Isaya 49:1-26
49 Eni mañanda, njitolilileni,Neni mafuti a kulako, njitolilileni.
Yehova wanjisanene simbu kanda njisemuke.*
Watumbwile lizina lyange te njicili mwimo lya nana.
2 Walingisile kanwa kange kapwe ngwe mukwale wa kubambuka.
Wanjishwekele mu munzinze wa liboko lyendi.
Wanjipwisile ngwe mukili ubanotola.
Wanjishwekele mu ngonga yendi ya mikili.*
3 Wanjilekele ngwendi: “Obe Isalele, u ngamba yange,Co njisholola bulemu bwange kwitila muli yobe.”
4 Oloni njendekele ngwange: “Njalisini ngoco kuundangana.
Njapangesele nzili yange ku byuma bya kujeneka seho, co inai mwangoco.
Oloni Yehova ikeye anjisompa,*Fweto* yange ili kuli Njambi yange.”
5 Hanwoni Yehova, uje wanjipwisile ngamba yendi mwanjimungile mwimo lya nana,Nanjileke ngwendi njilwise Jakobu kuli ikeye,Mangana Isalele akungulukile kuli ikeye.
Njitambula bumpau kuli Yehova,Co Njambi yange apwa nzili yange.
6 Wendekele ngwendi: “Keti u ngamba yange likaUje akatula miyati ya JakobuNa kwilwisa bana ba Isalele baje banoboka.
Njinakupwisa lalo ceke ca baka-mafuti,Mangana kwobola kwange kwete ku shongo ya lifuti-libu.”
7 Ebi bikebyo byanendeka Yehova, Muka-kusokola Isalele, Wakujela wa Isalele, kuli uje ibanombwanesa, uje ibanazindi banu, ngamba ya baka-kuyula ngwendi:
“Bimyene bakamona na kwimana,Co bamyata bakatsikamaMwafwa ya Yehova uje wapwa wa kulongwa,Wakujela wa Isalele uje nakwangula.”
8 Yehova ngwendi:
“Njakukumbulwile mu simbu ya kutetela,Co njakukwasele ha litangwa lya kwobola.
Njatwaleleleleho kukunyungilila mangana njikwane kupwa cishimbikiya* ca banu,Mangana ubwahese lifuti,Na kubalingisa base kuswana buswana bwabo buje bwapwa ngundu,
9 Mangana uleke mapanditi ngwobe, ‘Tuhukeni!’
Na kuleka baje bali mu lisusulungu ngwobe, ‘Lishololeni!’
Bakalila kumukulo wa bingila,Bulilo bwabo bukakela kumukulo wa bingila byoshe bije binasheke.*
10 Kubakatsi njala nambe kuziba lihwila,Kushaluka manene nambe litanya kubikabababula.
Mwafwa uje nabatetela akabatwamenena,Co akabatwamenena ku tubwelubwelu twa mema.
11 Njikalingisa minkinda yange yoshe ipwe ngila,Co bitapalo byange byoshe bikalunduka.
12 Taleni! Aba banu batunda kulako,Bamo batunda ku kunto na ku bulahukilo bwa litangwa,Bakwaboco batunda ku lifuti lya Sinimu.”
13 Tambekeni mu kubwahelela eni melu, co bwahelela obe lifuti-libu.
Minkinda ibwahelele na kutambeka mu kubwahelela.
Mwafwa Yehova nazembeleka banu bendi,Natetela banu bendi ba kuyanda.
14 Oloni Siyone watwaleleleleho kwendeka ngwendi:
“Yehova nanjiyengula, Yehova nanjibala.”
15 Kuma munakazi asa kwibala munendi uje acijamwa,Nambe kujeneka kuzibila mema ku mbunge munendi wa mwimo lyendi ndi?
Nameme aba banakazi bebala, yange kunjikwibala.
16 Tala! Njinacakula lizina lyobe mu maboko ange ngwe ha limanya.
Bibumbe byobe bili kulutwe lwange simbu yoshe.
17 Bana bobe beluka bwasi-bwasi.
Baje bakupujwile na kukubiisa bakakutewa.
18 Andula mesho obe na kutala kwoshe.
Boshe bali na kulikungulula.
Bali na kwija kuli yobe.
Yehova ngwendi: “Ngwe omwo njapwa wa kuyoya,Boshe ukabazala ngwe byuma bya kulicakeya,Co ukalicakeyabo ngwe mwakalicakeya shombolwa.
19 Nameme myela yobe baibiisile na kuipwisa bingundu, co lifuti lyobe lyabihile,Hano banu bakalamo libakehela manene,Co baje bakulehwile bakala kulako.
20 Ukaziba bana baje basemukile muwakele mu busiwa bendeka ngwabo,‘Ou mwela unatukehela manene.
Tubwaheseleniko mutamba wa kukala mangana tukale bene muno.’
21 Co ukalyendekesa mu mbunge yobe ngwobe,“Iya ishe yaba bana?
Mwafwa nji munakazi uje natsisa bana, na kupwa ngwe mumba.
Njili mu bufunge, co lalo nji lipanditi.
Iya nabalele?
Taleni! Njasalele likalyange,Co aba banoni banatundu kuli?”
22 Yehova Mwata Wahakamwa ya Byoshe ngwendi:
“Tala! Njikajundwila mafuti liboko lyange,Na kujundwila miyati ya banu cimweso* cange.
Bakanena bana bobe ba banalume mu maboko* aboNa bana bobe ba banakazi ha bitsili byabo.
23 Bimyene bakakunyunga,Co bana babo ba banakazi bakapwa bindezi bobe.
Bakakutsikamena oku banakulamaNa kulyasa likungu lya ku mendi obe,Co ukazibuka ngwobe yange Yehova.
Baje banjikulahela kubakazibi shwamwa.”
24 Kuma baje babanafungulula basa kubatundisa kuli munalume wa nzili,Nambe bafunge kuma basa kubamena kuli muka-kulyatelela ndi?
25 Oloni Yehova ngwendi:
“Nameme banu banafungulula munalume wa nzili bakabatundisa kuli ikeye,Co baje banafungulula muka-kulyatelela, bakabamena.
Njilwisa uje akulwisa,Na kwobola bana bobe.
26 Njikalingisa baje bakuyandesa balye situ ya mibila yabo,Maninga abo akabapendesa ngwe binyu bya kupwelelela.
Co banu boshe bakazibuka ngwabo yange Yehova,Mwobole wobe na Muka-kukusokola,Njambi wa nzili wa Jakobu.”
Majwi a kwinikila
^ Lijwi na lijwi “te njicili mwimo.”
^ Nambe “mu lyumato.”
^ Nambe “Yehova ikeye anjakula mwamubwa.”
^ Nambe “Cikandelela.”
^ Lijwi na lijwi “cikumiiyo.”
^ Nambe hamo “malundu ha kujeneka bimena.”
^ Nambe “cisini ca cimweso.”
^ Lijwi na lijwi “ha binulo.”
