Isaya 35:1-10
35 Mambo na lifuti lya kuma bikalisamba,Co mambo ikabwahelela na kutemuna bintemo ngwe safroni.
2 Cili bene ikatemuna bintemo,Ikabwahelela na kutambeka mu kubwahelela.
Bakayana bumpau bwa Lebanoni,Na bulemu bwa Kameu nobu bwa Shaloni.
Banu bakamona bumpau bwa Yehova, bulemu bwa Njambi yetu.
3 Kanyameseni maboko aje anazeye,Na kukolesa mabuli aje ali na kujaja.
4 Lekeni baje banalishoshomwena mu bimbunge ngweni:
“Kanyameni. Keti muzibe lyoba.
Taleni! Njambi yeni ali na kwija na kulinga shambandinga,Njambi aija na kwana kashitiko.
Aija na kumyobola.”
5 Ha simbu oyo, mesho a tupuputwa akatona,Matwi a tusinda-matwi nawo akazikuka.
6 Ha simbu oyo, biyanga bakajombozoka ngwe ntaba,Co bindaka bya tubebebe bikatambeka mu kubwahelela.
Mema akabweluka mu mambo,Co mu mambo mukakala bana ba bindonga.
7 Mwela wa kushaluka, wa kuma, ukapwa cihongo ca mema,Co libu lya kujeneka mema likakala na tubwelubwelu twa mema.
Mu myela mubakele na kuhwimina bimbanje,Mukakala mwila wa kuzibuluka na mahongo na matebe.
8 Co mukakala ngila,Eyo, ngila ibatumbula ngwabo Ngila ya Kujela.
Munu wa kujwala kakendemo.
Banaibwahesela baje babanatabesa kwendamo.
Kukwesi cilema akalibembelamo.
9 Kukwesi ndumba akakalamo,Co kukwesi bikashama ba kutewesa bakaijamo.
Kubakakalamo.
Baje babanasokola bakebo lika bakendamo.
10 Baje banapatula Yehova bakeluka na kwija mu Siyone oku batambeka mu kubwahelela.
Kubwahelela kwa myaka yoshe kukapwa ngwe bilongo ku mitwe yabo.
Bakalisamba na kubwahelela,Co busiwa na kulinyenga bikahwa.
