Loma 11:1-36
11 Co njihula lalo ngwange, kuma Njambi wabyanene banu bendi ndi? Embwe! Mwafwa nange nji Kaisalele, nji muna* Abrahamu, njitunda ku muyati wa Benjamini.
2 Njambi kabyanene banu bendi baje bangwile hakulibanga. Kuma kumuzibuka bicendeka cisoneka kutalesa kuli Eliya, mwalambelelele Njambi na kuyayabala hali Baisalele ndi?
3 Wendekele ngwendi: “Yehova, banakindula mitula yobe, banatsii tupolofweto bobe, yange lika njinasalako, co hanwoni yange ibashaka kutsiya.”
4 Oloni lijwi lya Njambi lyendekele bika kuli ikeye? Lyendekele ngwalyo: “Njicili na banu 7,000 baje kubatsikamenene Bale.”
5 Mu ngila imolika, na hano kucili baje banasalako babanangula mwafwa ya ngozi yakama ya Njambi.
6 Ngeci, nga banabangula mwafwa ya ngozi yakama, co kutwendeka lalo ngwetu banabangula mwafwa ya bipangi byabo. Ngwe ngoconi, ngwe ngozi yakama kutuyendeka lalo ngwetu inapu ngozi yakama.
7 Bikoni bitwendeka? Banu ba Isalele kubawanene byuma bije bibatondele manene, oloni babandondo lika baje babangwile bakebo babitambwile. Aba boshe bonowele kuzibisisa.
8 Kunapu lika ngwe mubanasoneka ngwabo: “Njambi nabana sipilitu ya kulala tulo twakama, mesho abo kuwesi na kumona, co matwi abo kuwesi na kuziba, kweta na lelo lino.”
9 Co lalo Devidi wendekele ngwendi: “Mesa yabo ipwe muheto na ciliba na citanwiso na cuma ca kubanenaho kashitiko.
10 Mesho abo azibale mangana keti bamone, co balingise bakulame simbu yoshe.”
11 Ngeci, njihula ngwange, Kuma Baisalele batanukile na kuwa kuwililila ndi? Embwe! Oloni kusebuka kwabo kunanene kwoboka ku banu ba ku mafuti mangana Baisalele bazibe lifuwa.
12 Nga kusebuka kwabo kunanene bufuko mu kaye, na kutepuluka kwabo kunanene manene bufuko ku banu ba ku mafuti, co mbunga yabo yoshe mubakaikungululani, bufuko bukalibwezelela manene!
13 Hanwoni njendeka kuli yeni banu ba ku mafuti. Ha kuwana ngwe nji kapositolo ku baka-mafuti, njana cipangi cange bumpau*
14 mangana njimone indi njasa kuzibisa lifuwa banu bange,* na kwobolako bamo mukati kabo.
15 Nga kubabyana kunalingisa kaye keluke kuli Njambi, co kubatambula kukapwa bene kubelwisa ku kuyoya kutunda ku batsi.
16 Co lalo nga mutamba wa mukasha uje ubamona ngwe bushuka bwakulibanga unapu wa kujela, co na mukasha woshe unapu wa kujela. Co nga muzi wa muti unapu wa kujela, na minango yawo lalo inapu ya kujela.
17 Oloni minango imo ya kuje ku muti baipamwine, co yobe bakunungilile mukati ka ije minango ikwabo, nameme wapwile u muti wa olive wa mu shwata. Hanwoni nobe uli na kulya bufuko bwa muzi wa muti wa olive.
18 Keti usinganyeke ngwobe u wa seho kutubakana minango ikwabo. Nga usinganyeka ngwobe u wa seho kuitubakana, co anuka ngwobe, keti yobe unakwata muzi, oloni muzi ukewo unakwata yobe.
19 Co ukendeka ngwobe: “Minango baipamwine mangana banungileko yange.”
20 Mukemwo bene, babapamwineko mwafwa kubakele na likulahelo. Oloni yobe unemana mwafwa ya likulahelo lyobe. Ngeci keti ulyalese, kala na lyoba.
21 Mwafwa nga Njambi kecelelele minango hayo ya muti, usinganyeka ngwobe yobe akwecelela ndi?
22 Nobe walimwena ngwobe Njambi ali na ngozi, co lalo ali na butenu. Wakele na butenu kuli baje bawile, mwafwa kubakele na likulahelo. Oloni Njambi nakuzibila ngozi, cakama lika nga utwalelelaho kukala mu ngozi yendi, keti ngoconi nobe bakakutetako.
23 Co nabo lalo nga bashangumuka kukala na likulahelo bakabanungilako, mwafwa Njambi asa kubanungilako lalo.
24 Mwafwa nga yobe ibatetele ku muti wa olive wa mu shwata, bakunungilile ku muti wa olive wa kukuna, nameme kubesi kulinga ngoco kakangi, co ije minango ibatetele ku muti wa olive wa kukuna ibwaha manene kuinungila lalo ku muti kubaitetele!
25 Mwafwa njishaka ngwange muzibuke eli lihungu lya kujela bandolome, mangana keti mulimone kupwa ba kunyanyama: Baisalele bamo batwalelelaho kujeneka kuzibisisa kweta noho haikapwilamo mbunga yoshe ya banu ba ku mafuti.
26 Co mu ngila ei mukemwo mubakobokela Baisalele boshe. Kunapu lika ngwe mubanasoneka ngwabo: “Mwobole akatunda mu Siyone, co akatundisa bilinga byabibi ku batekulwila ba Jakobu.
27 Co eci cikeco cikapwa cikumiiyo cange nabo munjikatundisa bubi bwabo.”
28 Cili bene banapu bitozi ba muzimbu waubwa, co oku kunamikwasa. Oloni Njambi ikeye wabangwile, co wabazema mwafwa ya bakukulwila babo.
29 Njambi kakalibeye ha bwana bwanana, co lalo kakalibeye ha kusana baje banasana.
30 Mwafwa kumwakele na kwononoka Njambi, oloni hano banamitetela mwafwa ya kujeneka kwononoka kwabo.
31 Hano bakebo kubesi na kwononoka, co Njambi namitetela, oloni nabo lalo asa kubatetela ngwe mwamitetelele yeni.
32 Mwafwa Njambi nashokelele boshe mu kujeneka kwononoka mangana boshe abatetele.
33 Bufuko bwa Njambi na mana endi na mangana endi byapwa bya kuloba manene! Iya asa kuzibisisa kusompa kwendi? Iya asa kuzibisisa bingila byendi?
34 Mwafwa “iyajo nazibuka bisinganyeka bya Yehova? Nambe iya napu muka-kumunangula?”
35 Nambe “iya wabangele kwana Njambi cuma, mangana Njambi amwilwisileco?”
36 Mwafwa byuma byoshe byatunda kuli Njambi, co kubili mwafwa yendi, co lalo mwafwa ya biyongola byendi mukemwo biliko. Bumpau bukale kuli ikeye ku myaka yoshe. Ameni.
Majwi a kwinikila
^ Nambe “mbuto ya.”
^ Lijwi na lijwi “njamesa cipangi cange.”
^ Lijwi na lijwi “situ yange.”
