Isaya 29:1-24
29 “Lubinda lwa Aliele,* lubinda lwa Aliele, nganda mwatungile cilombo Devidi.
Eni banu, twaleleleniho kulinga bilika byeniMwaka na mwaka.
2 Oloni njikanenela Aliele bukalu,Co banu bakalila na kukala mu busiwa,Co kuli yange, Aliele akapwa ngwe liko lya ku mutula wa Njambi.
3 Njikatunga bilombo ku mitambela yobe yoshe mangana njikulwise,Na kukuzengeleka na biti bya kushongomoka,Co njikakutungila cibumbe mangana njikulwise.
4 Bakakuwisila hasi,Ukendeka oku uli hasi,Co biukendeka kubikazibika bwino mwafwa ya likungu.
Lijwi lyobe likatundilila hasiNgwe lijwi lya muka-kwendeka na bakulu,Co majwi obe akateta mu likungu.
5 Mbunga ya bitozi bobe ipwa ngwe likungu,Mbunga ya baka-kulyatelela ipwa ngwe lijungu lije lipekumuka.
Ebi byuma bilingiwa bwasi-bwasi, mu kukasumuna.
6 Yehova wa maswalale akamyobolaNa cililimo na lindunduma na kalwa kakama,Na lihunzi lyakama, na lihunzi lyakama lya kutenuka, na milangi ya tuhya ije inyongesa.”
7 Co mbunga ya baka-mafuti boshe baje bali na kulwisa Aliele,Boshe baje bali na kumulwisa,Baje banashimbika tuposhi twabo twa nzita mangana bamulwise,Na baje bali na kumunenela bukalu,Bakapwa ngwe cilota, ngwe cimona ca butsiki.
8 Eyo, kukafwa lika ngwe munu uje natsi njala alota ngwendi ali na kulya byakulya,Oloni mwenduka anga natsi njala,Na munu uje natsi lihwila alota ngwendi ali na kunwa mema,Oloni mwenduka najuka na kutsa lihwila.
Mukemwo mukukafwa ku mbunga ya baka-mafuti bosheBaje balwisa Munkinda wa Siyone.
9 Kasameni na kukomoka,Fwikeni ku mesho mangana keti mumone.
Banapende, oloni kubanwine binyu,Bali na kutalyangela, oloni kubanwine bwala.
10 Mwafwa Yehova namilingisa mulale tulo twakama,Nafwiki mesho eni, eni tupolofweto,Co nafwiki ku mitwe yeni, eni baka-kumona bimona.
11 Kuli yeni, cimona coshe cipwa ngwe majwi a mu libulu libanapata. Nga balyana munu uje azibuka kutanda na kumuleka ngwabo: “Tutandeleko eli libulu mu kutambeka,” endeka ngwendi: “Kunjasa kulitanda, mwafwa banalipata.”
12 Co nga eli libulu balyana munu uje kazibuka kutanda na kumuleka ngwabo: “Tanda eli libulu,” endeka ngwendi: “Kunjizibuka kutanda.”
13 Yehova nendeka ngwendi: “Aba banu bali na kunjilemesa lika na tunwa twaboNa kunjisingimika na tunwa twabo,Oloni bimbunge byabo bili kulako nange,Co bali na kunjizibila lyoba mwafwa ya mashiko a banu abanabalongesa.
14 Ngeci, njikalinga lalo byuma bya kukomokesa kuli aba banu,Njikalinga byuma bya kukomokesa, bya kukasamesa,Co mana a banu babo ba mana akanyonga,Na kuzibisisa kwa banu babo ba kunyanyama kukabanda.”
15 Banabindama baje bakalifwiti kushwekela Yehova matumbe abo.
Bilinga byabo bakabilingila mu lisusulungu,Co bendeka ngwabo: “Iya atumona?
Iya azibuka bitulinga?”
16 Muli na kuhengesa byuma.*
Kuma muka-kumunga byuma bya buma banapande kumwesekesa na buma ndi?
Kuma cuma cibanapanga casa kwendeka uje nacipanga ngwaco:
“Keti ikeye nanjipanga” ndi?
Co kuma cuma cibanamungu casa kwendeka uje nacimungu ngwaco:
“Byahi byazibuka” ndi?
17 Mu simbu yaindondo lika, Lebanoni bakaipwisa lihya lya miti ya bushuka,Co eli lihya lya miti ya bushuka bakalimona ngwe shwata.
18 Ha litangwa olyo, tusinda-matwi bakaziba majwi a mu libulu,Co mesho a tupuputwa akamona mu lisusulungu lyakama.
19 Banu bababotsi bakabwahelela manene mwafwa ya Yehova,Co tuhutu bakalisamba mwafwa ya Wakujela wa Isalele.
20 Mwafwa muka-kulyatelela kakakalako lalo.
Muka-kulishasha akanyonga,Co boshe baje babandamena kubulumuna bakwabo bakabanyongesa.
21 Bakanyongesa baje bakutiiya bakwabo biñanda bya makuli,Baje batela miheto muka-kwamena* banu ku cikolo ca nganda,Na kwendeka byuma bya kujeneka bukaleho mangana keti bakule mwamubwa munu wa kusungama.
22 Ngeci, Yehova uje wapatwile Abrahamu nendeka kutalesa ku bakunjibo ya Jakobu ngwendi:
Jakobu kakazibi lalo shwamwa,Co cihanga cendi kucikatokoloka lalo.*
23 Mwafwa mwakamona bana bendi,Baje bapwa cipangi ca maboko ange banamuzengeleka,Bakajelesa lizina lyange,Eyo, bakajelesa lizina lya Wakujela wa Jakobu,Na kuzibila lyoba Njambi ya Isalele.
24 Baje banalumbuka bakapwa ba kuzibisisa,Co baje bali na kuyayabala bakataba kubanangula.”
Majwi a kwinikila
^ Hamo kulumbununa “Coto ca ku Mutula wa Njambi.” Cisholoka ngwe kulumbununa Jelusalema.
^ Nambe “Mwapwa banu ba kupengapenga!”
^ Lijwi na lijwi “muka-kwendekela.”
^ Kulumbununa, kutokoloka mwafwa ya kuziba shwamwa.
