Isaya 55:1-13
55 Ijeni, yeni boshe munatsi lihwila, ijeni mwakunwe mema.
Yeni kumwesi na bimbongo, ijeni mulande byakulya mulye.
Eyo, ijeni mulande binyu na mabele kwa kujeneka bimbongo nambe fweto.
2 Bika bimuli na kubiisila bimbongo byeni ku byuma bije keti byakulya?
Bika bimuli na kubiisila byuma bimunapangela* ku kulanda byuma bije kubimikutisa?
Njitolilileni mwamubwa na kulya byuma byabibwa,Co mubwahelela manene mwafwa ya byakulya bya mazi.
3 Jendekeni matwi eni na kwija kuli yange.
Tolilileni, co mutwalelelaho kuyoya,Co njilinga neni cikumiiyo ca myaka yosheMu kulitombola na majwi a cizemo cije kucesi kutenguluka anjakulahesele Devidi, aje anapu a kulongwa.*
4 Taleni! Njamupwisile mukaleho ku mafuti,Na kumupwisa ntwama na kapitau wa baka-mafuti.
5 Taleni! Mukasana banu ba ku lifuti lyeka baje kumuzibuka,Co banu ba ku lifuti lyeka baje kubamizibuka bakashatukila kuli yeniMwafwa ya Yehova Njambi yeni, Wakujela wa Isalele,Mwafwa akamilingisa mukale na bumpau.
6 Shakezekeni Yehova simbu banu bacasa kumuwana.
Tambekeni kuli ikeye simbu acili muyehi.
7 Munu wamubi aseze ngila yendi,Co munu uje akalingi byuma byabibi aseze biyongola byendi,Eluke kuli Yehova amutetele,Eluke kuli Njambi yetu, mwafwa amukonekela mwakama.*
8 Yehova nendeka ngwendi: “Biyongola byange keti bikebyo biyongola byeni,Co bingila byeni keti bikebyo bingila byange.
9 Mwafwa ngecilika melu muwakala hakamwa manene kutubakana lifuti-libu,Bingila byange nabyo byapwa bya hakamwa manene kutubakana bingila byeni,Co na biyongola byange byapwa bya hakamwa manene kutubakana biyongola byeni.
10 Mwafwa ngecilika nyonzi na mbundu mubikanyoko kutunda mwilu,Co kubyesi kwiluka kwa kujeneka kujulisa ha lifuti-libu na kulingisa mbuto imene na kwima,Na kwana mbuto muka-kukuna na kwana byakulya muka-kulya,
11 Mukemwo mulifwa na lijwi litunda mu kanwa kange.
Kuliluka kuli yange kwa kujeneka kulingako bimo,Lilinga byuma byoshe bije binjizibisa kubwaha,*Co byuma byoshe binjinalitumina ngwange lilinge, bibwaha.
12 Mwafwa mukaya mu kubwahelela,Co bakamilwisa mu kwoloka.
Minkinda na malundu bikalisamba ku mesho eni na kutambeka mu kubwahelela,Co miti yoshe ya mu shwata ikakandelela na maboko ayo.
13 Mu mwela wa biputa bya mingonga mukamena miti ya junipa,Co mu mwela wa biputa bya kutiba-tiba mukamena miti ya mitole.
Co ebi byuma bikatsimanesa Yehova,Na kupwa cizibukiso ca myaka yoshe cije kucikanyongo.”
Majwi a kwinikila
^ Nambe “bimbongo bimunafwitanganena.”
^ Nambe “abasa kukulahela.”
^ Nambe “kutundilila kwisi ya mbunge.”
^ Nambe “Lilinga cizango cange.”
