Isaya 63:1-19
63 Iyou ali na kwija kutunda ku Edomu?
Iyou ali na kwija kutunda ku Bozila oku nazala bizalo bya mibala ya kutona,Ou nazala bizalo byabibwa,Ou ali na kwija na nzili yakama?
“Yange bene. Yange uje ali na kwendeka mu kusungama,Uje ali na nzili yakama ya kwobola.”
2 Bika binalingisa bizalo byobe bibenge,Co mwafwa bika binapu ngwe bya muka-kutika binyu mu citikilo ca binyu?
3 Njinatiki binyu mu lingolengole likalyange.
Naumo wahi hakati ka miyati ya banu wakele nange.
Njatwaleleleleho kubatika mu kulubala kwange.
Co njatwaleleleleho kubalyatangela mu butenu bwange.
Ha bizalo byange hashamukilile maninga abo,Co njinajwalesa bizalo byange byoshe.
4 Mwafwa litangwa lya kulinga shambandinga lili mu mbunge yange,Co mwaka wa kusokola banu bange unete.
5 Njatalele, oloni kukwakele wa kunjikwasa,Njalikomokelele mwafwa kukwakele wa kunjikwasa.
Ngeci, liboko lyange lyanenele kwoboka,*Co butenu bwange bwanjikwasele.
6 Njalyatangelele miyati ya banu mu kulubala kwange,Njabapendesele na butenu bwangeNa kwitila maninga abo hasi,”
7 Njendeka bilinga bya Yehova bya cizemo cije kucesi kutenguluka,Njendeka bilinga bya Yehova bya kumushangazala,Mwafwa ya byuma byoshe byanatulingila Yehova,Byuma byabingi byabibwa byanalingila bakunjibo ya Isalele,Kwesekesa na kutetela kwendi na cizemo cendi cakama cije kucesi kutenguluka.
8 Mwafwa wendekele ngwendi: “Cili bene banapu banu bange, banapu bana baje bakapwa ba kulongwa kuli yange.”*
Ngeci, wapwile Mwobole wabo.
9 Simbu yoshe ibakele na kuyanda, wazibile kubabala ku mbunge.
Co katumwa kendi* wabobwele.
Wabasokwele mwafwa ya cizemo na mema ku mbunge,Co wabajundwile na kubambata matangwa oshe a kusañulu.
10 Oloni bamutengulukilile na kulubalesa sipilitu yendi ya kujela.
Co watengulukile kupwa citozi cabo,Na kubalwisa.
11 Co banukile matangwa a kusañulu,Matangwa a Mosesa ngamba yendi, ngwabo:
“Ali kuli Uje wabatundisile mu kalunga-ndonga na tunyungi ba butanga bwendi?
Ali kuli Uje wakele sipilitu yendi ya kujela muli ikeye,
12 Uje walingisile liboko lyendi lya bumpau liye hamo na liboko lya cilyo lya Mosesa,Uje wangunwine mema kulutwe lwaboMangana alingise lizina lyendi balyanuke myaka yoshe?
13 Ali kuli Uje wabalingisile baite mu mema a cingungu-muta*Na kwenda kwa kujeneka kutanuka,Ngwe kabalu uje enda mu mambo?
14 Ngecilika bimuna baje basikumuka mu cana kukahwima,Sipilitu ya Yehova yabahwimisile.”
Omu mukemwo muwatwamenenene banu bobe,Mangana utsimanese lizina lyobe lyakama.*
15 Tala hasi omwo mwilu mangana umone,Oku uli mu mwela wobe wa helu, wa kujela na bumpau.*
Ntwima yobe na nzili yobeNa mema ku mbunge na kutetela bili kuli?
Unanjishwekelabyo.
16 Mwafwa yobe Tate yetu,Nameme Abrahamu kasa kutuzibuka,Co nameme Isalele kasa kutunanguka,Yobe, obe Yehova, yobe Tate yetu.
Yobe Muka-kutusokola kushwa kusañulu.
17 Obe Yehova, mwafwa bika unatwecelela* tutunde mu bingila byobe?
Mwafwa bika unecelela* bimbunge byetu bikaluwe, mangana keti tukuzibile lyoba?
Iluka, mwafwa ya bangamba bobe,Miyati ije yapwa buswana bwobe.
18 Banu bobe ba kujela baswanene lifuti mu simbu yaindondo lika.
Bitozi betu banalyatangela mwela wobe wa kujela.
19 Ha simbu yailaha, tunapu ngwe baje kanda uyuleho,Ngwe baje kanda basaneseho lizina lyobe.
Majwi a kwinikila
^ Nambe “lyanjihyanesele.”
^ Nambe “baje kubakanjende bungungu.”
^ Nambe “kangelo uje akakala muyehi nendi.”
^ Nambe “mema a kuloba.”
^ Nambe “lyalibwa.”
^ Nambe “bubwa.”
^ Nambe “unatulingisa.”
^ Lijwi na lijwi “unalingisa.”
