Isaya 53:1-12
53 Iya nakulahela byuma byanazibi kuli yetu?*
Co iya ibanajombolwela liboko lya Yehova?
2 Akajobelela ngwe munango kulutwe* lwendi, ngwe muzi umena mu libu lya kuma.
Kesi na sholwesi ya kulitila nambe bulemu,Co mutumumona, sholwesi yendi kuitushwenesa kuli ikeye.*
3 Bamwombwanesele, co banu bamuyengwile.
Wasemukilile* kuziba kubabala, co wazibukile mucafwa kubinja.
Kwapwile lika ngwe batushwekelele cihanga cendi.*
Bamwombwanesele, co twamumwene ngwe wangoco.
4 Cili bene wambatele kubinja kwetu,Na kwambata kubabala kwetu.
Oloni twamumwene kupwa munu ibanayandesa, uje yapupile Njambi na kumuzibisa kubabala.
5 Oloni bamutubile mwafwa ya milonga yetu.
Bamutikile mwafwa ya kusebuka kwetu.
Bamwanene kashitiko mangana tukale mu kwoloka,Co twakangukile mwafwa ya bimbandu byendi.
6 Tubaboshe twayebangela ngwe bimanga,Umo na umo wetu natalesela mu ngila yendi,Co Yehova nalundika kusebuka kwetu hali ikeye.
7 Bamuyandesele, co watabele kumuyandesa,Oloni kafukwile mu kanwa kendi.
Bamutwalele ngwe manga ibatwala na kutsiya,Ngwe manga wa lwabo uje noloka kulu kuli baka-kumutehula,Co kafukwile mu kanwa kendi.
8 Bamuyandesele* na kumutsiya mwafwa ya kujeneka kumusompa mwamubwa.
Co iya elula mizimbu ya cisemwa cendi yoshe?*
Mwafwa bamutundisile mu lifuti lya baka-kuyoya,Bamupupile makote* mwafwa ya mulonga wa banu bange.
9 Nameme byahi byabiisile,*Co mu kanwa kendi kumwakele makuli,Bamwanene cihilo hamo na banu bababi,Oloni mwatsile, bamutsindile na banu ba kufuka.
10 Nameme ngoco, Yehova ikeye washakele ngwendi ayande manene, co wamwecelelele abinje.
Nga wana kuyoya* kwendi kupwa bwana bwa mulonga,Co akamona bana* bendi, akabwezelela ku matangwa endi,Co kwitila muli ikeye, cizango ca Yehova cikalingiwa.
11 Mwafwa ya kuziba kubabala, akajauka na byuma byakamona.
Mwafwa ya mangana endi, ngamba yange wa kusungamaAkalingisa banu babangi bapwe ba kusungama,Co akambata kusebuka kwabo.
12 Ngeci, njikamwana mutamba hamo na banu babangi.
Akalipangela na banu ba kukanyama byuma bibanapukula,Mwafwa walyanene kweta na ku kutsa,Bamutandelele ku baka-kupokola mashiko,Wambatele bubi bwa banu babangi,Co wamenene baka-kupokola mashiko.
Majwi a kwinikila
^ Nambe hamo “byuma bitunazibi.”
^ Hamo kulutwe lwa munu uje amona bili na kulingiwa nambe kulutwe lwa Njambi.
^ Nambe “kesi na sholwesi ya kulitila ije itulingisa tumushake.”
^ Nambe “Wazibisisile.”
^ Nambe hamo “Wapwile munu uje kubakele na kutala banu.”
^ Nambe “Bamulyatelelele.”
^ Nambe “elula yoyesi yendi.”
^ Nambe “Bamupupile na kumutsiya.”
^ Nambe “kapwile cikenya.”
^ Nambe “mwonyo.”
^ Lijwi na lijwi “mbuto.”
