Isaya 66:1-24
66 Yehova nendeka ngwendi:
“Melu likelyo litanda lyange, co lifuti-libu cikeco citwamo ca kulyata mendi ange.
Kuli kumwasa kunjitungila njibo?
Co mwela wange wa kuhwimina uli kuli?”
2 “Liboko lyange linalingi ebi byuma byoshe,Co omu mukemwo mubyakeleleleko,” ngwendi Yehova.
“Ngeci, njitala kuli ou munu,Njitala kuli munu wa kulikehesa, wa kupokoka mbunge, uje ajaja mwafwa ya* lijwi lyange.
3 Uje atsiya ngombe wa nkomba napu ngwe uje atsiya munu.
Uje ana manga kupwa mulambu napu ngwe uje apokola singo ya katali.
Uje ana bwana napu ngwe uje ana maninga a ngulu!
Uje ana bwana bwa canukiso bwa isense ya kutoka napu ngwe uje abezikisa na majwi a manseno.*
Banangula bingila byabo babenya,Co byuma bya bunyengwe bili na kubazibisa kubwaha.
4 Ngeci, njiwana bingila bya kubanenamo kashitiko,Co byuma bibali na kutewa bikebyo binjikabanenela.
Mwafwa munjabasanene, naumo wahi wakumbulwile,Munjendekele, naumo wahi watolililile.
Batwaleleleleho kulinga byuma byabibi mu mesho ange,Co bangwile kulinga byuma bije kubyanjizibisile kubwaha.”
5 Zibeni lijwi lya Yehova, yeni mukajaja mwafwa ya* lijwi lyendi:
“Bandolome beni baje bamizinda na kumiyengula mwafwa ya lizina lyange ngwabo, ‘Yehova bamwane bumpau!’
Oloni akasholoka na kumilingisa mubwahelele,Co bakebo bakaziba shwamwa.”
6 Kuli na kuzibika cilumo ca kuliuya mu nganda, cije cili na kutundilila mu tempele!
Yehova ali na kwilwisila bitozi bendi bije binabapande.
7 Simbu kanda simbu ya Siyone ya kupapa yete, wapapele.
Simbu kanda mushongo wa kukita umwizile, wakitile mwana wa munalume.
8 Iya wazibaho laja cuma ca cifweci?
Iya wamonaho laja byuma bya cifweci?
Kuma lifuti lyasa kusemuka mu litangwa limo ndi?
Kuma muyati wa banu wasa kusemuka woshe ha simbu imo ndi?
Oloni simbu ya Siyone ya kupapa muyetele lika, wakitile bana ba banalume.
9 Yehova ngwendi, “Kuma njasa kulingisa mwana ashake kusemuka na kumulingisa ajeneke kusemuka ndi?
Njambi yobe ngwendi, “Kuma njasa kulingisa munu ashake kupapa na kushoka shibu yendi ndi?”
10 Bwaheleleni hamo na Jelusalema na kujolela hamo nendi, yeni boshe mwamuzema.
Lisambeni manene hamo nendi, yeni boshe muli mu busiwa mwafwa yendi,
11 Mwafwa mukajamwa ku mabele endi a kuzembeleka, co mukakuta.
Mukalingumba mabele endi na kubwahelela mwafwa ya bumpau bwendi bwakama.
12 Mwafwa Yehova nendeka ngwendi:
“Njimwana kwoloka ngwe ndongaNa bumpau bwa baka-mafuti ngwe ndonga ya cingungu-muta.
Mukajamwa na kumyambatela ha ntungi,Co bakamyehesela ha mabuli.
13 Ngwe cisemi wa munakazi mwakazembeleka munendi,Nange njitwalelelaho kumizembeleka,Njimizembeleka mwafwa ya Jelusalema.
14 Mukamona ebi byuma, co bimbunge byeni bikabwahelela,Bitsiya byeni bikakanyama ngwe mwila wauha.
Co Yehova akasholwela bangamba bendi liboko* lyendi,Oloni akahisa bitozi bendi.”
15 “Mwafwa Yehova akaija ngwe tuhya,Co matemba endi anapu ngwe lihunzi lyakama,Mangana abane fweto mu kulubala,Mangana abatenukile na milangi ya tuhya.
16 Mwafwa Yehova akasompa banu na tuhya,Eyo, akalwisa banu na mukwale,Co banu bakatsiya Yehova bakapwa babangi.
17 Yehova ngwendi: “Baje balibwahesela na kulijelesa bakebo babenya mangana bakobele mu mahya* oku bakabangeya uje ali hakati, baje balya situ ya bingulu na byuma bya bunyengwe na bimuku, boshe bakahwa.
18 Njili na kwija mangana njakukungulule banu ba ku mafuti oshe na bindaka byoshe, mwafwa njizibuka bipangi byabo na bisinganyeka byabo, co bakaija na kumona bumpau bwange.”
19 “Njikemika cizibukiso mukati kabo, co njikatuma bamo baje bakoboka ku baka-mafuti: ku Tashishi, ku Puu, na ku Ludi. Njikatuma baje bakanana buta bwa lusipa ku Tubau, ku Javani, na ku mañanda a kulako, kuli baje kanda bazibeho byange nambe kumona bumpau bwange, co bakambulula bumpau bwange mukati ka baka-mafuti.
20 Bakanena bandolome bobe boshe kutunda ku mafuti oshe kupwa bwana kuli Yehova. Bakabanena ha tubalu, mu matemba a kufukuka, mu matemba a kufwika, ha bidonki* na ha tumele ba lumbisi. Bakabanena ha munkinda wange wa kujela, Jelusalema, ngwe baIsalele mubakanene bwana mu bikwata bya kujela mu njibo ya Yehova,” ngwendi Yehova.
21 “Njikambatako bamo na kubapwisa tupilistu na baLevi,” ngwendi Yehova.
22 “Mwafwa ngecilika mwa melu amaha na lifuti-libu lyaliha binjitanga mubitwalelelaho kukalako ku mesho ange, na bana* bobe na lizina lyobe bitwalelelaho kukalako,” ngwendi Yehova.
23 “Co kutunda ha kutenama kwa ngonde, kuya ha kutenama kwa ngonde ikwabo, na kutunda ha sabata imo kuya ha sabata ikwabo,Banu boshe bakaija na kutsikama halutwe lwange,”* ngwendi Yehova.
24 “Co bakaya na kutala bibimbi bya banu baje banjitengulukilile,Mwafwa mabuno bali hali bakebo kubakatsi,Co tuhya twabo kutukazimi,Co bakapwa cuma ca bunyengwe ku banu boshe.”
Majwi a kwinikila
^ Nambe “uje ashota mbunge.”
^ Nambe hamo, “uje ashangazala kamponya.”
^ Nambe “mukashoto mbunge.”
^ Nambe “nzili.”
^ Kulumbununa mahya a kulitila a kupangesa mu kulemesa tumponya.
^ Nambe “bimulu.”
^ Lijwi na lijwi “mbuto.”
^ Nambe “na kunjilemesa.”
