Isaya 7:1-25
7 Mu matangwa a Ahazi muna Jothamu, Jothamu muna Uziya mwene wa Juda, Lezini Mwene wa Siria na Peka muna Lemalaya mwene wa Isalele, bezile na kulwisa Jelusalema, oloni kubaifungulwile.*
2 Bakunjibo ya Devidi babalekele ngwabo: “Maswalale ba Siria na maswalale ba Efremu banalikwatasana.”
Co Ahazi na banu bendi bashangumukile kujaja ngwe miti ya mu shwata ije ininganga na lihunzi.
3 Co Yehova walekele Isaya ngwendi: “Ya na munobe Shiya-jeshabu* mukaliwane na Ahazi ku shongo ya kapila kaje katunda mu kalishali ka ha munkinda, ku tapalo iya kuje kwakapangela muka-kukusha bizalo.
4 Ukamuleke ngwobe, ‘Wa mbunge, keti uzibe lyoba. Keti ulijujukile mwafwa yebi bimbundi bibali bili na kukakama bwisi, mwafwa ya butenu bwa Lezini na Siria na muna Lemalaya.
5 Mwafwa Siria na Efremu na muna Lemalaya banayongola kukulinga mwamubi. Banendeka ngwabo:
6 “Tuyeni tukalwise Juda na kuipujula* na kuifungulula,* co tukangule muna Tabeu apwe mwene wayo.”
7 “‘Yehova Mwata Wahakamwa ya Byoshe nendeka ngwendi:
“Biyongola byabo kubibwaha,Co kubilingiwa.
8 Mwafwa Damasika ikeye ntwama ya Siria,Co Lezini ikeye ntwama ya Damasika.
Mu myaka 65 lika,Efremu bakamunyongesa, co kakapu lalo muyati wa banu.
9 Samaliya ikeye ntwama ya Efremu,Co muna Lemalaya ikeye ntwama ya Samaliya.
Kubanga ukale na likulahelo lya kukanyama,Keti ngoconi uzeya.”’”
10 Yehova watwaleleleleho kuleka Ahazi ngwendi:
11 “Lomba cizibukiso kuli Yehova Njambi yobe, cinasa kupwa ca kuloba ngwe Cihilo* nambe cacilaha ngwe lilu.”
12 Oloni Ahazi wakumbulwile ngwendi: “Kunjicilombo nambe kweseka Yehova.”
13 Co Isaya wendekele ngwendi: “Shukulu-kambu, tolilileni, eni bakunjibo ya Devidi. Kuma kukwapwilemo mumuneseka mbunge ya kubandamena ya banu? Mushaka lalo kweseka mbunge ya kubandamena ya Njambi ndi?
14 Nameme ngoco, Yehova akwana cizibukiso. Tala! Mumbanda akakala na cikute, co akakita mwana wa munalume, co akamuluka ngwendi Manuwele.*
15 Akalya barta na buki mwakazibuka kubyana byuma byabibi na kwangula byuma byabibwa.
16 Mwafwa simbu kanda ou mwana azibuke kubyana byuma byabibi na kwangula byuma byabibwa, lifuti lyaba bimyene babali bauli na kutewa likapwa ngundu.
17 Yehova akalingisa yobe na banu bobe na bakunjibo ya isho muyoye mu simbu yaikalu, simbu ije kanda ikaleko laja kushwa bene hatundilile Efremu kuli Juda, mwafwa akamunenela mwene wa Asiria.
18 Ha litangwa olyo, Yehova akakumba mulozi mu kusana binzinzi ba ku bana ba bindonga ba kulako ba Ndonga ya Nailo ya mu Ijipiti na bimuka ba mu lifuti lya Asiria.
19 Co boshe bakaija na kukala mu binema bya kungulumuka, mu myanzi ya mu mamanya, ha biputa bya mingonga byoshe na mu myela yoshe ibakanwila tusitu.
20 Ha litangwa olyo, Yehova akatehula binkambu bya ku mitwe yeni na maka a ha mendi eni na kabemba ka kukumuna ku mutambela wa ku Ndonga,* kulumbununa mwene wa Asiria, co oko kabemba kakatehwila kumo na minjezi yeni.
21 “Ha litangwa olyo, munu akanyungilila muna ngombe wa ha butanga bwendi na kunyungilila lalo bimanga bendi babali.
22 Co mwafwa ya kutuma kwa mabele, akalya barta mwafwa banu boshe bakasala mu lifuti bakalya barta na buki.
23 “Ha litangwa olyo, mu myela muje mwakele miti ya binyu 1,000 ya kupwa mu seteko ya bimbongo bya siuva 1,000 mukakala lika biputa bya mingonga na mwila.
24 Banu bakayako na mata a lusipa na mikili mwafwa lifuti lyoshe likashula biputa bya mingonga na mwila.
25 Co ha minkinda hoshe haje habakele na kusheba na litemo kuukasa kuyaho mwafwa ukatewa biputa bya mingonga na mwila. Ei minkinda ikapwa myela ya kulila bingombe na myela ya kulyatangela bimanga.”
Majwi a kwinikila
^ Nambe hamo “kaifungulwile.”
^ Kulumbununa “Baje Banasalako Bakebo Lika Bakeluka.”
^ Nambe hamo “kuijujwisa.”
^ Lijwi na lijwi “kuitabula hakati.”
^ Nambe “Sheo,” kulumbununa cihilo ca cifwisa ca banu boshe. Taleni Majwi Abanalumbununa.
^ Kulumbununa “Njambi Ali Hamo Netu.”
^ Kulumbununa, Yufreti
