Isaya 8:1-22
8 Yehova wanjilekele ngwendi: “Ambata mbazubwila yakama ya limanya usonekeho na cisonekeso ngwobe, ‘Maha-shala-hashi-bazi.’*
2 Co njishaka ngwange kapilistu Uliya na Zakaliya muna Jebelekiya, bakaleho ba kulongwa, basoneke ngwabo banapu bakaleho.”
3 Ngeci, njalilalele na* kapolofweto wa munakazi,* co wemitile, co mu kwita kwa simbu wakitile mwana wa munalume. Yehova wanjilekele ngwendi: “Muluke ngwobe Maha-shala-hashi-bazi,
4 mwafwa simbu kanda ou mwanike azibuke kusana ngwendi ‘Tate’ na ‘Nana,’ bufuko bwa Damasika na bufuko bwa Samaliya bakabwambata na kubunena kuli mwene wa Asiria.”
5 Yehova wanjilekele lalo ngwendi:
6 “Ha kuwana ngwe aba banu banabyana mema a mu Shilowa aje ali na kwita mwamubwa,Co banabwahelela mwafwa ya Lezini muna Lemalaya,
7 Yehova akatuma mwene wa AsiriaNa maswalale bendi boshe mangana babalwise.
Ou mwene akapwa ngwe mema amangi a nzili a mu Ndonga*Aje ashulisa bana bayoKweta na ha nunda,
8 Na kukobela mu Juda.
Akapwa ngwe mema a libazi, amangi kweta na mu singo.
Akajangumuna mambaba endi na kufwika lifuti lyobe lyoshe, ngwe mwa kazila,Obe Manuwele.”*
9 Eni miyati ya banu, babulumuneni, oloni bamisanyozola sanyu-sanyu.
Tolilileni, yeni boshe mutunda ku mitambela ya kulako ya ha lifuti-libu!
Libwaheseleni kulwa nzita, oloni bamisanyozola sanyu-sanyu!
Libwaheseleni kulwa nzita, oloni bamisanyozola sanyu-sanyu!
10 Tumbeni butumbe, oloni kububwaha!
Endekeni byoshe bimushaka, oloni kubilingiwa,Mwafwa Njambi ali netu!*
11 Nzili ya Yehova yakele hali yange, co wanjinangwile ngwendi keti njikabangeye ngila yaba banu. Wendekele ngwendi:
12 “Byuma bibasana aba banu ngwabo kutengulukila, keti ubisane ngwobe kutengulukila.
Keti utewe byuma bibatewa,Keti bikujajese.
13 Yehova wa maswalale ikeye iunapande kumona ngwobe wa kujela,Ikeye iunapande kuzibila lyoba,Co ikeye iunapande kujaja.”
14 Akapwa ngwe mwela wa kujela,Oloni akapwa ngwe limanya lije litanwisa,Na libwe lije liwisaBinjibo byoshe bibali bya Isalele.
Akapwa ngwe muheto na bwandaKu banu boshe baje batunga mu Jelusalema.
15 Bwingi bwabo bakatanuka na kuwa, co bakapokoka.
Bakatsa mu muheto, co bakabakwata.
16 Bunga-bunga libulu lya bukaleho bubanasoneka.
Kanyamesa lishiko* mukati ka bandongesi bange!
17 Njitwalelelaho kubandamena Yehova uje nashwekela bakunjibo ya Jakobu cihanga cendi, co njimulabelela.
18 Tala! Yange na bana bananjana Yehova tunapu ngwe bizibukiso na bikomokeso mu Isalele bya kutunda kuli Yehova wa maswalale uje wakala ha Munkinda wa Siyone.
19 Co nga bamileka ngwabo: “Ihuleni baka-kwendeka na bakulu nambe baka-kumikiya baje bakayebeta-yebeta na kuningita,” mutaba ndi? Kuma banu kubapandele kwihula Njambi yabo ndi? Biñanda bya banu ba kuyoya kuma banapande kubihula batsi ndi?
20 Banapande kwihula lishiko na bukaleho bubanasoneka.
Nga kubendeka kwesekesa neli lijwi, co kubesi na ceke.
21 Co umo na umo wabo akaita mu lifuti oku ali mu kayando na njala, co mwafwa ya njala na kulubala akasinga mwene yendi na Njambi yendi oku natala mwilu.
22 Co mwakatala ha lifuti-libu, akamona lika bukalu na lisusulungu na mbundu-mbundu na bisimbu byabikalu na lisusulungu lyakama, co kakamono ceke.
Majwi a kwinikila
^ Hamo kulumbununa “Kuzambwila Byuma Bibanafungulula; Kwija Bwasi na Kupukula.”
^ Lijwi na lijwi “njashwenene.”
^ Kulumbununa, “munakazi wa Isaya.”
^ Kulumbununa, Yufreti.
^ Lizina lya Cihebelu libananungulula ngwabo “Njambi ali netu” linapu Manuwele. Taleni Isa 7:14; 8:8.
^ Nambe “bilongesa.”
