Ha webusaiti yetu ya jw.org bakakaho mabulu na mavidio abanabwahesela kweta ku bimbunge bya banu bababwa. (Bil 13:48) Kakangi bakakaho biñanda bili mu mizimbu nambe bibakasinganyeka banu nambe bibali na kwendeka.

Mwasa kupangesa bati webusaiti yetu ya jw.org mu cipangi ca kwambulula?

• Kobeleni ha webusaiti yetu kushwa kumo. Nangukeni byuma byabiha bibanakaho na kumona mumwasa kubipangesela mu kukwasa munu ashaka kulilongesa. (Nga mushaka kuwana bikwabo bibanaka ololo ha webusaiti yetu nyatekeni ha mutamba wa “See More.”) Kutala-tala ha webusaiti yetu kushwa kumo kumikwasa muwane bingila byabiha bya kupangesa mu lihya.

• Pangeseni mabulu na mavidio a ha webusaiti yetu mu kushangumuka kusimutwiya na banu mu lihya. Biñanda bituwanamo byasa kutukwasa tuzibuke bibali na kusinganyeka banu ba mu citingitingi cetu.

• Mweseni banu bili ha webusaiti yetu. Balekeni biñanda bimo na kubakwasa bazibuke mwakuwanena obyo biñanda ha webusaiti.

• Tumineni banu linki. Banu bamo kubesi kushaka kusimutwiya netu, oloni banasa kubwahelela kukobela ha webusaiti yetu. Ngeci, mulinga mwamubwa manene kutuma linki ya mwakukobelela ha webusaiti nambe ya ñanda imo nambe ya vidio kuli munu uje namwesa kubwahelela.