Isaya 56:1-12
56 Yehova nendeka ngwendi:
“Kundwiyeni kwakula mwamubwa, lingeni byuma bya kusungama,Mwafwa kwobola kwange ololo kwija,Co kusungama kwange kusholoka.
2 Nabwahelela munu uje alinga ebi byumaNa muna munu uje atwalelelaho kubilinga,Uje anyunga Sabata na kujeneka kuijwalesa,Uje atundisa liboko lyendi ku byuma byoshe byabibi.
3 Munu wa ku lifuti lyeka uje aija kuli Yehova kapandele kwendeka ngwendi,‘Yehova anjangununa ku banu bendi.’
Co munalume uje kasa kwambata kapandele kwendeka ngwendi, ‘Taleni! Nji muti wa kuma.’”
4 Mwafwa Yehova naleke banalume baje kubasa kwambata, baje bali na kunyunga bisabata byendi na kwangula kulinga byuma byashaka na kunyunga cikumiiyo cendi, ngwendi:
5 “Njikabana mwela mu njibo yange na mukati ka bibumbe byange na kwanuka lizina lyabo,Njikabana cuma cacibwa manene kutubakana bana ba banalume na ba banakazi.
Njikabana lizina lya myaka yoshe,Lije kulikanyongo.
6 Co banu ba ku lifuti lyeka baje bakaija kuli Yehova mangana bamupangeleNa kuzema lizina lya YehovaNa kupwa bangamba bendi,Boshe baje bakanyunga Sabata na kujeneka kuijwalesaNa kunyunga cikumiiyo cange,
7 Nabo njikabanena ha munkinda wange wa kujelaNa kubalingisa babwahelele mukati ka njibo yange ya kulombelela.
Njikatambula bwana bwabo bwa mutunu bwa kwenyeka, na milambu yabo ibakana ha mutula wange.
Mwafwa njibo yange bakaisana ngwabo njibo ya kulombelela miyati yoshe ya banu.”
8 Mwata Wahakamwa ya Byoshe Yehova, uje ali na kukungulula bana ba Isalele baje banalishandoka ngwendi:
“Njikamukungulwila banu bakwabo, kubwezelela kuli baje babanakungulula laja.”
9 Eni tusitu boshe ba mu shwata, ijeni mwakulye,Eni tusitu boshe muli mu shwata ijeni.
10 Baka-kumunyunga bapwa tupuputwa, naumo wahi hakati kabo nananguka.
Boshe bapwa tutali ba kwoloka kulu, baje kubasa kubwoza.
Bali na kuhwimangana, co banabutama, bazema kulala.
11 Bapwa tutali ba kulakama,Kubesi kukuta.
Bapwa tunyungi baje kubesi kuzibisisa.
Boshe banai mu bingila byabo.
Umo na umo wabo ali na kushaka kuwana byuma mu linyanyamena na kwendeka ngwendi:
12 “Ijeni! Tahi njambateko binyu.
Tunweni bwala tupende.
Litangwa lya imene lipwa ngwe lya lelo, likelyo libwahoni manene!”
