Isaya 5:1-30
5 Njimbila muka-cizemo cange mwaso,Mwaso uje wendeka bya muka-cizemo cange na lihya lyendi lya binyu.
Muka-cizemo cange wakele na lihya lyendi lya binyu kumukulo wa lilundu lya binyu.
2 Walilimine na kutundisamo mamanya.
Wakuninemo binyu byabibwa bya kubenga.
Hakati kalyo watungileho kaposhiNa kwindamo citikilo ca binyu,Co wakele na kubandamena ngwendi lima bushuka bwabubwa bwa binyu,Oloni lyemine bushuka bwa binyu bwabubi.
3 “Ngeci, yeni mwatunga mu Jelusalema, neni banu ba mu Juda,Akuleni mukati kange na lihya lyange lya binyu.
4 Bika lalo bikwabo binjinapandele kulinga ku lihya lyange lya binyuBije kunjalingile?
Njinabandamenene bushuka bwa binyu bwabubwa,Bika kunemina bushuka bwa binyu bwabubi?
5 Bandameneni njimilekeBinjilinga ku lihya lyange lya binyu:
Njitundisa cimpaka calyo,Co njilyenyeka.
Njipujula cibumbe calyo ca mamanya,Co bacilyatangela.
6 Njikalipwisa ngundu.
Kubakalitetela lalo nambe kulishakwila,Likazika na biputa bya mingonga na shaku,Co njikashika mashelwa mangana keti anyokeselemo nyonzi.
7 Bakunjibo ya Isalele bakebo lihya lya binyu lya Yehova wa maswalale.
Banu ba mu Juda bakebo lihya lyazemene.
Wakele na kulabelela ngwendi bakula mwamubwa,Oloni bakele na kwakula mu kuhenga.
Wakele na kulabelela ngwendi bapwa ba kusungama,Oloni wakele na kuziba miteto ya baje babakele na kulinga mwamubi.”
8 Lubinda lwa baje balikungulwila binjibo byabingi kubwezelela ku binjibo byaboNa kulikungulwila mahya kubwezelela ku mahya aboKweta noho haukahwila mutambela woshe,Co bakakala likalyabo mu lifuti.
9 Njalizibila Yehova wa maswalale alisinga ngwendiBinjibo byabingi nameme binapu byakama, co lalo byabibwa,Bikapwa cuma ca kukomokesa,Co wahi akakalamo.
10 Mwafwa 10 eka ya lihya lya binyu ikatuhwisa bathi* imolika,Co homa* ya bimbuto ikatuhwisa efa* imolika.
11 Banabindama baje benduka mutondo-tondo kuya na kunwa bwala,Baje batwalelelaho kunwa kutwala na ku mangwezi muje bwi, kweta noho binyu bibapendesa manene.
12 Bali na kalyalya na cisanzi ca mikole,Na kangoma, na kamutolilo, na binyu ha bilika byabo,Oloni kubaka bipangi bya Yehova mu biyongola,Co kubamono bipangi bya maboko endi.
13 Ngeci, banu bange baya mu bufungeMwafwa ya kujeneka mangana.
Banu babo ba bulemu batsa njala,Co banu babo boshe batsa lihwila.
14 Ngeci, Cihilo* cinanjunuka manene,Co cinashama manene mu kanwa kaco,Co bulemu bwei nganda* na mbunga yayo ya kalwa na banu bayo baje bazema manene sengaBakayamo.
15 Co munu akakulama.
Munu akashauka.
Munu wa kulyalesa akashauka.
16 Yehova wa maswalale bakamuzumbangeya mwafwa ya kusompa kwendi.
Njambi wa busunga, Uje Wakujela, akalijelesa ikeye babenya mwafwa ya kusungama kwendi.
17 Co bana ba bimanga bakalya mu kuzituka ngwe baje bali na kulila mu bulilo* bwabo.
Banu ba mu mafuti eka bakalila mu myela muje mubakele na kulila tusitu ba kununa.
18 Banabindama baje bali na kukokangeya milonga yabo na mikole ya makuliNa kukokangeya bubi bwabo ngwe kasitu mwakakoko litemba na mikole,
19 Baje bendeka ngwabo: “Wakujela wa Isalele azambwise cipangi cendi.
Cije bwasi-bwasi mangana tucimone.
Biyongola byendi bilingiweMangana tubizibuke.”
20 Banabindama baje bendeka ngwabo byuma byabibwa bikebyo byabibi, byuma byabibi ngwabo bikebyo byabibwa,Baje batengulula lisusulungu kulipwisa ceke, na ceke kucipwisa lisusulungu,Baje bamona byuma bya kulula ngwabo bipwelela, byuma bya kupwelelaco ngwabo bilula!
21 Banabindama baje balimona ngwabo bali na manaNa kulimona ngwabo ba kunyanyama!
22 Banabindama baje bapwa ba kukanyama ku kunwa binyuNa baje bazibuka manene kushingasana bwala,
23 Baje basompa banu bababi ngwabo kubesi na mulonga mwafwa ya kutambula lizika-kanwaNa baje kubakula mwamubwa banu ba kusungama!
24 Ngwe mwa milangi ya tuhya muikenyeka bishatiNa mwila wa kuma muukenye mu milangi ya tuhya,Mizi yabo ibola,Co bishani byabo bishandoka ngwe bunga,Mwafwa banabyana lishiko* lya Yehova wa maswalale,Na kushaula lijwi lya Wakujela wa Isalele.
25 Mukemwo butenu bwa Yehova bunepukila banu bendi,Co abolwela liboko lyendi na kubatsiya.
Minkinda ijaja,Co mibila yabo ya kutsa ipwa ngwe mazilo mu bitapalo.
Mwafwa yebi byuma byoshe, butenu bwendi kubwahwile,Co anga nolwela liboko lyendi mangana abapupe.
26 Nemikila banu ba ku lifuti lya kulako cimweso,Nabakumbila mulozi mangana baije kutunda ku mamaneselelo a lifuti-libu.
Co Taleni! Bali na kwija bwasi-bwasi.
27 Naumo wahi hakati kabo najuka nambe kutanuka.
Naumo wahi anenguka nambe kulala.
Miba ya mu bimbunda byabo kuishengenya,Co mikole ya masanda abo nayo kuibatuka.
28 Mikili yabo yoshe ya kubambuka,Co mata abo a lusipa a kunanela cimweja.
Bimbemba bya tubalu babo binapu ngwe mamanya a kukola manene,Co mawili a matemba abo ashatuka manene ngwe lihunzi lyakama.
29 Kubuluma kwabo kunapu ngwe kwa ndumba.
Babuluma ngwe bana ba bindumba.*
Bonena na kukwata kasitu,Bamwambata kwa kujeneka umo amwamena.
30 Ha litangwa olyo, bakonena kasituNgwe kalunga-ndonga uje natenuka.
Woshe uje akatala ha lifuti akamona lisusulungu lya kutewesa.
Nameme ceke cikazibala mwafwa ya mashelwa.
Majwi a kwinikila
^ Taleni Biñanda bya Kushongo ha B14.
^ Taleni Biñanda bya Kushongo ha B14.
^ Taleni Biñanda bya Kushongo ha B14.
^ Nambe “Sheo,” kulumbununa cihilo ca cifwisa ca banu boshe. Taleni Majwi Abanalumbununa.
^ Nambe “banu bayo ba bulemu.”
^ Kulumbununa mwela wa kulisila bimuna.
^ Nambe “bilongesa.”
^ Nambe “bana ba bindumba ba kukola.”
