Isaya 43:1-28
43 Ebi bikebyo byanendeka Yehova,Ishamatanga yobe, obe Jakobu, Uje wakumungile obe Isalele, ngwendi:
“Keti uzibe lyoba, mwafwa njakusokola.
Njakusana ha lizina lyobe.
Unapu wange.
2 Muwita mu mema, njikala nobe,Co muwita mu bindonga, kubikungumbula.
Muwenda mu tuhya, kutukwenyeka,Nameme milangi yatwo kuikubabula.
3 Mwafwa yange Yehova Njambi yobe,Wakujela wa Isalele, Mwobole wobe.
Njinana Ijipiti kupwa ndando ya kukupatula,Njinana Ithopia na Seba mangana njikupatule.
4 Mwafwa wapwile u wa seho mu mesho ange,Njakusingimikile, co njakuzema.
Ngeci, njana banu kupwa ndando ya kukupatulaNa mafuti mangana njipatule kuyoya* kwobe.
5 Keti uzibe lyoba, mwafwa njili hamo nobe.
Njinena bana* bobe kutundilila ku butuhukilo bwa litangwaNa kumikungulwila hamo kutundilila ku bulahukilo bwa litangwa.
6 Njileka kunto ngwange, ‘Njanebo!’
Na kuleka mbwela ngwange, ‘Keti ulitulikilebo.
Nena bana bange ba banalume kutunda kulako, na bana bange ba banakazi kutunda ku mamaneselelo a lifuti-libu.
7 Nena woshe ibasanesa lizina lyange,Uje injatangele mangana njitambule bumpau,Uje injamungile na kutanga.’
8 Nena banu baje bapwa tupuputwa, nameme bali na mesho,Na baje bapwa tusinda-matwi, nameme bali na matwi.
9 Baka-mafuti boshe balikungulwile mu mwela umo,Na miyati ya banu ilikungulwile hamo.
Iya hakati kabo asa kwendeka ebi byuma?
Indi kuma basa kutuleka byuma byakulibanga?*
Banene bakaleho babo mangana bamwese ngwabo banasungamesa,Bazibe na kwendeka ngwabo, ‘Bunapu busunga!’”
10 Yehova nendeka ngwendi “Mu bakaleho bange,Eyo, yeni ngamba yange injinangula,Mangana munjizibuke na kunjikulahelaNa kuzibuka ngweni kunjesi kutenguluka.
Kukwesi Njambi ibamungile simbu kanda njikaleko,Co munima yange wahi nakalako.
11 Yange, yange bene Yehova, co kukwesi mwobole weka kubanga yange.”
12 Yehova ngwendi: “Yange njendekele na kwobola na kwambululaHa simbu kukwakele njambi weka mukati keni.
Ngeci, mu bakaleho bange, co yange Njambi.
13 Kunjesi kutenguluka,Co wahi asa kunjinyeka cuma cimo mu liboko.
Nga njilinga cuma cimo, iya asa kunjibindika?”
14 Yehova, Muka-kumisokola, Wakujela wa Isalele ngwendi:
“Mwafwa yeni, njikatuma mbunga ya maswalale ku Babiloni mangana bakasokole tupateso twoshe ku bikolo,Co baKaudiya bakalila mwafwa ya kayando oku bali mu mato abo.
15 Yange Yehova, Wakujela weni, Uje watangele Isalele, yange Mwene yeni.”
16 Ebi bikebyo byanendeka Yehova,Uje atuba ngila ha kalunga-ndongaNa kutuba ngila nameme ha mankimba,
17 Uje akatuhwisa litemba lya nzita na kabalu,Na mbunga ya maswalale na baka-kulwa nzita ba nzili, ngwendi:
“Bakalala hasi, co kubakenduka.
Bakabazima ngwe mukole wa ndeya uje uli na kushukuma.”
18 Keti mwanuke byuma bya kunima,Co keti mwake mbunge ku byuma bya kusañulu.
19 Taleni! Njili na kulinga cuma caciha,Nameme bene hano cili na kusholoka.
Kuma kumwacinangukile ndi?
Njituba ngila mu mamboNa kulingisa bindonga bite mu mambo.
20 Tusitu ba mu shwata bakanjisingimika.
Bimbanje na banyamalanda bakanjisingimika,Mwafwa njilingisa mu mambo mukale mema,Njilingisa bindonga bite mu mambo,Mangana banu bange banjinangula banwe,
21 Banu banjalitangeleleNgwange banjishangazale.
22 Oloni kuwatambekele kuli yange kulomba bukwasi, obe Jakobu,Mwafwa unashulila, obe Isalele.
23 Kuwanjanene bimanga kupwa bwana bwobe bwa mutunu bwa kwenyeka,Nameme kunjana bumpau na milambu yobe.
Kunjakusindiiye ngwange unjane bwana,Nameme kukwaka mu cikela ngwange unjane isense ya kutoka.
24 Kuwanjilandelele kalamu* na bimbongo byobe,Co kunjajaukile na mazi a milambu yobe.
Oloni unanjilemuwisa na bubi bwobeNa kunjijukisa na milonga yobe.
25 Yange njili na kuzimangana milonga yobe* mwafwa ya lizina lyange,Co kunjanuka bubi bwobe.
26 Njanukise, tulisompese,Endeka biuzibuka ha ñanda ei mangana umwese ngwobe unasungamesa.
27 Kukulwila yobe wakulibanga walingile bubi,Co baka-kukwendekelako* bananjitengulukila.
28 Ngeci, njilingisa bamyata ba ku mwela wa kujela bapwe ba kujwala,Co njilingisa Jakobu bamunyongeseNa kulingisa Isalele bamutuka-tuke.
Majwi a kwinikila
^ Nambe “mwonyo.”
^ Lijwi na lijwi “mbuto.”
^ Hamo kutalesa ku byuma bilibanga kwija.
^ Lihongo lya lwengo lwalubwa.
^ Nambe “bilinga byobe bya kutengulukila.”
^ Hamo kulumbununa balongesi ba lishiko.
