwe cipundo cije cininganga na lihunzi.
Mulonga walyo unalilemena manene,Co liwa, kulimana lalo.
21 Ha litangwa olyo, Yehova akasompa maswalale ba mwiluNa bimyene ba ha lifuti-libu.
22 Co bakabakungulwila hamoNgwe mapanditi babanakungulwila mu bwina,Co bakabashokelela mu kamenga.
Munima ya matangwa amangi, bakabelula.
23 Ngonde ije inatuhuka ya mutunu, bakaipayesa,Co litangwa lije libyakula, bakalizibisa shwamwa,Mwafwa Yehova wa maswalale napu Mwene ha Munkinda wa Siyone na mu Jelusalema,Ali na bumpau halutwe lwa bakulunu ba banu bendi.*
Majwi a kwinikila
^ Nambe “lifuti-libu.”
^ Nambe hamo “lili na kuma.”
^ Nambe “ca kusañulu.”
^ Nambe hamo “bili na kuma.”
^ Nambe “ku bulahukilo bwa litangwa.”
^ Nambe “ku butuhukilo bwa litangwa.”
^ Lijwi na lijwi “kulutwe lwa bakulunu bendi.”
