Isaya 48:1-22
48 Zibeni ebi byuma, eni bakunjibo ya Jakobu,Yeni mukalisanesa lizina lya Isalele,Yeni batekulwila ba Juda,*Yeni mukalisingi ha lizina lya YehovaNa kusana Njambi ya Isalele,Nameme kumwesi kulinga ngoco mu busunga na mu kusungama.
2 Mwafwa bakalisanesa lizina lya nganda ya kujelaNa kutonda bukwasi bwa Njambi ya Isalele,Uje lizina lyendi ikeye Yehova wa maswalale.
3 “Njamilekele laja byuma bya kunima.*
Byatuhukile mu kanwa kange,Co njamilingisile mubizibuke.
Njalingileko bimo mu kukasumuna, co byalingiwile.
4 Mwafwa njazibukile ngwange mu ba kutindibala.
Bisingo byeni bya kukola ngwe cikubo, co maholo eni a kukola ngwe kopa.
5 Njamilekele ebi byuma kunima.
Simbu kanda bilingiwe, njamilingisile mubizibe,Mangana keti mwendeke ngweni, ‘Tumponya betu bakebo babilingile,Tumponya betu ba kushonga na tumponya betu ba bikubo bakebo bendekele ngwabo bilingiwa.’
6 Munazibi byuma byoshe ebi na kulimwenabyo.
Kuma kumubyambulula ndi?
Kutunda hano, njimileka byuma byabiha,Mahungu a kunyunga aje kumwazibukile.
7 Ebi byuma bilingiwa hano bene, keti ngwabo hamo byalingiwile kunima,Byuma bije kanda muzibeho, simbu kanda litangwa lya lelo lyete,Mangana keti mwendeke ngweni, ‘Taleni! Tubizibuka na laja.’
8 Embwe kumwabizibile, kumwabizibukile,Co kunima matwi eni kuwazikukile.
Mwafwa njizibuka ngwange mu baka-kukwisa manene,Co banamitumbula ngwabo mu baka-kupokola mashiko kushwa ha kusemuka kweni.
9 Oloni njitulisa butenu bwange mwafwa ya lizina lyange,Njilibindika mwafwa ya bumpau bwange,Co kunjiminyongesa.
10 Taleni! Njinamijelesa, oloni keti ngwe mubakajelesela siuva.
Njinamyeseka* mu lutengo lwa kayando.
11 Cili bene njilingako bimo mwafwa ya lizina lyange,Njasa kwecelela bati lizina lyange balijwalese?
Naumo wahi injana* bumpau bwange.
12 Njitolilile obe Jakobu, obe Isalele injinasana.
Kunjesi kutenguluka. Yange wa kulibanga, co lalo yange wa mamaneselelo.
13 Liboko lyange likelyo lyajalele lubula lwa lifuti-libu,Co liboko lyange lya cilyo lyajangumwine melu.
Munjibisana, byoshe bimana.
14 Likungululeni mubaboshe na kutolilila.
Iya hakati keni nendeka ebi byuma?
Yehova namuzeme.*
Alinga byoshe byashaka kuli Babiloni,Co liboko lyendi lilwisa baKaudiya.
15 Yange bene njinendeka na kumusana.
Njinamunene, co byalinga bibwaha.
16 Shweneni muyehi nange muzibe ebi byuma.
Kushwa ku mashangumukilo kunjendekelele ku bushweke.
Kunjinakala, kushwa ha simbu ibyalingiwile.”
Hanwoni Mwata Wahakamwa ya Byoshe Yehova nanjitumu na* sipilitu yendi.
17 Yehova, Muka-kumisokola, Wakujela wa Isalele ngwendi:
“Yange Yehova, yange Njambi yeni,Uje amilongesa mangana muwane bukwasi,*Uje amitwamenena mu ngila mumunapande kwenda.
18 Nga mutolilila mwamubwa ku mashiko ange,Kwoloka kweni kupwa ngwe ndonga,Co kusungama kweni kupwa ngwe mankimba a kalunga-ndonga.
19 Bana* beni bapwa babangi ngwe mushekesheke,Co batekulwila beni bapwa ngwe binona byawo.
Lizina lyabo kubalizimangana nambe kulinyongesa ku mesho ange.”
20 Tundeni mu Babiloni!
Teweni kuli baKaudiya!
Tambekeni ou mutambi mu kubwahelela! Wambululeni!
Lekeniko baje bali ku mamaneselelo a lifuti-libu.
Endekeni ngweni: “Yehova nasokola ngamba yendi Jakobu.
21 Kubatsile lihwila mwabatwamenenene mu bimambo.
Wabatuhwisilile mema mu limanya,Watabwile limanya na kulingisa mema akopotokemo.”
22 Yehova ngwendi: “Banu bababi kubakala mu kwoloka.”
Majwi a kwinikila
^ Lijwi na lijwi “mwatunda ku mema a Juda.”
^ Lijwi na lijwi “byakulibanga.”
^ Nambe “Njinamilula.” Nambe hamo “Njinamyangula.”
^ Nambe “injilipangela nendi.”
^ Kulumbununa, Sailasi.
^ Nambe “hamolika na.”
^ Nambe “bubwa.”
^ Lijwi na lijwi “Mbuto.”
