Isaya 38:1-22
38 Mu matangwa aje, Hezekiya wabinjile, co wakele muyehi na kutsa. Kapolofweto Isaya muna Amozi wezile na kumuleka ngwendi, “Yehova nendeka ngwendi: ‘Shika bakunjibo yobe, mwafwa utsa, kuukanguka.’”
2 Co Hezekiya watengulukilile ku cibumbe na kushangumuka kulombela kuli Yehova ngwendi:
3 “Njikulomba, obe Yehova, shukulu-kambu, anuka munjinendela mu kulongwa ku mesho obe na mbunge yange yoshe na kulinga byuma byabibwa ku mesho obe.” Co Hezekiya washangumukile kulila manene.
4 Co Yehova walekele Isaya ngwendi:
5 “Iluka kuli Hezekiya ukamuleke ngwobe, ‘Yehova Njambi ya kukulwila yobe Devidi ngwendi: “Njinazibi lilombelo lyobe. Njinamono misozi yobe. Ngeci, njibwezelela myaka 15 ku kuyoya kwobe,
6 co njikwamena na kwamena ei nganda mu liboko lya mwene wa Asiria, na kulwila ei nganda.
7 Cino cikeco cizibukiso ca kutunda kuli Yehova cije cikumwesa ngwaco Yehova alinga byanendeka:
8 Tala, njilingisa munzinzime uli ha bindendelo* bya Ahazi uje uli na kutepuluka, wiluke munima manambo 10.”’” Ngeci, munzinzime welukile munima manambo 10 ha bindendelo haje hawasikumukile laja.
9 Awa akewo majwi a Mwene Hezekiya wa Juda asonekele ha simbu yabinjile na kukanguka ku mushongo wendi:
10 Njendekele ngwange: “Njinapande kuya ku bikolo bya Cihilo*Hakati ka myaka ya kuyoya kwange.
Kubanjitabesa kumaneselela myaka yange ya kuyoya inasalako.”
11 Njendekele ngwange: “Kunjikamono Jah,* kunjikamono Jah mu lifuti lya banu ba kuyoya.
Kunjikatala lalo banuMunjikakala hamo na banu baje bali mu mwela muje kumwakele kuyoya.
12 Mwela wange wa kukala banaushimbula na kunjinyekawoNgwe tenti ya kanyungi.
Njineteka kuyoya kwange ngwe muka-kutonga uje eteka nanga,Anjiteta ngwe bwanda buje buli ku mamaneselelo a cizalo cibali na kutonga.
Kushwa mutondo kutwala butsiki, uli na kutwalelelaho kunjimanusula.
13 Njili na kulisimpisa yange babenya kweta mutondo.
Ali na kutwalelelaho kupokozola bitsiya byange byoshe ngwe ndumba.
Kushwa mutondo kutwala butsiki, uli na kutwalelelaho kunjimanusula.
14 Njili na kutwalelelaho kuteta ngwe kambyasa nambe cimpolyo.*
Njili na kutwalelelaho kuningita ngwe liyembe.
Mesho ange anajuka kutala kwilu. Njendekele ngwange:
‘Obe Yehova, njili mu bukalu bwakama,Pwa mukwasi wange!’
15 Bika binjasa kwendeka?
Nendeka nange na kulingako bimo.
Njenda mu kulikehesa, myaka yoshe ya kuyoya kwangeMwafwa ya bukalu bwange bwakama.
16 ‘Obe Yehova, munu woshe ayoya mwafwa yebi byuma,*Co muli bikebyo, mukemwo muli nzili yange ya kuyoya.
Unjilingisa njilikangule lalo na kunyungilila kuyoya kwange.
17 Tala! Kutubakana kukala mu kwoloka, njakele mu busiwa bwakama,Oloni mwafwa ya kunjizema,Wanjinyungililile mangana keti njiwile mu bwina bwa kunyonga.
Unombila bubi bwange bwoshe kunima yobe.*
18 Mwafwa Cihilo* kucasa kukwana bumpau,Kutsa kucasa kukushangazala.
Baje basikumuka mu bwina kubasa kulabelela kulongwa kwobe.
19 Banu ba kuyoya basa kukushangazala,Ngwe munjasa kulingila yange lelo.
Cisemi wa munalume asa kulongesa bana bendi bya kulongwa kwobe.
20 Obe Yehova, njobole,Co twimba myaso yange na bisanzi bya mikoleKu njibo ya Yehova, matangwa oshe a kuyoya kwetu.’”
21 Co Isaya wendekele ngwendi: “Neneni likende lya bikuyu bya kuma mwakulisate ha liute lyendi mangana akanguke.”
22 Hezekiya wehwile ngwendi: “Cizibukiso muka cimwesa ngwaco njikanduka ku njibo ya Yehova?”
Majwi a kwinikila
^ Hamo ebi bindendelo bakele na kubipangesa mu kutanda simbu, ngwe mubakapangesela kalikina ka kutandesa simbu.
^ Nambe “Sheo,” kulumbununa cihilo ca cifwisa ca banu boshe. Taleni Majwi Abanalumbununa.
^ “Jah” inapu kubatwila lizina lya Yehova.
^ Nambe hamo “limenekela.”
^ Kulumbununa, majwi a Njambi na bilinga byendi.
^ Nambe “Unatundisa bubi bwange bwoshe ha mesho obe.”
^ Nambe “Sheo,” kulumbununa cihilo ca cifwisa ca banu boshe. Taleni Majwi Abanalumbununa
