Isaya 36:1-22
36 Mu mwaka wa bu 14 wa ciyulo ca Mwene Hezekiya, Senakeribu mwene wa Asiria wezile na kulwisa binganda bya kukola bya Juda na kubifungulula.
2 Co mwene wa Asiria watumine Labushake hamo na cibunga cakama ca maswalale kutunda ku Lakishi kwija kuli Mwene Hezekiya mu Jelusalema. Bemanene ku kapila kaje katunda mu kalishali ka ha munkinda, ku tapalo iya kuje kwakapangela muka-kukusha bizalo.
3 Co Eliakimu muna Hilikiya, uje wakele na kutala bya njibo ya mwene,* na Shebina muka-kusoneka, na Jowa muna Asafu muka-kunyunga mizimbu, batuhukile na kuya kuli ikeye.
4 Ngeci, Labushake wabalekele ngwendi: “Shukulu-kambu, lekeni Hezekiya ngweni, ‘Ebi bikebyo byanendeka mwene wakama, mwene wa Asiria, ngwendi: “Kusimpa kwobe kunemana haka?
5 Uli na kwendeka ngwobe, ‘Njizibuka mwakulwila, co njili na nzili ya kulwa nzita,’ oloni awa majwi angoco. Iya iunakulahela, mangana uyongole kunjitengulukila?
6 Tala! Wakulahela bukwasi bwa Ijipiti uje napu ngwe lihongo lya kufunyuka, lya kulinga nga munu asindamenaho, limutuba mu liboko. Mukemwo mwanafwila Falo mwene wa Ijipiti kuli boshe baje bamukulahela.
7 Co nga unjileka ngwobe, ‘Twakulahela Yehova Njambi yetu,’ kuma keti ikeye babenya myela ya kulunduka na mitula yanatundisa Hezekiya, kutundaho aleka Juda na Jelusalema ngwendi, ‘Munapande kutsikama lika oku ku mutula umo’?”’
8 Ngeci, shukulu-kambu, lipece na shukulu yange mwene wa Asiria. Njikwana tubalu 2,000 tumone indi wasa kuwana baka-kulondaho ba kupwamo.
9 Co wasa kusheka bati nameme ngubulu umo uje wapwa wamundondo manene ku bangamba boshe ba shukulu yange, okuni wakulahela Ijipiti ngwobe akwaneko matemba na baka-kulonda ha tubalu?
10 Kuma njinaija na kulwisa eli lifuti na kulinyongesa kwa kujeneka Yehova kunjitabesa ndi? Yehova ikeye nanjileke ngwendi, ‘Ya ukalwise eli lifuti na kulinyongesa.’”
11 Ngeci, Eliakimu, Shebina na Jowa balekele Labushake ngwabo: “Shukulu-kambu, simutwiya na bangamba bobe mu ndaka ya ciAlamaiki* mwafwa tuizibisisa. Keti wendeke netu mu ndaka ya baJuda oku banu bali ha cibumbe bali na kuzibako.”
12 Oloni Labushake wendekele ngwendi: “Kuma shukulu yange nanjitumu kwa kwendeka awa majwi kuli shukulu yeni na kuli yeni lika ndi? Kuma kanjitumine na ku banalume banatumama ha cibumbe, baje bakalya tuzi twabo na kunwa mashu abo ngwe mumukalingila yeni ndi?”
13 Co Labushake wemanene na kutambeka mu ndaka ya baJuda ngwendi: “Zibeni byanendeka mwene wakama, mwene wa Asiria.
14 Mwene ngwendi, ‘Keti mutabese Hezekiya amyungumune, mwafwa kasa kumyamena.
15 Co keti mukulahele Yehova mwafwa ya Hezekiya uje ali na kwendeka ngwendi: “Yehova atwamena, co ino nganda kubayana mu liboko lya mwene wa Asiria.”
16 Keti mutolilile Hezekiya, mwafwa mwene wa Asiria nendeka ngwendi: “Liteni mangana mukale nange mu kwoloka, co umo na umo weni akalya bushuka bwa ku muti wendi wa binyu na bushuka bwa ku muti wendi wa mukuyu na kunwa mema a mu lisima lyendi,
17 kweta noho hanjikezila na kumyambata na kumitwala ku lifuti lya kulifwa na lyeni, lifuti lya binona na binyu byabiha, lifuti lya byakulya na mahya a miti ya bushuka bwa binyu.
18 Keti mutabese Hezekiya amyungumune ha kwendeka ngwendi, ‘Yehova atwamena.’ Kuma kuli binjambi ba baka-mafuti banamena mafuti abo mu liboko lya mwene wa Asiria ndi?
19 Binjambi ba Hamathi na Apadi bali kuli? Binjambi ba Sefavaimu bali kuli? Kuma banamena Samaliya mu liboko lyange ndi?
20 Njambi muka ha binjambi boshe ba mafuti awa namena lifuti lyendi mu liboko lyange, mangana Yehova amene Jelusalema mu liboko lyange?”’”
21 Oloni bolokele lika kulu, kubamukumbulwile, mwafwa mwene wabashikile ngwendi, “Keti mukamukumbulule.”
22 Co Eliakimu muna Hilikiya, uje wakele na kutala bya njibo ya mwene,* na Shebina muka-kusoneka, na Jowa muna Asafu muka-kunyunga mizimbu, bezile kuli Hezekiya oku banatabula bizalo byabo, co bamulekele majwi a Labushake.
