Isaya 65:1-25
65 “Njinalisholola kuli baje kubanjishakezekele,Njinalingisa baje kubanjitondele banjiwane.
Njinaleke banu baje kubasanene ha lizina lyange ngwange, ‘Yange uno, yange uno!’
2 Njinolwela maboko ange banu ba kutindibala, litangwa lyoshe lya mutunu,Baje bali na kwenda mu ngila yaibi,Baje bali na kukaba bisinganyeka byabo.
3 Banu baje bali na kutwalelelaho kulinga byuma byabibi ku mesho ange,Baje bali na kwana milambu mu mahya na kwenyekela milambu ha mabrikisi.
4 Bakatumama ha bihilo,Na kukala mu myela ya kulishweka* butsiki bwoshe,Oku balya situ ya bingulu,Co musozi wa byuma bya kubola* uli mu bindeho byabo.
5 Bendeka ngwabo, ‘Kala bene okwo, keti unjishwene,Mwafwa njinajele kukutubakana.’
Aba banu banapu ngwe bwisi butunda mu majulu ange, ngwe tuhya tuje tushukuma litangwa lyoshe lya mutunu.
6 Taleni! Ebi byuma banabisonekela ha mesho ange.
Kunjibecelela lika,Njibana fweto,Njibafweta mu kushula
7 Mwafwa ya milonga yabo na milonga ya bakukulwila babo,” ngwendi Yehova.
“Mwafwa banenyekela milambu ha minkindaNa kunjishawila ha malundu,Ngeci, njibanga tahi kubana fweto yabo mu kushula.”
8 Yehova nendeka ngwendi:
“Ngecilika binyu byabiha mubikatundu ku cinjomoto ca bushuka bwa binyu,Co munu endeka ngwendi, ‘Keti mucibiise, mwafwa muli bimo byabibwa,’*Nange mukemwo munjilinga mwafwa ya bangamba bange,Kunjibanyongesa boshe.
9 Njikambata mwana kuli Jakobu,Co kuli Juda kukatunda uje akaswana minkinda yange.
Banu bange banjinangula bakaswana eli lifuti,Co bangamba bange bakatungamo.
10 Shaloni ikapwa bulilo bwa bimanga,Co Cinema* ca Akori cikapwa mwela wa kuhwimina bingombe,Mwafwa ya banu bange baje bakanjishakezeka.
11 Oloni muli hakati ka baje banaseze Yehova,Baje bebala munkinda wange wa kujela,Baje babwahesela mesa njambi wa Sande*Na baje bashulisila njambi wa Lubinda binganja bya binyu bya kushingasana.
12 Ngeci, njimyana ku mukwale,Co mubaboshe mukatsikama mangana bamitsiye,Mwafwa njamisanene, oloni kumwanjikumbulwile,Njendekele, oloni kumwatolililile,Mwatwaleleleleho kulinga byuma byabibi mu mesho ange,Co mwangwile kulinga byuma bije kubyanjizibisile kubwaha.”
13 Ngeci, Mwata Wahakamwa ya Byoshe Yehova ngwendi:
“Taleni! Bangamba bange bakalya, oloni yeni mukatsa njala.
Taleni! Bangamba bange bakanwa, oloni yeni mukatsa lihwila.
Taleni! Bangamba bange bakabwahelela, oloni yeni mukaziba shwamwa.
14 Taleni! Bangamba bange bakatambeka mu kubwahelela mwafwa ya bimbunge byabo byabibwa,Oloni yeni mukalila mwafwa ya kuziba kubabala ku bimbungeNa kumbolozoka mwafwa ya kupokoka bimbunge.
15 Mukaseza lizina libakapangesa banu bange banjinangula mubakalisinga,Co Mwata Wahakamwa ya Byoshe Yehova akatsiya umo na umo weni,Oloni bangamba bendi akabasanesa lizina lyeka.
16 Mangana woshe atonda cibezikiso ha lifuti-libu,Njambi wa busunga* akamubezikise,Co woshe alisinga ha lifuti-libu,Akalisinge hali Njambi wa busunga.*
Mwafwa tuyando* twa kunima bakatwibala,Bakatutundisa ku mesho ange.
17 Mwafwa taleni! Njitanga melu amaha na lifuti-libu lyaliha,Co byuma bya laja kubakabyanuka,Co kubikakala lalo mu bimbunge byabo.
18 Ngeci, lisambeni na kubwahelela myaka yoshe mwafwa ya byuma binjitanga.
Mwafwa taleni! Njitanga Jelusalema uje akanena kubwahelela,Na banu bendi baje bakalingisa banu balisambe.
19 Co njikabwahelela mwafwa ya Jelusalema na kulisamba mwafwa ya banu bange,Kubakazibimo lalo munu uje alila nambe kuteta mwafwa ya kayando.”
20 “Kumukakala lalo mbututu uje akayoya lika matangwa amandondo,Nambe mukulunu uje kakayoyo matangwa endi oshe.
Mwafwa woshe akatsa oku ali na myaka 100, bakamumona ngwabo acili mwanike,Co muka-bubi bakamusinga, nameme ali na myaka 100.*
21 Bakatunga binjibo na kukalamo,Na kulima mahya a miti ya bushuka bwa binyu na kulya bushuka bwayo.
22 Kubakatungu binjibo mangana banu beka bakalemo,Nambe kukuna miti mangana banu beka balye bushuka bwayo.
Mwafwa matangwa a banu bange akapwa ngwe matangwa a muti,Co banu bange banjinangula bakalikuwa bipangi bya maboko abo mu kushula.
23 Kubakalisini lika kuundangana,*Nambe kukita bana baje bakayanda,Mwafwa banapu bana* banabezikisa Yehova,Hamolika na batekulwila babo.
24 Nameme simbu kanda banjisane, njikabakumbulula,Simbu bacili na kwendeka, njikabaziba.
25 Kangunga na muna manga bakalya hamo,Ndumba akalya mwila ngwe ngombe,Co likungu likelyo likapwa byakulya bya linyoka.
Kubakanene bushonde nambe kubiisa byuma ha munkinda wange wa kujela,” ngwendi Yehova.
Majwi a kwinikila
^ Nambe hamo “bipundo bya kuzwamena.”
^ Nambe “bya kujwala.”
^ Lijwi na lijwi “muli cibezikiso.”
^ Nambe “Cana ca Kunyekama.”
^ Nambe “Laki.”
^ Nambe “kulongwa.” Lijwi na lijwi “Ameni.”
^ Nambe “kulongwa.” Lijwi na lijwi “Ameni.”
^ Nambe “bukalu.”
^ Nambe hamo “Co uje kakete ha myaka 100 bakamumona ngwabo banamusingi.”
^ Nambe “kupanga na nzili.”
^ Lijwi na lijwi “mbuto.”
