Isaya 37:1-38
37 Mwene Hezekiya mwazibile awa majwi, watabwile bizalo byendi na kuzala cikeleya, co wakobelele mu njibo ya Yehova.
2 Co watumine Eliakimu uje wakele na kutala bya njibo ya mwene,* na Shebina muka-kusoneka, na bakulunu ba tupilistu baye kuli kapolofweto Isaya muna Amozi oku banazala bikeleya.
3 Bamulekele ngwabo: “Hezekiya nendeka ngwendi, ‘Eli linapu litangwa lya bukalu, na kutushendumuna,* na kushauka. Mwafwa tunapu ngwe munakazi uje ashaka kupapa, oloni kesi na nzili ya kupapa.
4 Hamo Yehova Njambi yobe aziba majwi a Labushake uje yanatumine shukulu yendi mwene wa Asiria mangana akushendumune Njambi wa kuyoya na kumwana kashitiko mwafwa ya majwi anazibi Yehova Njambi yobe. Ngeci, lombelelako baje banasalaho, baje banoboka.’”
5 Ngeci, bangamba ba Mwene Hezekiya baile kuli Isaya.
6 Co Isaya wabalekele ngwendi: “Yeni mukaleke shukulu yeni ngweni, ‘Yehova nendeka ngwendi: “Keti uzibe lyoba mwafwa ya majwi aunazibi, majwi a bangamba ba mwene wa Asiria a kunjishendumuna.
7 Njaka biyongola mu mbunge yendi, co atambula muzimbu na kwiluka ku lifuti lyendi, co njimulingisa akatsile mu lifuti lyendi na mukwale.”’”
8 Labushake mwazibile ngwabo mwene wa Asiria nalikele kulwisa nganda ya Lakishi, welukile kuli ikeye, co wakamuwanene ali na kulwisa nganda ya Libuna.
9 Co ou mwene wazibile ngwabo Mwene Tihaka wa Ithopia naija na kumulwisa. Mwazibile ngoco, watumine lalo tutumwa kuli Hezekiya ngwendi:
10 “Yeni mukaleke Mwene Hezekiya wa Juda ngweni, ‘Keti utabese Njambi yobe iwakulahela akukwise ngwendi: “Jelusalema kubayana mu liboko lya mwene wa Asiria.”
11 Tala! Unazibi bibalingile bimyene ba Asiria ku mafuti oshe mubawanyongesele. Kuma usinganyeka ngwobe yobeco bakwamena ndi?
12 Kuma binjambi ba baka-mafuti babanyongesele bakukulwila bange babamenene ndi? Gozani, na Halani, na Lezefu, na banu ba mu Edeni baje bakele mu Teu-asa bali kuli?
13 Mwene wa Hamathi, na mwene wa Apadi, na bimyene ba binganda bya Sefavaimu, na Hena, na Iva bali kuli?’”
14 Hezekiya wambatele mikanda ibakwatele tutumwa na kuitanda. Co waile ku njibo ya Yehova na kukaijangumwina ku mesho a Yehova.
15 Co Hezekiya walombelele kuli Yehova ngwendi:
16 “Obe Yehova wa maswalale, Njambi ya Isalele, uje natumama helu lya* bakerubi, yobe lika Njambi wa busunga wa bumwene bwoshe bwa ha lifuti-libu. Yobe watangele melu na lifuti-libu.
17 Jendeka litwi lyobe, obe Yehova, mangana uzibe! Tona, obe Yehova, mangana umone! Ziba majwi oshe anatumu Senakeribu a kushendumuna yobe Njambi wa kuyoya.
18 Mwa busunga bene, obe Yehova, bimyene ba Asiria banabiisa mafuti oshe, hamolika na lifuti lyabo.
19 Co bombilile binjambi babo mu tuhya mwafwa kubapwile binjambi, oloni bapwile bipangi bya maboko a banu. Bapwile binjambi ba biti na mamanya, mukemwo basele kubanyongesa.
20 Ngeci, obe Yehova Njambi yetu, twobole mu liboko lyendi, mangana bumwene bwoshe bwa ha lifuti-libu buzibuke ngwabwo yobe lika wapwa Njambi, obe Yehova.”
