Isaya 45:1-25
45 Ebi bikebyo binjinendeka yange Yehova kuli Sailasi, wakubwabesa wange,Uje injinakwatelela ku liboko lyendi lya cilyoMangana njifungulule mafuti ku mesho endi,Njinyeke bimyene nzili,Na kushokolola bikolo bya mapito abali ku mesho endi,Mangana bikolo bisale casi, ngwange:
2 “Njikatwama kulutwe lwobe,Co njikasalamesa malundu.
Njikasanyozola mapito a kopa,Na kupokozola tupateso twa bikubo.
3 Njikakwana byuma bya seho bije bili mu lisusulunguNa byuma bya seho bya kushweka bije bili mu myela yange ije inalishweke,Mangana uzibuke ngwobe yange Yehova,Njambi ya Isalele, uje akusana ha lizina lyobe.
4 Mwafwa ya ngamba yange Jakobu, mwafwa ya Isalele injinangula,Njikusana ha lizina lyobe.
Njikwana lizina lya bulemu, nameme kuwanjizibukile.
5 Yange Yehova, co kukwesi weka.
Kukwesi Njambi weka, kubanga yange.
Njikukanyamesa, nameme kuwanjizibukile,
6 Mangana banu boshe,Kutunda ku butuhukilo bwa litangwa kuya ku bulahukilo bwalyo,Bazibuke ngwabo kukwesi weka, kubanga yange.
Yange Yehova, co kukwesi weka.
7 Njinena ceke na kunena lisusulungu,Njinena kwoloka na kunena bukalu.
Yange Yehova, njilinga byuma byoshe ebi.
8 Melu anyokese kusungama ngwe nyonzi,Mashelwa akopotole kusungama.
Lifuti-libu lyashame na kwima kwoboka,Na kulingisa kusungama kumene.
Yange Yehova njabitanga.”
9 Lubinda lwa uje alwisa* Uje wamutangele,*Mwafwa napu lika mbazubwila ya bumaHakati ka bimbazubwila bikwabo bya buma bije bili hasi.
Kuma buma bwasa kuleka Muka-kumunga ngwabwo: “Bika biuli na kumunga?”
Nambe cuma ciunapanga kuma casa kwendeka ngwaco: “Kuwesi na maboko” ndi?
10 Lubinda lwa uje aleka cisemi wa munalume ngwendi: “Mwana mukajo iunakiti?”
Na kuleka munakazi ngwendi: “Bikajo biukita?”*
11 Ebi bikebyo byanendeka Yehova, Wakujela wa Isalele, Uje wamumungile, ngwendi:
“Kuma wasa kulinga bimata nange ha byuma bija kulutweNa kunjileka byakulinga ku bana bange na bipangi bya maboko ange ndi?
12 Njatangele lifuti-libu na kutanga munu mangana akaleho.
Njajangumwine melu na maboko ange,Co njikashiki cibunga cawo coshe ca maswalale.”
13 Yehova wa maswalale ngwendi: “Njinemika munalume mu kusungama,Co njisungamesa bingila byendi byoshe.
Ikeye atunga nganda yangeNa kupatula bafunge bange kwa kujeneka fweto nambe lizika-kanwa.”
14 Yehova nendeka ngwendi:
“Profiti* ya Ijipiti na mingoso* ya Ithopia na baSabeya, banalume ba kutunuka,Bakaija kuli yobe na kupwa bobe.
Bakenda munima yobe mu malyenge.
Bakaija kuli yobe na kukutsikamena.
Bakendeka kuli yobe mu lilombelo ngwabo, ‘Cili bene Njambi ali nobe,Co kukwesi weka. Kukwesi Njambi weka.’”
15 Cili bene u Njambi uje kesi kujombolola bingila byendi byoshe,Obe Njambi ya Isalele, yobe wapwa Mwobole.
16 Baka-kupanga tumponya bakabazibisa shwamwa na kubashaula,Boshe bakaya oku banashauka.
17 Oloni Yehova akobola Isalele myaka yoshe.
Kumukazibi shwamwa nambe kushauka myaka yoshe.
18 Mwafwa ebi bikebyo byanendeka Yehova,Uje watangele melu, Njambi wa busunga,Uje wamungile lifuti-libu, Uje walitangele na kulizameka,Uje kalitangele lika ngoco,* oloni walitangele mangana hakale banu, ngwendi:
“Yange Yehova, co kukwesi weka.
19 Kunjendekelele mu mwela uje unalishweke, mu lifuti lya lisusulungu.
Kunjalekele bana* ba Jakobu ngwange,‘Njishakezekeni kwa kujeneka cimo cimuwana.’*
Yange Yehova, uje akendeka bya busunga na kwambulula bya kusungama.
20 Likungululeni mwije.
Njishweneni mubaboshe, yeni munatewe kuli baka-mafuti.
Byahi bibazibuka baje bakambata tumponya ba kushongaNa kulombela kuli njambi uje kasa kubobola.
21 Ambululeni muzimbu weni na kwendeka ñanda yeni.
Simutwiyeni mu kulikwatasana.
Iya wendekele cimweja ebi byuma kusañuluNa kubyambulula mu bisimbu bya kunima?
Kuma keti yange Yehova?
Kukwesi Njambi weka, kubanga yange,Kukwesi Njambi wa kusungama uje wapwa Mwobole, wahi, kubanga yange.
22 Tengulukileni kuli yange mangana mwoboke, yeni boshe mwakala ku mamaneselelo a lifuti-libu,Mwafwa yange Njambi, co kukwesi weka.
23 Njalisingi hali yange babenya.
Lijwi lyatuhuka mu kanwa kange lya busunga,Co kulilukamo. Njalisingi ngwange:
Mabuli oshe akanjitsikamena,Bindaka byoshe bikalisinga kupwa bya kulongwa kuli yange,
24 Co bikendeka ngwabyo, ‘Cili bene Yehova washula na kusungama kwa busunga na nzili.
Boshe baje banamulubalela bakaija ku mesho endi na shwamwa.
25 Bana* ba Isalele boshe bakalimwena ngwabo balingile mwamubwa kupangela Yehova,Co bakalishasha mwafwa yendi.’”
Majwi a kwinikila
^ Nambe “alinga bimata na.”
^ Nambe “wamumungile.”
^ Nambe “Bika bili na kukuzibisa mushongo wa kukita.”
^ Nambe hamo “Baka-kupanga.”
^ Nambe hamo “baka-mingoso.”
^ Nambe hamo “mangana lipwe lya mupulungwa.”
^ Lijwi na lijwi “mbuto.”
^ Nambe “Lisineni kunjishakezeka.”
^ Lijwi na lijwi “Mbuto.”
