Isaya 30:1-33
30 Yehova nendeka ngwendi: “Banabindama bana ba kutindibala,Baje balinga mwaya matumbe abo, keti ange,Baje balinga bikumiiyo, oloni keti na sipilitu yange,Mangana babwezelele bubi ku bubi.
2 Basikumuka ku Ijipiti kwa kujeneka kunjihula,Batewela kuli Falo* mangana akabanyungilileNa kutewela mu munzinze wa Ijipiti!
3 Oloni kunyungilila kwa Falo kumilingisa muzibe shwamwa,Co kutewela mu munzinze wa Ijipiti kumilingisa mushauke.
4 Mwafwa bamyata bendi bali mu Zoani,Co tutumwa bendi banete mu Hanesi.
5 Boshe bakabazibisa shwamwaBanu baje kubasa kubanenela bubwa bwoshe-bwoshe,Baje kubabakwasa nambe kubanenela bubwa,Kubanga shwamwa na kushauka.”
6 Ou ukewo muzimbu wa kusompa bimuna ba ku mbwela:*
Mu lifuti lya bishoti na kayando,Lifuti lya bindumba, bindumba baje bali na kubuluma,Lifuti lya mambwambwa na manyoka ba tuhya ba kupulula,*Mukemwo mubaita baje bambatela bufuko bwabo ha myongo ya bidonki,*Na kwambatela byuma byabo bya kulikwasesa ha matunda a tumele.
Oloni ebi byuma kubikwasa banu.
7 Mwafwa bukwasi bwa Ijipiti bwangoco.
Mukemwo njaitumbula ngwange: “Rahabu, uje akatumama lika ngoco.”
8 Ngeci, ya ukabisoneke ha mbazubwila ya limanya oku nabo banatalelela,Na kubisoneka mu libulu,Mangana mu simbu ija kulutwe,Bikapwe bukaleho bwa myaka yoshe.
9 Mwafwa banapu baka-kutengulukila, banapu bana baje bapwa baka-kukwisa,Bana baje kubashaka kuziba lishiko* lya Yehova.
10 Baleka baka-kumona ngwabo, ‘Keti mumone,’Na kuleka baka-kumona bimona ngwabo, ‘Keti mutuleke bimona bya busunga.
Tulekeni byuma bije bituzibisa kubwaha. Moneni bimona bya makuli.
11 Sezeni ngila, tundeni mu ngila.
Eceleni kutuleka bya Wakujela wa Isalele.’”
12 Ngeci, Wakujela wa Isalele ngwendi:
“Ha kuwana ngwe munabyana lijwi lyange,Na kukulahela linyanyamena na makuli,Na kujendamena ha byuma ebi,
13 Mulonga weni umilingisa mupwe ngwe cibumbe cije cili na mwanzi,Ngwe cibumbe cacilaha ca kujendama cije cishaka kuwa.
Ciwa mu kukasumuna simbu yoshe-yoshe.
14 Cipujuka ngwe njaba yakama ya muka-kumunga byuma bya buma,Citikika coshe tiki-tiki, co kukusala nameme mbazubwilaYa kulahwisa tuhya ha liko,Nambe ya kutekwisa mema mu mungunja.”*
15 Mwafwa Mwata Wahakamwa ya Byoshe Yehova, Wakujela wa Isalele ngwendi:
“Nga mwiluka kuli yange na kulitumamena, co mwoboka,Mukala na nzili nga muwa bimbunge na kunjikulahela.
Oloni kumwashakele.
16 Mwendekele ngweni: “Embwe, tutewa oku tuli ha tubalu!
Tulonda ha tubalu ba lumbisi!”
Ngeci, mutewa bene.
Oloni baka-kumisheka bakala manene na lumbisi.
17 Banu 1,000 bakalijujukila mwafwa ya munu umo uje akabajujwisa,Mukatewa mwafwa ya banu batanu baje bakamijujwisa,Kweta noho baje banasalaho hakati keni bakapwa ngwe cisini cije cili helu lya munkinda,Ngwe cisini ca cimweso cili helu lya lilundu.
18 Oloni Yehova ali na kumimwesa mbunge ya kubandamena mangana amizibile ngozi,Co akatuka mangana amitetele.
Mwafwa Yehova wapwa Njambi uje akakula mwamubwa.
Banabwahelela boshe baje bali na kumubandamena.*
19 Mumukakala mu Siyone, mu Jelusalema, kumukalili embwe. Cili bene, akamizibila ngozi mwakaziba miteto yeni ya kulomba bukwasi. Acikaiziba lika, akamikumbulula.
