Isaya 47:1-15
47 Shuluka utumame mu likungu,Obe muna Babiloni wa munakazi.
Tumama hasi hakujeneka litanda,Obe muna baKaudiya wa munakazi,Mwafwa banu kubakakutumbula lalo wamubotsi, uje ibali na kulela ngwe liyaki.
2 Ambata limanya lya kulolela bunga ulole bunga.
Tundisa nanga yobe ya ku mutwe.
Kambula mukanjo wobe na kuseza mendi mwangoco.
Jabuka bindonga.
3 Ukakala mutotototo.
Co ukaziba shwamwa.
Njikalinga shambandinga, co kukwesi munu akanjonowesa.*
4 “Uje atusokola,Lizina lyendi ikeye Yehova wa maswalale.
Ikeye Wakujela wa Isalele.”
5 Tumama oho kulu na kuya mu lisusulungu,Obe muna baKaudiya wa munakazi,Kubakakusana lalo Shukulu ya Bumwene wa Munakazi.*
6 Njalubalelele banu bange.
Njalingisile buswana bwange bujwale,Njanene banu bange mu liboko lyobe.
Oloni kuwabatetelele.
Nameme tukulukazi wabatwikile joko ya kulema.
7 Wendekele ngwobe: “Njitwalelelaho kupwa Shukulu wa Munakazi* myaka yoshe.”
Kuwakele mbunge ku byuma ebi,Kuwasinganyekesesele mubikafwila ku mamaneselelo.
8 Ngeci, tolilila, obe muka-kuzema senga,Yobe kuwesi mu bushonde, yobe wendeka mu mbunge yobe ngwobe:
“Yange lika, kukwesi weka.
Kunjipu fwile.
Kunjikakalaho mu busiwa bwa kutsisa bana.”
9 Oloni ebi byuma bibali bikaija hali yobe mu kukasumuna, mu litangwa limo:
Kutsisa bana na kupwa fwile.
Bikaija bene hali yobeMwafwa unapanda manene na kwelema manene bakweni.
10 Wakulahelele bilinga byobe byabibi.
Wendekele ngwobe: “Naumo wahi anjimona.”
Mana obe na mangana obe bikebyo byakungumwine,Co uli na kwendeka mu mbunge yobe ngwobe: “Yange lika, kukwesi weka.”
11 Oloni bukalu bukakwizila,Co bumbanda bwobe bwa kulikikiya kubukapanga.
Bukalu bukakuwana, co kuukasa kulihengabwo.
Kunyonga kwa kukasumuna kuje kanda umoneho, kukaija hali yobe.
12 Ngeci, twalelelaho na kwelema kwobe na kupanda kwobe,Bije biunondangana kushwa ku bumbanda bwobe,Hamo uwanaho bimo,Hamo utewesa banu.
13 Washulila mwafwa ya baka-kukunangula babangi.
Bemane oni bakwobole,Baje bakalemesa melu,* baje bakakenge bingongonosi,Baje bakalingi nga ngonde yatenama,Bakulongesa byuma bikwizila kulutwe.
14 Tala! Banapu ngwe bishati.
Tuhya tubenyeka.
Kubasa kulyobola* ku nzili ya mulangi.
Awa keti manungu a kwota,Co otu keti tuhya twa kwota.
15 Mukemwo mubakafwila baka-kushasheya bobe kuli yobe,Baje baunondangana nabo kushwa ku bumbanda bwobe.
Bakayebangela, umo na umo wabo akatalesela mwendi.*
Naumo wahi akakwobola.
Majwi a kwinikila
^ Nambe hamo “co kunjikaliwana na munu wa ngozi.”
^ Nambe “Mwene wa Munakazi.”
^ Nambe “Mwene wa Munakazi.”
^ Nambe hamo “Baje bakatepe melu; Baka-kutahesa bingongonosi.”
^ Nambe “kwobola myonyo yabo.”
^ Lijwi na lijwi “akaya ku mutambela wendi.”
