Nga mwanike ikeye a tutambula ha njuvo, cho tunapande kuthimutwiya na vithemi vendi. Echi chimwetha ngwavo tunavathingimika. (Vit 6:20) Nga mwanike atulanya ngwendi tukovele mu njuvo, cho tunapande kuvyana mukathingimiko. Nga vithemi vendi vaiho ha njuvo, cho tunapande kumuthethza na kwilukilako thimbu ikwavo.

Nambe nga tumona ngwetu mwanike najundukako, anga vene tunapande kuthimutwiya na vithemi vendi. Nga vithemi vendi vaiho, cho tunatha ku mwihula mangana tuthzivuke indi vakamutavetha kutanda mavulu ashaka. Umona vakamutavetha, cho twatha kumwana mavulu na kumuleka akenge ha jw.org.

Nga twilukila kuli mwanike uje namwethele kuvwahelela, cho tunapande kwendeka na vithemi vendi tahi. Echi chivakwatha kuthzivuka vitunendela na kuthingimika kunangula kwa mu Mbimbiliya kuje kunakundama ku vinanga. (Mya 119:86, 138) Nga tumwetha kathingimiko na kwaka vithemi mbunge, cho twana vukaleho vwavuvwa ku nanga na kushokolola vingila vikwavo vyakuvambulwila.—1Pe 2:12.