Isaya 58:1-14
58 “Tambeka manene na nzili, keti ulikele.
Tambeka manene ngwe limbinga.
Ambulwila banu bange kutengulukila kwabo,Leka bakunjibo ya Jakobu bubi bwabo.
2 Banjishakezeka ha litangwa na litangwa,Na kumwesa ngwe bashaka kuzibuka bingila byange.
Bamwesa ngwe bapwa muyati uje ukalingi byuma bya kusungama,Na kulimwesa ngwe baje kubombilile kuti kwakula mwamubwa kwa Njambi yabo.
Bashaka kushwena kuli Njambi,Banjilomba ngwabo njisompe mu kusungama, ngwabo:
3 ‘Mwafwa bika kuwesi kutumona mutukalibindika kulya?
Mwafwa bika kuwesi kunanguka mutukaliyandesa yetu babenya?’*
Mwafwa ha litangwa limukalibindika kulya, mukalingi byuma bimushaka,*Co mukayandesa baka-kumipangela.
4 Ku mamaneselelo a kulibindika kulya, mukalicokota na kulwa,Co mukalipupu bifaindi mu bukenya.
Kumwasa kutwalelelaho kulibindika kulya ngwe mumuli na kulingila lelo na kukulahela ngweni lijwi lyeni baliziba mwilu.
5 Kuma njishaka ngwange mulibindike kulya mu ngila ei ndi?
Kuma litangwa lya kulibindika kulya linapande kupwa litangwa lyaliyandesa munu ikeye babenya,*Kukulamesa mutwe wendi ngwe litebe lije linatepuka,Na kulala ha cikeleya na mu lito ndi?
Kuma musinganyeka ngweni matangwa eni a kulibindika kulya azibisa Yehova kubwaha ndi?
6 Embwe, kulibindika kulya cinjishaka cinapande kufwa ngacije:
Kutundisa tukunju twa bubi,Kuzitula mikole ya joko,Kusokola baje babanalyatelela,Na kupokola joko yoshe hakati.
7 Kulipangela byakulya na uje natsi njala,Kunena kahutu mu njibo yobe na uje kesi noku kwakukala,Kuzika uje iumona ngwobe ali mu buzu,Na kujeneka kukengesa nima babushoko bwobe.
8 Co ceke ceni citwa ngwe ceke ca kukya kwa litangwa,Co bamikangwisa bwasi-bwasi.
Kusungama kweni kutwama kulutwe lweni,Co bumpau bwa Yehova buminyungilila munima yeni.
9 Co mumusana, Yehova amikumbulula,Mumutambeka kulomba bukwasi, endeka ngwendi, ‘Yange uno!’
Nga mutundisa joko mukati keniNa kwecela kwinazeka bakweni minye na kubendeka mwamubi,
10 Nga mwana baje banatsi njala byuma bimwashakaNa kunyunga baje bali na kuyanda,Co ceke ceni citwa nameme mu lisusulungu,Lisusulungu lyeni lipwa ngwe mutanya-mwelu.
11 Yehova atwalelelaho kumitwamenenaNa kuminyunga nameme mu lifuti lya kuma.
Akanyamesa bitsiya byeni,Na kumilingisa mupwe ngwe citungu cije cibali na kushangelela mwamubwa,Ngwe kabwelubwelu kaje mema ako kuwomu.
12 Bakatungulula bingundu bya kusañulu mwafwa yeni,Co mukabwahesa lubula lwa bisemwa bya kunima.
Bakamitumbula ngwabo baka-kubwahesa bibumbe bya kupujuka.*
Bakamitumbula ngwabo baka-kubwahesa bingila kuje kubakatunga banu.
13 Nga kumushakezeka byuma bimushaka* ha litangwa lyange lya kujela mwafwa ya sabataNa kusana litangwa lya sabata ngweni litangwa lya kubwahelela manene, litangwa lya Yehova lya kujela, litangwa lya seho manene,Na kulimona kupwa lya seho manene kutubakana kushakezeka byuma bimushaka na kwendeka majwi angoco,
14 Co mubwahelela manene mwafwa ya Yehova.
Njimilingisa mulonde ha myela ya kulunduka ya ha lifuti-libu.
Njimilingisa mulikuwe* buswana bwa kukulwila yeni Jakobu,Mwafwa Yehova ikeye nendekamo.”
Majwi a kwinikila
^ Nambe “mutukayandesa myonyo yetu.”
^ Nambe “bimizibisa kubwaha.”
^ Nambe “lyayandesa mwonyo wendi munu.”
^ Lijwi na lijwi “bimbengwa.”
^ Nambe “bimizibisa kubwaha.”
^ Lijwi na lijwi “mulye.”
