Isaya 33:1-24
33 Lubinda lwobe muka-kunyongesa, uje kubanyongesele,Obe cingungu, uje kubendele bungungu!
Muumanesa kunyongesa bakweni, nobe bakunyongesa.
Muumanesa kwenda bakweni bungungu, nobe bakwenda bungungu.
2 Obe Yehova, tuzibileko ngozi.
Twakulahela yobe.
Tukwase na liboko* lyobe mutondo na mutondo,Eyo, twobole mu simbu ya bukalu.
3 Miyati ya banu itewa muiziba cilumo ca mpindangano.
Muukatuka, mafuti alishandoka.
4 Ngwe mubakalikungulwila bimbimba baje banatsi manene njala, mukemwo mubakakungulwila byuma biukapukula.
Banu bakabilupukila ngwe binjame bya bimbimba.
5 Yehova bakamuzumbangeya,Mwafwa wakala helu manene.
Akashulisa Siyone na kwakula mwamubwa na kusungama.
6 Ikeye azameka bisimbu byobe,Co akwobola mu ngila yakama na kukwana mana na mangana na kukulingisa uzibile Yehova lyoba.
Obu bukebwo bufuko bwendi.
7 Taleni! Banu babo ba nzili bali na kulila mu tapalo,Tutumwa ba kwoloka bali na kumbolozoka.
8 Bitapalo banabiseze,Wahi ali na kwenda mu bingila.
Napokola* cikumiiyo,Nabyana binganda,Kesi na kwaka mbunge munu.
9 Lifuti lili na kulila* na kujujwama.
Lebanoni nashauka, nabolo.
Shaloni napu ngwe mambo,Co Bashani na Kameu batotomona maputa abo.
10 Yehova ngwendi, “Hanwoni njikatuka,Njilijundula,Njilyamesa.
11 Mwimita mwila wa kuma na kukita bishati.
Biyongola byeni babenya biminyongesa ngwe tuhya.
12 Miyati ya banu ikapwa ngwe lito lya memba.
Bakaishwameka tuhya ngwe mingonga ibanatete.
13 Eni muli kulako, zibeni binjilinga!
Co yeni muli hayehi, nangukeni nzili yange!
14 Baka-bubi mu Siyone banalijujukila,Baka-kutengulukila bali na kujaja na kwendeka ngwabo:
‘Iya hakati ketu asa kuyoya kuje kuli tuhya tunyongesa?
Iya hakati ketu asa kuyoya kuje kuli milangi ije kuyasa kuzima?’
15 Uje atwalelelaho kwenda mu kusungama,Na kwendeka byakusungama,Uje abyana kuwana byuma mu kujeneka kulongwa na linyanyamena.
Uje abyana kutambula lizika-kanwa,Uje azika litwi lyendi mangana keti azibe baje bendeka bya kwitila maninga,Na kulalameka mangana keti amone byuma byabibi.
16 Akala mu myela ya helu,Bimpaka bya mamanya bikebyo bipwa butewelo bwendi bwa kukola,Bamwana byakulya,Co atwalelelaho kukala na mema.
17 Mesho obe akamona mwene mu bulemu bwendi,Akamona lifuti lili kulako.
18 Mu mbunge yobe, ukanuka* ebi byuma bya kutewesa na kwendeka ngwobe:
“Muka-kusoneka ali kuli?
Ali kuli uje wakele na kupeselesa milambu?
Ali kuli uje wakele na kutanda tuposhi?”
19 Kuukamono lalo banu ba likamba,Banu baje bakendeka ndaka yaikalu* kuizibisisa,Baje kuwasa kuzibisisa bindaka byabo bya cikukuma.
20 Tala Siyone, nganda ya bilika byetu!
Mesho obe akamona Jelusalema kupwa mwela wa kwoloka mwakukala,Tenti ije kubakashwenesa.
Bimbambo byayo kubakabishomona,Co kukwesi mukole wayo ubakabatula.
21 Oloni Yehova uje wapwa wakama,Akapwa ngwe mutambela wa bindonga kuli yetu, ngwe mutambela wa tupila twa mema twa kujanjabala,Muje kumukai mato a nzita,Co kukwesi mato akama akaitamo.
22 Mwafwa Yehova ikeye Lyaako wetu,Yehova ikeye Muka-kutwana mashiko,Yehova ikeye Mwene yetu,Ikeye atwobola.
23 Mikole yeni ikambwembwela,Kuikasa kukwatelela cisini ca bwato nambe kujangumuna nanga ya bwato.
Ha simbu oyo, bakamitepela byuma byabingi bibakapukula,Nameme biyanga bakambatako byuma byabingi bibanapukula.
24 Kukwesi munu akakala mu lifuti akendeka ngwendi: “Njili na kubinja.”
Banu bakakala mu lifuti bakabakonekela milonga yabo.
Majwi a kwinikila
^ Nambe “nzili.”
^ Kulumbununa, citozi.
^ Nambe hamo “kuma.”
^ Nambe “ukasinganyekesesa.”
^ Lijwi na lijwi “ya kuziminina.”
