Isaya 59:1-21
59 Taleni! Keti ngwabo liboko lya Yehova lyalihi, co kulyasa kwobola, embwe.
Keti ngwabo matwi endi anaziki, co kuwasa kuziba, embwe.
2 Milonga yeni ikeyo inamyangununa kuli Njambi yeni.
Bubi bweni bukebwo bwamulingisa amishwekele cihanga cendi,Co ali na kubyana kumiziba.
3 Mwafwa mu maboko eni munajwala na maninga,Co minye yeni inajwala na milonga.
Tunwa tweni tukendeka makuli, co bindaka byeni bikaningita bya kujeneka kusungama.
4 Naumo wahi atambeka mu kwimanena kusungama,Co naumo wahi aya ku nkuta na kukendeka busunga.
Bakulahela byuma byangoco na kwendeka bya kujeneka seho.
Bemita bukalu na kukita byuma byabibi.
5 Batetula mayaki a linyoka wa bushungu,Co batunga bwanda bwa kabubi.
Woshe alya mayaki abo atsa,Co mu liyaki lije litikika mutunda limbwambwa.*
6 Bwanda bwabo bwa kabubi kubupu cizalo,Co byuma bibapanga kubalifwikibyo.
Bipangi byabo binena bushonde,Co maboko abo alinga byuma bya bukenya.
7 Mendi abo ashatukila ku kulinga byuma byabibi,Co bazambwila kuketila maninga a kujeneka mulonga.
Bisinganyeka byabo byabibi.
Mu bingila byabo muli kunyonga na kayando.
8 Kubazibukile ngila ya kwoloka,Co mu bingila byabo kumwesi kwakula mwamubwa.
Bahengesa bingila byabo,Co naumo wahi endamo azibuka kwoloka.
9 Mukemwo kwakula mwamubwa kuli kulako netu,Co kusungama kucesi na kutuwana.
Tuli na kutwalelelaho kulabelela ceke, oloni taleni, kuli lisusulungu,Tuli na kulabelela lyezi, oloni tuli na kutwalelelaho kwenda mu lisusulungu lyakama.
10 Tupapateya cibumbe ngwe tupuputwa,Tuli na kutwalelelaho kupapateya ngwe baje kubesi na mesho,Tutanuka mutanya-mwelu ngwe kuli lisusulungu lya mangwezi,Tunapu ngwe banu ba kutsa baje bali hakati ka banu ba kukanyama.
11 Tubaboshe tuli na kutwalelelaho kwonena ngwe bimbeyaNa kuningita mu busiwa ngwe mayembe.
Twalabelela kwakula mwamubwa, oloni cahi,Twalabelela kwoboka, oloni kuli kulako netu.
12 Mwafwa kutengulukila kwetu kunatumu mu mesho obe,Bubi bwetu bwoshe buli na kumwesa ngwabwo tuli na mulonga.
Mwafwa kutengulukila kwetu kuli netu,Tuzibuka mwamubwa kusebuka kwetu.
13 Twapokola mashiko na kubyana Yehova,Twakengesa nima Njambi yetu.
Tunendeka bya kulyatelela na bya kutengulukila,Tunemita makuli mu bimbunge byetu na kuningita byuma bya makuli.
14 Kwakula mwamubwa kuneluka munima,Co kusungama kunemanena kulako,Mwafwa busunga bunatanuka mu mwela wa mbunga,Co byuma bya kusungama kubyasa kukobela.
15 Busunga bunazimangana,Co woshe atunda ku byuma byabibi bamupukula.
Yehova wamwene ebi byuma, co kubyamuzibisile kubwaha,*Mwafwa kukwakele kwakula mwamubwa.
16 Wamwene ngwendi kukwakele munu wa kubakwasa,Co wakomokele mwafwa kukwakele wa kubemanena,Ngeci, liboko lyendi lyanenele kwoboka,*Co kusungama kwendi kwamukwasele.
17 Wazalele kusungama ngwe cikobelo ca nzitaNa kuzala tepa ya kwoboka* ku mutwe wendi.
Wazalele bizalo bya kulinga shambandingaNa kulikuta ntwima ya kulinga byuma byabibwa ngwe mukanjo.*
18 Akabelwisila kwesekesa nebi bibanalingi:
Akatenukila baka-kumulwisa na kwilwisila bubi bitozi bendi.
Co akana mañanda fweto yawo ije inawapande.
19 Baje bali ku bulahukilo bwa litangwa bakazibila lyoba lizina lya Yehova,Co baje bali ku butuhukilo bwalyo bakamwana bumpau,Mwafwa akaija ngwe mema a cingungu-muta,Aje aili na kwendesa sipilitu ya Yehova.
20 “Muka-kusokola akaija kuli Siyone,Ku batekulwila ba Jakobu baje banatundu ku kupokola mashiko,” ngwendi Yehova.
21 “Oloni yange, eci cikeco cikumiiyo cinjilikumiiya nabo,” ngwendi Yehova. “Sipilitu yange ije ili hali yeni na majwi ange anjinaka mu tunwa tweni kubakabitundisa mu tunwa tweni, mu tunwa twa bana* beni, nambe mu tunwa twa batekulyeni, kushwa hano kutwala ku myaka yoshe,” ngwendi Yehova.
Majwi a kwinikila
^ Nambe “linyoka.”
^ Lijwi na lijwi “co byapwile byabibi mu mesho endi.”
^ Nambe “lyamuhyanesele.”
^ Nambe “kuhyana.”
^ Nambe “mukanjo wa kujeneka maboko
^ Lijwi na lijwi “mbuto.”
