Juda 1:1-25
1 Yange Juda, ndungo ya Yesu Kristu, nji ndolome ya Jakobu. Njili na kusonekela yeni babanasana kuli Njambi, yeni babazema kuli Njambi Tate, yeni babananyungila Yesu Kristu ngwange:
2 Njambi abwezelele kutetela kwendi na kwoloka kwendi na cizemo cendi kuli yeni.
3 Babusamba bange, nameme hakulibanga njesekele mwoshe munjaselele ngwange njimisonekele bya kwoboka kwetu tubaboshe, oloni njamono ngwange kunapande kumisonekela bya kumishongangeya mangana mutwaleleleho kulwila likulahelo lyeni na nzili, likulahelo lije libanene lumolika kuli baje bakujela.
4 Njili na kulinga ngoco mwafwa kuli banu bamo banalibembe na kukobela mukati keni. Aba banu babendekele laja mu Bisoneka ngwabo bakabasompa. Aba banu kubesi na kuzibila Njambi lyoba, co bali na kupangesa ngozi ya Njambi mu kulinga byuma byabibi kwa kujeneka shwamwa,* co lalo banabyana shukulu yetu na Mwata wetu Yesu Kristu.
5 Nameme muzibuka mwamubwa byuma byoshe ebi, njishaka kumyanukisa ngwange, Yehova wobwele banu kubatundisa mu lifuti lya Ijipiti, oloni munima yebi, wanyongesele baje kubakele na likulahelo.
6 Co lalo tungelo baje basezele cipangi cabo,* baje batundile kuje kubakele hakulibanga, nabaka mu malyenge, co nabashokela mu lisusulungu lya kuzibala manene mangana babandamene litangwa lyakama lya kubasompa.
7 Mu ngila imolika, banu ba mu Sodoma na Gomola na banu ba mu binganda bije byabazengelekele balikobelesele manene mu bupangala,* co lalo bapangesele mashungu abo a situ mu ngila ije kuyapandele. Co banapu mwanja kuli yetu omwo babanene kashitiko ka tuhya twa myaka yoshe.
8 Nameme ngoco, aba banu bapwa lalo baka-kulota manene, co bali na kujwalesa situ yabo, bali na kulumbilisa baje bali na moko, co lalo bali na kwendeka mwamubi baje bali na bumpau.
9 Oloni omwo Mikaele, kangelo wakama walibyananganene na Liyabolo mwafwa ya mubila wa Mosesa, Mikaele walikehesele, co kamusompele, oloni wendekele ngwendi: “Yehova akutenukile.”
10 Oloni aba banu bali na kwendeka mwamubi byuma bije kubazibisisa. Co bije bibazibisisa, babizibisisa ngwe tusitu ba kujeneka kusinganyeka, bali na kulijwalesa bakebo babenya.
11 Banabindama manene, mwafwa banakabangeya ngila ya Kaini na kuya mu ngila ya Balamu mwafwa ya kutonda cikandelela, co bananyongo mwafwa ya kukabangeya endekesi ya Kola ya kutengulukila.
12 Aba banu banapu ngwe mamanya aje anabanda kwisi ya mema mubali na kulya neni ha bilika byeni bya cizemo, banapu ngwe tunyungi baje bali na kulilisa bakebo babenya, banapu ngwe mashelwa a kujeneka nyonzi aje ali na kupekumuka na lihunzi, banapu ngwe miti ya kujeneka kwima bushuka ha simbu iinapande kwima, inatsi lubali,* co banaitukula na mizi yayo,
13 banapu ngwe mankimba a kutenuka a mu kalunga-ndonga, bilinga byabo bya shwamwa binapu ngwe lifulu lije lifumuka ha kalunga-ndonga, banapu ngwe bingongonosi bije bili na kwendangana ngoco, co banabanyungila lisusulungu lya kuzibala bwii, lya myaka yoshe.
14 Inoki uje wapwile wa bu 7 kutunda kuli Adama nendi wapolofwetele byabo ngwendi: “Taleni! Yehova wezile na makulukazi* a bakujela bendi
15 kwa kusompa banu boshe na kwana mulonga baka-bubi boshe, mwafwa ya bilinga byabo bije bili na kumwesa ngwabyo kubesi na kutewa Njambi, co lalo aba baka-kujeneka kutewa Njambi bendekele byuma bya kukomokesa hali ikeye.”
16 Aba banu banapu baka-kutatoka, banapu baka-kuyayabala bya buyoye bwabo, bali na kukabangeya mashungu abo, co tunwa twabo tukendeka lika bya kulishasha oku balikwisa ngwe bashangazala* bakwabo mangana bawaneneho cimo.
17 Oloni yeni babusamba bange, anukeni byuma bibamilekele* hakulibanga tupositolo ba Mwata wetu Yesu Kristu,
18 mubamilekele ngwabo: “Mu simbu yamamaneselelo kukaija baka-kushendumuna, baje bakakabangeya mashungu abo.”
19 Aba banu bali na kumilingisa mulyangunune, bali na bilinga bya busitu, co kubesi na kwaka mana ku byuma bya ku sipilitu.
20 Oloni yeni babusamba bange, kanyameseni likulahelo lyeni lya kujela, co lombeleni mu kulitombola na sipilitu ya kujela
21 mangana mutwaleleleho kukala mu cizemo ca Njambi omwo mubandamena kutetela kwa Mwata wetu Yesu Kristu na kuyoya kwa myaka yoshe.
22 Co lalo, twaleleleniho kutetela baje bali na kuuwasana,
23 boboleni ha kubokola mu tuhya. Oloni twaleleleniho kutetela bakweni, oku mulinga ngoco na lyoba, co zindeni na bizalo bije binabihya na bilinga byabo byabibi.
24 Njambi asa kuminyungilila mangana keti mutanuke. Asa kumikwasa mwimane ku mesho endi a bumpau kwa kujeneka kapenga oku munabwahelela manene.
25 Napu Njambi yetu umolika, Mwobole wetu kwitila muli Mwata wetu Yesu Kristu, co kuli ikeye kukale bumpau, bukama, nzili na moko, kutunda kusañulu kweta na lelo lino na myaka yoshe. Ameni.
Majwi a kwinikila
^ Mu Cigriki a·sel′gei·a. Taleni Majwi Abanalumbununa.
^ Nambe “basezele myela yabo ya mwilu.”
^ Taleni Majwi Abanalumbununa.
^ Nambe “inatsililila.”
^ Nambe “banu babangi-bangi.”
^ Nambe “bashungwiya bifwa bya.”
^ Nambe “bibapolofwetele.”