20 Nameme Yehova akaminenela bukalu kupwa ngwe byakulya byeni na tuyando kupwa ngwe mema eni, Mulongesi weni Wakama Manene kakalishweke lalo, co mukamona Mulongesi weni Wakama Manene na mesho eni.
21 Nga mungumuka na kuya ku cilyo nameme ku cimoshwe, muziba lijwi munima yeni lyendeka ngwalyo, “Ngila ei. Endenimo.”
22 Co mukajwalesa siuva imunasalimba ha tumponya beni ba kushonga, na goldi imunasalimba ha tumponya beni ba bikubo. Mukabombila kuti ngwe nanga ya munakazi uje ali ku ngonde na kubaleka ngweni, “Yeni okwo!”*
23 Co akanyokesela nyonzi bimbuto bimunakunu mu libu, co libu likamenesa byakulya byabingi byabibwa. Ha litangwa olyo, bimuna beni bakalila mu bulilo bwakama.
24 Co bingombe na bidonki baje bakalimi bakalya byakulya bibanakumbasana mwamubwa, bije bibanaleleka na bifosholo na bifosholo bya mishomo.
25 Co tuposhi mutukawa ha litangwa libakatsiya manene banu, ha munkinda woshe waulaha na lilundu lyoshe lyalilaha hakakala bana ba bindonga na tupila twa mema.
26 Ha litangwa lyakakuta Yehova banu bendi haje habanabulumuka* na kukangwisa bimbandu byabo byakama byanabapwelumwine, lyezi lya ngonde ya mutunu likapwa ngwe ceke ca litangwa. Co ceke ca litangwa cikalibwezelela lwa kupwa 7, ngwe ceke ca matangwa 7.
27 Taleni! Yehova* ali na kwija kutundilila kulako,Ali na kwija na butenu na mashelwa a kulema.
Endeka na butenu,Co ndaka yendi inapu ngwe tuhya tuje tunyongesa.
28 Sipilitu* yendi inapu ngwe mema a muta aje alibwezelela kweta na mu singo,Mangana asefe baka-mafuti mu sefa ya kunyongesa,Co miyati ya banu ikakala na mikole ku bimbange byayo ije ikabongumuna.
29 Oloni mwaso weni ukapwa ngwe mwaso ubanembi butsikiHa simbu imulibwahesela* cilika,Co bimbunge byeni bikabwahelela ngwe munuUje enda oku emba* mutoliloMwaya ku munkinda wa Yehova, Limanya lya Isalele.
30 Yehova alingisa lijwi lyendi lyakama lizibike,Na kusholola liboko lyendi mwalyolwela hasi na butenu,Na mulangi wa tuhya tuje tunyongesa,Na nyonzi yakama na cililimo na nyonzi ya mamanya.
31 Mwafwa ya lijwi lya Yehova, Asiria ikalijujukila,Akaipupa na mbweti.
32 Simbu yoshe yakahwingisa Yehova mbweti yendi ya kashitikoKaje kakana Asiria,Kukazibika cilumo ca tungoma na tulyalyaMwakahwinga liboko lyendi mu kuilwisa.
33 Mwafwa Tofethi* yayo banaibwahesa laja,Banaibwahesela lalo na mwene.
Njambi nabwahesa mwela wa kuloba wa kujanjabala muje mwanalundika bikuni,Nabwekemo tuhya twakama na kwakamo bikuni byabingi.
Muku wa Yehova, uje unapu ngwe muta wa saufa,Ukashwameka Tofethi na tuhya.
Majwi a kwinikila
^ Lijwi na lijwi “mu cimpaka ca Falo.”
^ Nambe “ku south.”
^ Nambe “manyoka ba lumbisi, ba bushungu.”
^ Nambe “bimulu.”
^ Nambe “bilongesa.”
^ Nambe hamo “lisima.”
^ Nambe “kumubandamena na bimbunge byabo byoshe.”
^ Nambe hamo “na kubatumbula ngweni ba kujwala.”
^ Nambe “habanapokoka.”
^ Lijwi na lijwi, “lizina lya Yehova.”
^ Nambe “Muku.”
^ Nambe “imulijelesela.”
^ Nambe “endelela na cilumo ca.”
^ “Aha Tofethi yatalesa ku mwela wa cifwisa wa kwenyekela, kulumbununa kunyonga.”
