Loma 1:1-32
1 Yange Paulu, ndungo ya Kristu Yesu, ibanasana kupwa kapositolo, ibanangula kwambulula muzimbu waubwa wa Njambi,
2 muzimbu uje wakulahesele cimweja Njambi mu Bisoneka bya kujela kwitila muli tupolofweto bendi,
3 kutalesa kuli Munendi uje watundile ku naanga ya Devidi omwo wasemukile kupwa munu.
4 Twalimwena mwamubwa ngwetu ou ikeye Muna Njambi, mwafwa Njambi wapangesele nzili ya sipilitu yendi ya kujela kumusangula ku batsi, (ou ikeye bene Yesu Kristu Mwata wetu,
5 co kwitila muli ikeye, twatambwile ngozi yakama na bupositolo mangana tukwase banu boshe ba ku mafuti bakale na likulahelo, bononoke, na kusingimika lizina lyendi.
6 Neni muli mukati ka baka-mafuti babanasanena kuli Yesu Kristu).
7 Kuli yeni boshe muli mu Loma, yeni babazema kuli Njambi, babanasana kupwa bakujela:
Ngozi yakama na kwoloka bya kutunda kuli Njambi Tate yetu na kuli Mwata Yesu Kristu, bikale neni.
8 Hakulibanga, njikandelela kuli Njambi yange kwitila muli Yesu Kristu hali yeni mubaboshe, mwafwa likulahelo lyeni bali na kulyendeka mu kaye koshe.
9 Mwafwa Njambi uje injili na kupangela cipangi ca kujela na mbunge yange yoshe ha kwambulula muzimbu waubwa wa Munendi, napu mukaleho wange munjikamyaka mu malombelo ange simbu yoshe,
10 oku njilambelela ngwange nga citaba njase kwijoni kuli yeni, nga mukemwo munai cizango ca Njambi.
11 Mwafwa njinashungwiya kumimona mangana njakumyane bwana bwa sipilitu, mangana mukanyame,
12 nambe ngwange twase kulitakamesa umo na mukwabo kwitila mu likulahelo lya umo na umo wetu, lyeni neli lyange.
13 Oloni bandolome njishaka muzibuke ngweni kakangi njashakele kwija kuli yeni, oloni kuli byuma bimo binanjonowesa, kweta na lelo lino. Njashakele njije okwo mangana nokwo njakuwaneko bushuka ngwe munjinabuwanena kuli baka-mafuti eka oshe.
14 Njili na mukuli kuli Bagriki na kuli baka-kwija,* kuli baka-mana na kuli baka-kujeneka mana.
15 Ngeci, njashungwiya kwa kwambulula muzimbu waubwa nokwo kuli yeni ku Loma.
16 Kunjizibila shwamwa muzimbu waubwa, mwafwa ukewo nzili ya Njambi ya kwobwelamo munu woshe uje ali na likulahelo, hakulibanga kuli Kajuda, co na kuli Kagriki.
17 Mwafwa kwitila mu muzimbu waubwa, Njambi ali na kusholola kusungama kwendi kuli baje bali na likulahelo, co likulahelo lyabo lili na kukanyama, ngwe mubanasoneka ngwabo: “Oloni munu wa kusungama ayoya mwafwa ya likulahelo lyendi.”
18 Mwafwa butenu bwa Njambi buli na kusholoka kutunda mwilu mu kulwisa bilinga byoshe bya kujeneka kuzibila Njambi lyoba na bilinga byoshe bya kuhenga bya banu baje bali na kulyatelela busunga mu ngila ya kuhenga,
19 mwafwa bibanasa kuzibuka hali Njambi bali na kulimwenabyo mwamubwa mukati kabo, mwafwa Njambi nabisholola kuli bakebo.
20 Bifwa byendi bije kutwasa kumona, kulumbununa nzili yendi ya myaka yoshe na Bunjambi bwendi, banalimwenabyo mwamubwa tunde bene ha kutanga kwa kaye kutwala kulutwe, mwafwa bakabinangukila mu byuma byakutanga, mangana keti base kuwana mwakulipatungwila.
21 Mwafwa nameme bazibukile Njambi kubamwanene bumpau ha kupwa Njambi yabo, co kubamukandelelele, oloni bisinganyeka byabo byapwile byangoco, co lalo bimbunge byabo bya bulema byazibalele.
22 Nameme balimwene ngwabo bali na mana, oloni batengulukile kupwa bilema.
23 Kutubakana kwana bumpau Njambi uje kesi kutsa, bakebo banene bumpau ku tumponya ba cifwa ca banu baje bakatsi, naba ba cifwa ca tuzila, naba ba cifwa ca tusitu ba mendi awana, naba ba cifwa ca byuma bya kukalaba.
24 Ngeci Njambi wabecelelele balinge byuma bya mazilo kwesekesa na cizango ca bimbunge byabo, mangana bashawise mibila yabo.
25 Batabele makuli kutubakana kutaba busunga bwa Njambi, co balemesele byakutanga na kubipangela cipangi ca kujela kutubakana kulemesa Muka-kutanga uje ibakashangazala myaka yoshe. Ameni.
26 Mukemwo Njambi wabecelelele bakale na mashungu a kulilala a kutubakanesa, mwafwa banakazi mukati kabo batengulwile cifwa cabo ca kulilala na banalume na kushangumuka kulilala na bakwabo banakazi.
27 Co na banalume nabo basezele cifwa cabo ca kulilala na banakazi na kushangumuka kulishungwiya mwabomwabo, banalume na bakwabo banalume, balingile byuma bya mazilo, co batambwile kashitiko* kabo mu kushula kwesekesa na bubi bwabo.
28 Ha kuwana ngwe kuzibuka Njambi bacimwene kupwa cangoco, Njambi wabecelelele bakale na bisinganyeka bije katabesele mangana balinge byuma bije kubyapandele.
29 Co bashulile na bilinga byoshe bya kuhenga, na bubi, na nuna* na byuma byabibi, bashulile na cipululu, kutsiya banu, lwozi, kukwisa na bizindo, bapwile baka-kufweya,
30 baka-kwendeka bakwabo mwamubi, baka-kuzinda Njambi, baka-likamba, baka-kulyalesa, baka-kulishasha, baka-kutumba butumbe bwa kulinga byuma byabibi, baka-kujeneka kwononoka bisemi,
31 baka-kujeneka kuzibisisa, baka-kujeneka kushulisilila bikulaheso, baka-kujeneka kuzema bakwabo na baka-kujeneka kutetela.
32 Nameme aba banu bazibuka mwamubwa lishiko lya Njambi lya kusungama, lya kwendeka ngwalyo banu bali na kulinga ebi byuma banapande kutsa, kubesi lika na kutwalelelaho kubilinga, oloni bali na kutabesa na baje bali na kubilinga.
Majwi a kwinikila
^ Nambe “baje keti Bagriki.”
^ Nambe “fweto yabo ije inabapande.”
^ Nambe “kushungwiya cambala.”
