Isaya 60:1-22
60 “Katuka, obe munakazi, twa ceke, mwafwa ceke cobe cinaija.
Bumpau bwa Yehova buli na kutwila ceke hali yobe.
2 Mwafwa tala! Lisusulungu likafwika lifuti-libu,Co lisusulungu lyakama likafwika mafuti,Oloni Yehova akatwila ceke hali yobe,Co bumpau bwendi bukasholoka hali yobe.
3 Baka-mafuti bakaija ku ceke cobe,Co bimyene bakaija ku bulemu bwobe bwa kubyazima.*
4 Andula mesho obe na kutala kumukulo wobe kwoshe!
Boshe banabakungulula, bali na kwija kuli yobe.
Bana bobe ba banalume bali na kutwalelelaho kwija kutunda kulako,Co bana bobe ba banakazi bali na kwija oku banabambata ha bintungi.
5 Ha simbu oyo, ukamona ebi byuma, co ukabwahelela.
Mbunge yobe ikalyanga-lyanga na kushula na kubwahelela,Mwafwa bufuko bwa ku kalunga-ndonga bakabunena kuli yobe,Co bufuko bwa baka-mafuti bukaija kuli yobe.
6 Matanga a tumele akashula mu lifuti lyobe,Mukashula bana ba tumele ba nkomba ba ku Midiani na Efahi.
Banu ba ku Sheba boshe bakaija,Bakambata goldi na isense ya kutoka.
Bakambulula bya kushangazala Yehova.
7 Matanga oshe a ku Keda bakawakungulwila kuli yobe.
Bimanga ba nkomba ba ku Nebayothi bakakukwasa.
Njikabatabesa kwija ha mutula wange,Co njikabwahesa njibo yange ya bumpau.*
8 Beya aba bali na kwenda hamo ngwe mashelwa,Ngwe mayembe bapulwila ku byamba byabo?
9 Mwafwa mañanda akanjikulahela.
Mato a ku Tashishi akewo anatwama kulutwe,Mangana anene bana bobe kutunda kulako,Hamolika na siuva yabo na goldi yabo,Mangana bashangazale lizina lya Yehova Njambi yobe, Wakujela wa Isalele,Mwafwa akakulingisa ukale na bumpau.*
10 Banu ba ku lifuti lyeka bakatunga bibumbe byobe,Co bimyene babo bakakupangela,Mwafwa njakupupile omwo njalubalele,Oloni njikutetela mwafwa ya ngozi.
11 Bikolo byobe bikasala casi simbu yoshe,Kubakabishoko mutanya nambe butsiki,Mangana bakunenele bufuko bwa baka-mafuti,Co bimyene babo bakebo bakatwama kulutwe.
12 Mwafwa lifuti lyoshe na bumwene bwoshe buje kubukupangela, bikanyonga,Co mafuti akanyonga kunyongelela.
13 Bumpau bwa Lebanoni bukaija kuli yobe,Muti wa junipa, muti wa ashi, na muti wa sipresi,Mangana njibwahese mwela wange wa kujela.
Njikalingisa mwela wa kulyata mendi ange bausingimike.
14 Bana ba baje bakulyatelelele bakaija na kutsikama kulutwe lwobe,Boshe baje bali na kukushaula bakatsikama ku mendi obe,Co bakakusana ngwabo nganda ya Yehova,Siyone ya Wakujela wa Isalele.
15 Kutubakana kukuyengula na kukuzinda, kwa kujeneka nambe umo aita muli yobe,Njikakulingisa upwe cuma ca kulyalesela myaka yoshe,Cuma cije cinena kubwahelela ku bisemwa byoshe.
16 Ukanwa mabele a mafuti,Na kujamwa ku mabele a bimyene.
Co ukazibuka ngwobe yange Yehova, yange Mwobole wobe.
Njambi wa nzili wa Jakobu ikeye Muka-kukusokola.
17 Njikanena goldi kwingisa mu kopa,Na kunena siuva kwingisa mu cikubo,Kopa kwingisa mu citi,Na cikubo kwingisa mu mamanya.
Co njikangula kwoloka kupwa kanyungi kobeNa kusungama kupwa muka-kukwana bipangi.
18 Bukenya kubukakala lalo mu lifuti lyobe,Co kunyonga na kubiisa kubikakala lalo mukati ka binginga byobe.
Ukasana bibumbe byobe ngwobe Kwoboka, na bikolo byobe ngwobe Kushangazala.
19 Mwafwa litangwa kulikakutwila lalo ceke mutanya,Co ngonde kuikakutwila lalo lyezi,Mwafwa Yehova akapwa ceke ca myaka yoshe kuli yobe,Co Njambi yobe akapwa bubwa bwobe.
20 Litangwa lyobe kulikalahuka,Nameme ngonde yobe kuya ku lisusulungu,Mwafwa Yehova akapwa ceke cobe ca myaka yoshe,Co matangwa obe a kuziba busiwa akahwa.
21 Banu bobe boshe bakapwa ba kusungama,Bakaswana lifuti myaka yoshe.
Bapwa cimena cinjakunine,Bapwa cipangi ca maboko ange, mangana banjane bumpau.
22 Munu wamundondo akapwa banu 1,000,Co munu wa kuzeya akapwa muyati wa nzili.
Yange Yehova njikazambwisa ebi byuma mu simbu yabyo.”
Majwi a kwinikila
^ Nambe “ku ceke cobe ca mutondo-tondo.”
^ Nambe “yaibwa.”
^ Nambe “usholoke mwamubwa.”
