Isaya 27:1-13
27 Ha litangwa olyo, Yehova na mukwale wendi wa kubambuka, wa nzili, wa kukanyama,Akapupa Leviatani,* linyoka wa lumbisi,Akapupa Leviatani, linyoka uje akalizenga-zenga,Na kutsiya cikashama wa mu kalunga-ndonga.
2 Ha litangwa olyo, mukamwimbile* ngweni:
“Unapu ngwe lihya lya binyu bije bili na kututumuka lifulu.
3 Yange Yehova njili na kumunyungilila.
Simbu yoshe njili na kumushangelela.
Njili na kumunyungilila butsiki na mutanya,Mangana keti kukale umo amubulumuna.
4 Njinalikele kumulubalela.
Iya anjizila na biputa bya mingonga na mwila mu nzita?
Njibalyatangela na kubenyeka boshe na tuhya.
5 Ngeci, akwate na nzili ku cimpaka cange.
Akale mu kwoloka nange,Akale nange mu kwoloka.
6 Mu matangwa ali na kwija kulutwe, Jakobu akashimbika mizi,Isalele akatemuna bintemo na kujobelela,Co bakashulisa lifuti na bushuka.
7 Kuma banapande kumupupa ngwe mubapupila uje ali na kumupupa ndi?
Nambe kumutsiya ngwe mubanatsiila banu bendi ndi?
8 Ukamusompa na cilumo ca kutewesa muukamusheka.
Ukamusheka na lihunzi lyobe lya kutewesa ha litangwa lilikahuwa lihunzi lya ku butuhukilo bwa litangwa.
9 Omu mukemwo mubakafwikila kusebuka kwa Jakobu,Co bubi bwendi mubakabumanesa, ebi bikebyo byuma bikatundamo:
Akalingisa mamanya oshe a ha mutulaApwe ngwe memba ibanatiki,Co kukwesi bisini bya kulemesa nambe bikwatelo bya isense bikasala.
10 Mwafwa nganda ya kukola bakaiseza mupulungwa.
Bulilo* bakabuseza na kubuyengula ngwe mambo.
Mukemwo mwakalila na kulala muna ngombeNa kulya minango ya miti yamwo.
11 Minango yayo muikoma,Banakazi bakaija na kuipokozolaNa kuipwisa bikuni.
Mwafwa aba banu kubapwile ba kuzibisisa.
Mukemwo uje wabatangele kakabatetela,Co uje wabamungile kakabazibila ngozi.
12 Eni bana ba Isalele, ha litangwa olyo, yeni mwalishandoka, Yehova akamikungulula umo na umo, kushangumukila ku mutambela wa Ndonga* yakama kutwala ku Cinema ca Ijipiti ngwe munu mwakaninganga muti na kunonongola bushuka bwawo.
13 Ha litangwa olyo, bakohyesa limbinga* lyakama, co baje bali na kunyongela mu lifuti lya Asiria na baje banalishandokela mu lifuti lya Ijipiti bakaija na kutsikamena Yehova ha munkinda wa kujela mu Jelusalema.
Majwi a kwinikila
^ Taleni Majwi Abanalumbununa.
^ Hamo kulumbununa lifuti lya Isalele. Aha ha vesi banalyesekesa ku lihya lya binyu.
^ Kulumbununa mwela wa kulisila bimuna.
^ Kulumbununa Yufreti.
^ Nambe “lupembo.”