21 Isaya muna Amozi watumine ou muzimbu kuli Hezekiya ngwendi: “Yehova Njambi ya Isalele nendeka ngwendi, ‘Mwafwa unalombela kuli yange hali Mwene Senakeribu wa Asiria,
22 awa akewo majwi anendeka Yehova hali ikeye ngwendi:
“Muna Siyone wa munakazi ali na kukushaula, ali na kukushendumuna.
Muna Jelusalema wa munakazi ali na kupika ku mutwe mwafwa yobe.
23 Iya iunashendumuna na kushaula?
Iya iunatenukilaNa kwimikila mesho obe na likamba?
Unalingi ngoco kuli Wakujela wa Isalele.
24 Unapangesa bangamba bobe mu kushendumuna Yehova na kwendeka ngwobe,‘Njikanduka ha minkinda yailaha manene,Myela ya Lebanoni ya kulako maneneNa matemba ange a nzita amangi.
Njiteta miti yayo ya sida yailaha, na miti yayo ya junipa yaibwa.
Njikobela mu myela yayo ya kuhwimina yailaha manene, na bishwata byayo bya kuzika manene.
25 Njinda masima na kunwa mema.
Njumisa bana ba bindonga* ba Ijipiti na bilyato bya mendi ange.’
26 Kuma kuwazibile ndi? Njabiyongwele laja kusañulu.
Njabibwahesele laja ku matangwa a kunima.
Hanwoni njibishulisilila.
Ulingisa binganda bya kukola bipwe mutumbo wa mamanya.
27 Banu bakalamo bakajeneka wa kubakwasa,Bakalijujukila na kuziba shwamwa.
Bakapwa ngwe bimena bya mu shwata na mwila wa kuzibuluka,Ngwe mwila unasoko ha biluli uje unababuka na lihunzi lya ku butuhukilo bwa litangwa.
28 Oloni njikazibuka muukatumama, muukatuhuka, muukakobela,Nomu muukanjilubalela,
29 Mwafwa butenu bwobe na kubuluma kwobe binete mu matwi ange.
Ngeci, njikobelesa kalobo mu majulu obe na kukuta mukole ku kanwa kobe,Na kukwilwisa mu ngila iunezile.”
30 “‘Eci cikeco cipwa cizibukiso kuli yobe:* Uno mwaka mulya byakulisokela, co mwaka wamucibali mukalya binona bya munzumba, oloni mwaka wamucitatu mukakuna mbuto na kuteja, na kukuna miti ya bushuka bwa binyu na kulya bushuka bwayo.
31 Bakunjibo ya Juda baje boboka, baje banasalaho bakashimbika mizi na kwima bushuka.
32 Mwafwa baje banasalaho bakatunda mu Jelusalema, co baje banoboka bakatunda ha Munkinda wa Siyone. Yehova wa maswalale ikeye nashungwiya kulinga ngoco.
33 “‘Ngeci, ebi bikebyo byanendeka Yehova kutalesa kuli mwene wa Asiria ngwendi:
“Kakakobela muno mu ngandaNambe kwashamo mukiliNambe kwija na kuilwisa na nteloNambe kuzengeleka cibumbe cayo.”’
34 ‘Akeluka mu ngila mwanezile,Kakakobela muno mu nganda,’ ngwendi Yehova.
35 ‘Njamena ei nganda na kuyobola mwafwa ya lizina lyangeNa ngamba yange Devidi.’”
36 Co kangelo ka Yehova waile na kutsiya banalume 185,000 mu cilombo ca baka-Asiria. Banu mubendukile mutondo-tondo, bamwene bibimbi lundulu.
37 Mwene Senakeribu wa Asiria wakatukile na kwiluka ku Ninive na kukakalako.
38 Co mwatsikamene mu njibo* ya njambi yendi Nisiloki, bana bendi ba banalume, Adrameleki na Shaleza bamutsiile na mukwale na kutewela ku lifuti lya Alalati. Co munendi Esa-hadoni wamwingile ha litanda.
Majwi a kwinikila
^ Nambe “lipela.”
^ Nambe “matuka.”
^ Nambe hamo “mukati ka.”
^ Nambe “tupila twa Nailo.”
^ Kulumbununa, Hezekiya.
^ Nambe “tempele.”
