Isaya 40:1-31
40 Njambi yeni nendeka ngwendi: “Zembelekeni banu bange, bazembelekeni.
2 Endekeni na Jelusalema mu ngozi,*Na kumuleka ngweni cipangi ca kumusindiya cinahu,Mulonga wendi banaufwete.
Natambula mu kushula fweto* ya bubi bwendi bwoshe kuli Yehova.”
3 Kuli lijwi lya umo ali na kutambeka mu mambo ngwendi:
“Bwaheseni* ngila ya Yehova!
Bwaheseleni Njambi yetu tapalo ya kusungama mu mambo.
4 Binema byoshe babilundule,Co minkinda yoshe na malundu oshe babinyekumune.
Libu lya mandunga-mandunga balilambese,Co libu lya mihanga-mihanga lipwe cana.
5 Bumpau bwa Yehova bukasholoka,Co banu boshe bakabumona,Mwafwa kanwa ka Yehova kanendeka.”
6 Tolilila! Kuli umo ali na kwendeka ngwendi: “Tambeka!”
Mukwabo ehula ngwendi: “Bika binjitambeka?”
“Banu boshe banapu ngwe mwila wa kutonola.
Cizemo cabo cije kucesi kutenguluka cinapu ngwe bintemo bya mu shwata.
7 Mwila wa kutonola uma,Bintemo bijujwama,Mwafwa Yehova nahwiminaho muku* wendi.
Cili bene, banu bapwa lika ngwe mwila wa kutonola.
8 Mwila wa kutonola uma,Bintemo bijujwama,Oloni lijwi lya Njambi yetu likalako myaka yoshe.”
9 Kanduka ha munkinda waulaha,Obe munakazi unenela Siyone muzimbu waubwa.
Tambekela na nzili,Obe munakazi unenela Jelusalema muzimbu waubwa.
Tambekela, keti uzibe lyoba.
Leka binganda bya Juda ngwobe: “Njambi yeni ou.”
10 Tala! Mwata Wahakamwa ya Byoshe Yehova aija na nzili,Co ayula na liboko lyendi.
Tala! Ikeye akana cikandelela,Co nalibwahesela kwana munu fweto.
11 Akanyunga butanga bwendi ngwe kanyungi.
Akakungulwila hamo bana ba bimanga na liboko lyendi,Na kubambata ha nulo yendi.
Akatwamenena mwamubwa baje bali na kujamwesa.
12 Iya napeselesa mema mu liboko lyendiNa kuseteka melu na mbanda ya liboko* lyendi?
Iya nakungulwila likungu lya ha lifuti-libu mu cipeselesoNambe kupeselesa minkindaNa malundu ha bipeseleso?
13 Iya napeselesa* sipilitu ya Yehova,Co iya asa kupwa muka-kumunangula mangana amulongese?
14 Njambi wehwile iya mangana azibisise?
Iya akamulongesa ngila ya kwakula mwamubwa,Nambe kumulongesa mangana,Nambe kumumwesa ngila ya kuzibisisa kwa busunga?
15 Tala! Baka-mafuti banapu ngwe limbase lindweka mu buleki,Co wabamona ngwe likungu lili ha cipeseleso.
Tala! Akajundula mañanda ngwe likungu.
16 Nameme Lebanoni kuyapwilemo, co kuyasa kulingisa tuhya tutwaleleleho kushukuma.*
Tusitu bayo nabo kubapumo kubana kupwa mulambu wa kwenyeka.
17 Baka-mafuti wabamona ngwe kubakeleko,Wabamona ngwe byuma byangoco, bya kujeneka seho.
18 Iya iwasa kwesekesa na Njambi?
Cuma muka ciwasa kwendeka ngwobe cinalifu nendi?
19 Ngangula amunga kamponya,Muka-kufula amusalimba na goldi,Na kufula malyenge a siuva.
20 Angula muti mangana awane kupwa bwana,Muti uje kuubolo.
Atonda-tonda ngangula wa mutongweMangana ashonge kamponya uje kandumuka.
21 Kuma kuuzibuka ndi?
Kuwazibile ndi?
Kuma kubakulekele kushwa ku mashangumukilo ndi?
Kuwazibisisile kushwa habajalelele lubula lwa lifuti-libu ndi?
22 Kuli umo wakala helu lya lifuti-libu lije lyapwa lya mubundungulu,Co banu bakalamo banapu ngwe bimbimba.
Ajangumuna melu ngwe nanga ya kuhwalala,Na kuwajangumuna ngwe tenti mwakukala.
23 Akehesa bamyata bakama kubapwisa banu bangocoNa kulingisa maako* ba ha lifuti-libu bapwe banu ba kujeneka seho.
24 Banapu ngwe bimbuto bije bibanakunu ololo,Bibanakubu ololo,Co nsina yabyo icishimbika lika mizi mu libu,Lihunzi lihuwa, co byuma,Co lihunzi libipekumuna ngwe bishati.
25 Wakujela nendeka ngwendi: “Iya iwasa kunjesekesa nendi ngwobe tunapu hamo?”
26 “Kenga mwilu mangana umone.
Iya natanga ebi byuma?
Ikeye atwamenena cibunga cabyo na kubitanda imo na imo,Byoshe abisana ha mazina.
Mwafwa ya nzili yendi yakama manene ije ikomokesa,Naimo yahi izimbala.
27 Obe Jakobu, obe Isalele, bika biuli na kwendekela ngwobe‘Yehova kamono ngila yange,Co Njambi kesi na kunjakula mwamubwa’?
28 Kuma kuuzibuka ndi? Kuwazibile ndi?
Yehova, Ishamatanga wa lifuti-libu lyoshe wapwa Njambi myaka yoshe.
Kesi kujuka nambe kuzeya.
Wahi asa kutondesesa* kuzibisisa kwendi.
29 Akana nzili baje banajukaNa kukanyamesa baje kubesi na nzili.
30 Banike ba banalume bakajuka na kuzeya,Co bakwenje bakatanuka na kuwa,
31 Oloni baje bakulahela Yehova bakakala lalo na nzili.
Bakapulula na mambaba ngwe bingonga.
Bakashatuka, oloni kubakazeye,Bakenda, oloni kubakajuka.”
Majwi a kwinikila
^ Nambe “Zembelekeni Jelusalema.”
^ Nambe “Natambula lubali fweto.”
^ Nambe “Jeleseni.”
^ Nambe “sipilitu.”
^ Bulaha bwa kutunda ku munye wakama kweta ku kamunye kakandondo nga liboko linajangumuka. Taleni Biñanda bya Kushongo ha B14.
^ Nambe hamo “nazibisisa.”
^ Nambe “Lebanoni kuyesi na bikuni bya kupwamo.”
^ Nambe “baka-kuyula.”
^ Nambe “kuzibisisa.”
