Isaya 50:1-11
50 Yehova nendeka ngwendi:
“Kuma nokweni njamwanene mukanda wa kutsiya bulo munjamushekele ndi?
Kuma njamilandesele kuli umo wa baka-kunjikolotesa ndi?
Taleni! Bamilandesele mwafwa ya milonga yeni,Co nokweni njamushekele mwafwa ya kupokola mashiko kweni.
2 Co mwafwa bika kukwakele munu kuno munjinezile?
Mwafwa bika naumo wahi nakumbulwile munjinasanene?
Kuma liboko lyange lyalihi manene, co kulyasa kumipatula ndi,Indi kuma kunjesi na nzili ya kumyamena?
Taleni! Munjitenuka, kalunga-ndonga oma.
Njilingisa bindonga bipwe mambo.
Bisi balimo batsa mwafwa ya lihwila,Co babola mwafwa ya kujeneka mema.
3 Melu njiwazika lisusulunguNa kuwafwika cikeleya.”
4 Mwata Wahakamwa ya Byoshe Yehova nalongesa mwamubwa ndaka yange,*Mangana njizibuke mwakukumbulwila* uje najuka na majwi amabwa.
Akanjindula mutondo na mutondo.
Akanjindula mangana matwi ange atolilile ngwe baje babanalongesa.
5 Mwata Wahakamwa ya Byoshe Yehova nazikula matwi ange,Co kunjamutengulukilile.
Kunjatalesele kweka.
6 Njatalesele mwongo wange kuli baje bakele na kunjipupaNa binana byange kuli baje bakele na kunjuta munjezi wange.
Kunjashwekele cihanga cange ku byuma bije bishawisa na ku kunjijekwila.
7 Oloni Mwata Wahakamwa ya Byoshe Yehova anjikwasa.
Mukemwo kunjilizibi kushauka.
Mukemwo njalingisa cihanga cange cipwe ca kukola ngwe limanya lya kukola manene,Co njizibuka ngwange kunjizibi shwamwa.
8 Uje anjitumbula ngwendi nji wa kusungama ali muyehi.
Iya asa kunjana mulonga?*
Aije tulimike.
Iya ali na ñanda nange?
Anjishwene.
9 Taleni! Mwata Wahakamwa ya Byoshe Yehova anjikwasa.
Iya endeka ngwendi njili na mulonga?
Taleni! Boshe bakahwila ngwe cizalo.
Tulongolo bakabalya.
10 Iya hakati keni akazibila Yehova lyobaNa kutolilila ku lijwi lya ngamba yendi?
Iya wendaho mu lisusulungu lyakama mwakujeneka ceke?
Akulahele lizina lya Yehova na kujendamena hali* Njambi yendi.
11 Taleni! Yeni boshe muli na kushwameka tuhya,Na kulingisa bishashe bitinuke,Endeni mu ceke ca tuhya tweni,Mukati ka bishashe bimunalingisa bitinuke.
Ebi bikebyo bimutambula mu liboko lyange:
Mukalala oku muziba manene kubabala.
Majwi a kwinikila
^ Nambe “nanjana ndaka ya baje babanalongesa.”
^ Nambe hamo “mwakukanyamesela.”
^ Nambe “kulwa nange.”
^ Nambe “kukulahela.”
