Luka 14:1-35
14 Simbu imo, Yesu waile na kulya mu njibo ya mukulunu wa Bafalisi ha Sabata, co bakele na kumutalelela.
2 Co kulutwe lwendi kwakele munalume uje wakele na mushongo wa kuzimba mubila.
3 Ngeci Yesu wehwile baje bazibuka manene Lishiko na Bafalisi ngwendi: “Kuma batabesa kukangwisa munu ha Sabata, indi kubatabesa?”
4 Oloni bolokele lika kulu. Ngeci wakwatele uje munu, wamukangwisile na kumuleka ngwendi aye.
5 Co wabehwile lalo ngwendi: “Iya hakati keni nga munendi nambe ngombe yendi nawila mu lisima ha litangwa lya Sabata kamutundisamo bwasi-bwasi?”
6 Oloni kubasele kumukumbulula.
7 Yesu mwamwene baje babalanyele bali na kulyangwila myela ya bulemu, wabalekele cakumwenako ngwendi:
8 “Nga munu umo akulanya ku cilika ca bulo, keti ukashendabale ku mwela wa bulemu. Mwafwa hamo nalanya lalo munu wa bulemu kutubakana yobe.
9 Co uje namilanya mubaboshe mu babali mwaija, akuleka ngwendi, ‘Katuka aha ha mwela usezeleho ou.’ Co uya na shwamwa yobe muukashendabala ku mwela wa kwisi manene.
10 Oloni nga banakulanya, ya ukashendabale ku mwela wa kwisi manene mangana munu uje nakulanya mwaija, akukuleke ngwendi, ‘Kabusamba, ya haje ha mwela wa bulemu.’ Co bakweni boshe babanalanya bakusingimika.
11 Mwafwa woshe alijundula bakamukehesa, co woshe alikehesa bakamujundula.”
12 Kutundaho lalo, walekele uje wamulanyele ngwendi: “Nga ubwahesa cakulya ca mutanya nambe ca mangwezi, keti ulanye babusamba bobe nambe bandolome bobe, nambe babushoko bwobe, nambe baka-kufuka baje bawatunga nabo. Mwafwa hamo nabo basa kukulanya, co itenguluka kupwa fweto kuli yobe.
13 Oloni nga ubwahesa cilika, lanya tuhutu, bakujenduka, biyanga na tupuputwa.
14 Co ubwahelela, mwafwa kubesi nebi bya kukwilwisila. Mwafwa yobe bakakwilwisila ha simbu ya kusanguka kwa baka-kusungama.”
15 Umo wa baje babalanyele mwazibile ebi byuma, walekele Yesu ngwendi: “Nabwahelela uje alya* mu Bumwene bwa Njambi.”
16 Yesu walekele uje munu ngwendi: “Munu umo wabwahesele cakulya cakama ca mangwezi, co walanyele banu babangi.
17 Ngeci ha simbu ya kulya ca mangwezi, watumine ndungo yendi akaleke baje balanyele ngwendi, ‘Ijeni, mwafwa byuma byoshe binabwaha laja.’
18 Oloni boshe bashangumukile kulitangesa. Umo wamulekele ngwendi, ‘Njinalanda lihya, co njinapande kuya na kulimona. Njikulomba unjikonekeleko.’
19 Mukwabo wendekele ngwendi, ‘Njinalanda bingombe 10 ba ku bijoko, co njili na kuya na kubeseka. Njikulomba unjikonekeleko.’
20 Weka wendekele ngwendi, ‘Ololo njinambata munakazi, ngeci kunjasa kwija.’
21 Ngeci uje ndungo wezile na kuleka shukulu yendi ebi byuma. Co shukulu yendi walubalele, mukemwo walekele uje ndungo ngwendi, ‘Ya bwasi-bwasi mu bingila byakama na mu bingila bya nganda ukanene tuhutu, bakujenduka, tupuputwa na biyanga.’
22 Mukwetile simbu, uje ndungo wendekele ngwendi, ‘Shukulu, njinalingi byuma biunanjilekele, oloni kucinasala mwela.’
23 Ngeci shukulu yendi wamulekele ngwendi, ‘Ya mu mikwakwa na mu tubingila ukashongangeye banu baije mangana njibo yange ishule.
24 Mwafwa njimileka ngwange, baje banjinalanyele, naumo wahi amakela ku cakulya cange ca mangwezi.’”
25 Mbunga yakama ya banu bakele na kwenda hamo na Yesu. Ngeci watengulukile na kubaleka ngwendi:
26 “Nga munu aija kuli yange, oloni kazindi ishe na ina na munakazi wendi na bana bendi na bandolome bendi na bandokazi bendi, nambe bene mwonyo* wendi babenya, kasa kupwa ndongesi yange.
27 Woshe kambata citi cendi ca kuyandesela* na kunjikabangeya, kasa kupwa ndongesi yange.
28 Cakumwenako, iya hakati keni nga atonda kutunga kaposhi, kabanga tahi kutumama hasi na kutanda bimbongo byapangesa mangana amone indi ali na bimbongo bya kupwamo bya kukamanesa?
29 Keti ngoconi, asa kutunga lika lubula, oloni onowa kukamanesa, co baje bali na kumumona bashangumuka kumujola,
30 ngwabo: ‘Ou munu nashangumukile kutunga, oloni nonowa kumanesa.’
31 Co lalo mwene muka aya na kulwisa mukwabo mwene mu nzita, kabanga tahi kutumama hasi na kuliyongola na bakwabo mangana amone indi ikeye na maswalale 10,000 asa kulwisa uje aija kuli ikeye na maswalale 20,000?
32 Nga amona ngwendi kasa kulinga ngoco, co simbu uje mukwabo acili kulako, atuma cibunga ca miluwa bendi bakasimutwiye nendi mangana bakale mu kwoloka.
33 Mu ngila imolika, woshe kaseze byuma byendi byoshe, kasa kupwa ndongesi yange.
34 “Cili bene mwongwa wapwa waubwa, oloni nga mwongwa unashamuka, wasa kukala bati lalo na nzili?
35 Kuubwaha kuwaka mu libu nambe kuupwisa bwilo. Banu baumbila lika kuti. Woshe ali na matwi atolilile.”
Majwi a kwinikila
^ Lijwi na lijwi “uje alya likende.”
^ Nambe “kuyoya.”
^ Taleni Majwi Abanalumbununa.
