Isaya 6:1-13
6 Mu mwaka watsile Mwene Uziya, njamwene Yehova natumama ha litanda lya helu manene, co mukanjo wendi washulile mu tempele.
2 Baselafu bemanene helu lyendi. Selafu na Selafu wakele na mambaba 6. Umo na umo wabo wafwikile cihanga cendi na mambaba abali na kufwika mendi endi na mambaba abali, co wakele na kupulula na mambaba abali.
3 Co umo na umo wabo wakele na kutambekela mukwabo ngwendi:
“Wa kujela, wa kujela, wa kujela Yehova wa maswalale.
Lifuti-libu lyoshe linashulu bumpau bwendi.”
4 Bikwateso bya bipamba byaningangele mubakele na kutambeka,* co njibo yashulile bwisi.
5 Co njendekele ngwange: “Njabindama!
Njinatsi!*
Mwafwa tunwa twange tunapu twa kujwala,Co njili na kuyoya mukati ka banu baje bali na tunwa twa kujwala,Mwafwa mesho ange anamono bene Mwene, Yehova wa maswalale.”
6 Ngeci, Selafu umo wapulwile na kwija kuli yange. Mu liboko lyendi mwakele linungu lya tuhya lije lyalahwile ha mutula na cimana.*
7 Wakwatele kanwa kange na lije linungu na kwendeka ngwendi:
“Tala! Eli linungu linakwata kanwa kobe.
Mulonga wobe banautundisa,Co bubi bwobe banabufwiki.
8 Co njazibile lijwi lya Yehova lyendeka ngwalyo: “Iya injituma, iya atuilako?” Co njendekele ngwange: “Yange unoye, njitume.”
9 Co wanjikumbulwile ngwendi: “Ya ukaleke aba banu ngwobe,‘Mukaziba lwalwingi,Oloni kumukazibisisa,Mukamona lwalwingi,Oloni kumukakala na mangana.’
10 Kaluwisa bimbunge byaba banu.
Zika matwi aboNa kufwika mesho abo,Mangana keti bamone na mesho aboNa kuziba na matwi abo,Mangana bimbunge byabo keti bizibisise,Co keti batenguluke na kukanguka.”
11 Ngeci, njendekele ngwange: “Obe Yehova, ebi byuma bitwalelelaho kweta mwaka uka?” Co wanjilekele ngwendi:
“Kweta noho habikalundumukila binganda na kupwa bingundu,Co mu binjibo mujeneke kukala banu,Noho halikabiila lifuti na kupwa ngundu.
12 Kweta noho Yehova akashekela banu kulako,Noho halikakela lifuti na bingundu byabingi.
13 “Oloni mukasala mutambela umo wa banu babandondo lika, co bakawenyeka lalo, ngwe mukukasala cimbundi nga muti wakama na muti wa oke banaitete. Mbuto* ya kujela ikeyo ikapwa cimbundi calyo.”
Majwi a kwinikila
^ Lijwi na lijwi “mwafwa ya lijwi lya uje wakele na kutambeka.”
^ Lijwi na lijwi “Bananjolwesa.”
^ Nambe “cikwateso.”
^ Nambe “Mwana.”
