Isaya 44:1-28
44 “Ngeci, tolilila obe ngamba yange Jakobu,Obe Isalele, injinangula.
2 Ebi bikebyo byanendeka Yehova,Uje wakutangele na kukumunga,Uje nakukwasa kushwa mwimo lya noko.*
Nendeka ngwendi: ‘Keti uzibe lyoba, obe ngamba yange Jakobu,Obe Jeshulani,* injinangula.
3 Mwafwa njana mema uje natsi lihwila*Na kwitisa bana ba bindonga ha libu lya kuma.
Njitila sipilitu yange ha bana* bobeNa kubezikisa batekulwila bobe.
4 Co bamena ngwe mwila wa kuzibuluka,Ngwe miti ya popula ije ili ku bana ba bindonga.
5 Umo endeka ngwendi: “Nji wa Yehova.”
Mukwabo alisanesa lizina lya Jakobu,Wekaco asoneka ha liboko lyendi ngwendi: “Nji wa Yehova”Na kushangumuka kulisanesa lizina lya Isalele.’
6 Ebi bikebyo byanendeka Yehova,Mwene ya Isalele, Muka-kumusokola, Yehova wa maswalale, ngwendi:
‘Yange wa kulibanga na wa mamaneselelo.
Kukwesi Njambi weka, kubanga yange.
7 Iya nalifu nange?
Akumbulule na kulumbununa na kunjimwesa bukaleho!
Endeke byuma bili na kwijaNa byuma bilingiwa ololo,Ngwe munjinalingila yange kushwa hanjalingisilile banu ba kusañulu bakaleko.
8 Keti mulishoshomwene,Keti mulijujukile mwafwa ya lyoba.
Kuma kunjalekelele cimweja umo na umo weni ndi?
Yeni munapu bakaleho bange.
Kuma kuli Njambi weka ndi?
Embwe, kukwesi weka uje wapwa limanya. Naumo wahi injizibuka.’”
9 Boshe baje bakashongo tumponya, bapwa bangoco,Co tumponya babo baje babamona kupwa ba seho kubabakwasa.
Byahi bibakamono,* co lalo byahi bibazibuka, ngwe mwa bakaleho babo.
Ngeci, baje banabapanga bakaziba shwamwa.
10 Iyajo apanga njambi nambe kufula kamponya wa cikuboUje kasa kumukwasa?
11 Taleni! Baje balikwatasana nabo baziba shwamwa!
Bangangula banapu banu bangoco.
Boshe balikungulule na kwimana.
Boshe baziba lyoba na kushauka.
12 Muka-kufula afula cikubo ha manungu a tuhya na cikwata* cendi.
Acifula na bisando,Acifula na liboko lyendi lya nzili.
Co atsa njala na kuzeya,Kanu mema, co ajuka.
13 Muka-kushonga aseteka citi na mukole wa kusetekesa na kusonaho na mukundu cuma cashaka kushonga.
Acicokola na shinjo na kufundikaho na cikwata ca kufundikisa.
Acishonga mu cifwa ca munuNa kucibwahesa ngwe munuMangana acake mu njibo.*
14 Kuli munu ali na cipangi ca kuteta miti ya sida.
Angula cifwa cimo ca muti, muti wa oke,Co awecela ukole mukati ka miti ya mu shwata.
Akuna muti wa lora, co nyonzi iukolesa.
15 Co munu acibwekesa tuhya.
Ambatako mbazubwila imo na kubweka tuhya twa kwota,Abweka tuhya na kwocaho likende.
Oloni ashongaho lalo njambi na kumulemesa.
Ashonga kamponya na kukatsikamena.
16 Mbazubwila imo aibwekesa tuhya,Ocaho situ yalya, co akuta.
Co lalo ota tuhya na kwendeka ngwendi:
“Ewa! Njili na kuziba yuku munjili na kukenga milangi ya tuhya.”
17 Oloni mbazubwila inasalaho aipanga njambi, ashongaho kamponya.
Amutsikamena na kumulemesa.
Alombela kuli ikeye na kwendeka ngwendi:
“Njobole, mwafwa yobe njambi yange.”
18 Byahi bibazibuka, byahi bibazibisisa,Mwafwa mesho abo banawafwiki, co kubasa kumona,Bimbunge byabo kubyapwile bya kuzibisisa.
19 Naumo wahi asinganyekesesa mu mbunge yendiNambe ali na mangana nambe kuzibisisa, uje endeka ngwendi:
“Mbazubwila imo njinaibwekesele tuhya,Co ha manungu ayo njinoceleho likende na kwocaho situ ya kulya.
Kuma mbazubwila inasalaho njinapande kuipanga cuma ca bunyengwe ndi?
Kuma njinapande kulemesa citi* ndi?”
20 Alya lito.
Mbunge yendi ya kungumuka imungumuna.
Kasa kulyobola nambe kwendeka ngwendi:
“Kuma cuma cili mu liboko lyange lya cilyo keti ca kujeneka seho ndi?”
21 “Anuka ebi byuma, obe Jakobu. Byanuke, obe Isalele,Mwafwa u ngamba yange.
Njakumungile, co u ngamba yange.
Obe Isalele, kunjikwibala.
22 Njizimangana milonga yobe ngwe njalingi ya kufwika na lishelwa.
Njizimangana bubi bwobe ngwe njalingi bwa kufwika na lishelwa lya kuhima.
Iluka kuli yange, mwafwa njikusokola.
23 Tambekeni mu kubwahelela, eni melu,Mwafwa Yehova nalingiko bimo.
Tambekeni mu kulisamba, eni masima a lifuti-libu.
Tambekeni mu kubwahelela, eni minkinda,Neni bishwata na miti yoshe yakala muli yeni.
Mwafwa Yehova nasokola Jakobu,Co amwesa bulemu bwendi hali Isalele.
24 Ebi bikebyo byanendeka Yehova, Muka-kukusokola,Uje wakumungile muwakele mwimo.
Nendeka ngwendi: “Yange Yehova, uje watangele byuma byoshe.
Njajangumwine melu likalyangeNa kujangumuna lifuti-libu.
Iya wakele nange?
25 Njitanganesa bizibukiso bya baka-kwendeka byuma byangoco,*Co yange njilingisa baka-kumikiya balinge ngwe bilema.
Yange njitanganesa baka-manaNa kulingisa mangana abo apwe bulema.
26 Yange njilingisa lijwi lya ngamba yange lilishulisilileNa kushulisilila byuma bya kulutwe bibanendeka tutumwa bange.
Yange njendeka hali Jelusalema ngwange, ‘Banu bakatungamo,’Na kwendeka ha binganda bya Juda ngwange, ‘Bakabitungulula,Co njikatungulula bingundu byendi.’
27 Yange njileka nzinga ngwange, ‘Uma,Co njumisa bindonga byobe byoshe.’
28 Yange njendeka hali Sailasi ngwange, ‘Kanyungi kange,Co akalinga byoshe binjinayongola.’
Yange njendeka hali Jelusalema ngwange, ‘Bakamutungulula,’Na kwendeka ha tempele ngwange, ‘Lubula lwobe bakalujala.’”
Majwi a kwinikila
^ Nambe “kushwa hawasemukilile.”
^ Kulumbununa “Wakusungama,” lizina lya bulemu lya Isalele.
^ Nambe “njitila mema ha libu lya kuma.”
^ Lijwi na lijwi “mbuto.”
^ Kulumbununa, tumponya.
^ Nambe “moko ya kulikondobeka.”
^ Nambe “tempele.”
^ Nambe “citi ca kuma.”
^ Nambe “tupolofweto ba makuli.”
