Mä yäˈädë jëmëjt 2022, yëˈë jeˈeyë të yaˈixy të yajmëdoyë mä notisyë ko jäˈäy tsyiptundë, yˈamääytyaˈagyë meeny sentääbë ets ko wyindëgoyë Naxwinyëdë. Perë Biiblyë, yëˈë yajxon nyimaytyakypy tiko tyam ja duˈun tyuny jyatyëty.

Tijaty të tyuny të jyatyëty 2022, ¿jamdaa ti dyaˈˈadëy?

 Tijaty të tyuny të jyatyëty mä yäˈädë jëmëjt të nyaxy, yëˈë xytyukˈijxëm ko yëˈë ndukjukyˈäjtëm mëdiˈibë Biiblyë tyijpyën “ja tiempë mëdiˈibë jëjpkëxanëp” (2 Timoteo 3:1, TNM) Yäˈädë tiempë mëdiˈibë jëjpkëxanëp, ja tsyondaky mä jëmëjt 1914. Okˈix wiˈix tyuˈugyë tijaty tyam ja tuun jäjtëp mëët tijatyë Biiblyë ojts yajnaskäjpxë:

 “Tsip” (Matewʉ 24:6).

•    “Mä yäˈädë jëmëjt, jap Europa tap jatëgokë jäˈäy jyantsy tsyiptundë”. a

 “Mëk yuu” (Matewʉ 24:7).

•    “Mä yäˈädë jëmëjt, nëgooyë të jyaˈäjnë yuu”. b

 “Mëk päˈäm” (Lukʉs 21:11).

•    “Taaˈäjtp yäˈädë päˈäm mëdiˈibë yajtijp Polio, viruela del mono etsë COVID-19 mëdiˈibë axtë tyambäädë jäˈäy yaˈˈayoopy. Yäˈädë päˈäm nëgooyë yˈokmëkˈäjnë ets pojënë nyinaxy, ets yajwindëgoobyë niniˈkx këbäjk”. c

 “Yaˈixët ja ijxwëˈëmën diˈibë naxwinyëdë jäˈäy tsyëˈëgëdëp” (Lukʉs 21:11).

•    “Mä yäˈädë jëmëjt nëgooyë mëk të yˈäänë, tyëtsëˈknë it naxwinyëdë, të toyë jëën yˈayoˈonmoˈoy etsë nëë tuu. Miyonkˈamë jäˈäy të dyajtëgoytyë jyëën tyëjk ets të yˈooktë milˈam”. d

 ‘Ko jäˈäy nyaynyibëdëˈëgyë’ (Lucas 21:9, TY).

•    “Nuˈun të tyuˈuyeˈey 2022, mayë jäˈäy të jyantsy jyotˈambëktë mët ko të yˈamääytyaˈagyë meeny sentääbë ets nan të tnibëdëˈëktë gobiernë mët ko të jyantsy tsyowbajtäˈäy tijaty”. e

Mä jëmëjt myiny kyëdaˈaky, ¿tijatyëdaa ak tunan ak jatanëp?

 Nipën tkanijawë tijaty tunan jatanëp mä jëmëjt 2023. Per mëdiˈibë nnijäˈäwëm, yëˈë ko ja Diosë gyobiernë tim tsojk dyajkutëgoyaˈany ja amay jotmay mëdiˈibë jaˈäjtp yä Naxwiiny (Daniel 2:44). Yäˈädë gyobiernë yëˈë mëdiˈibë yajkutëgoyaampy tijaty tyamë naxwinyëdë jäˈäy yaˈˈayoowëdëp ets yëˈëyë nëjkx yajtuny yä Naxwiiny tijatyë Dios tsyojkypy (Mateo 6:9, 10, TNM).

 Pääty oy ko xymyëjpëjktäˈägët ja käjpxwijënë mëdiˈibë Jesus yäjk ko jyënany ets nnayaˈijtëm wijy. Ix wiˈix ja tyam yˈadëy abëtsëmy nyaxwinyëdë tijaty ojts yajnaskäjpxë mä Biiblyë (Markʉs 13:37). Pën mˈaknijawëyaampy niˈigyë wiˈix tyam mbäät mbudëkëtyë Biiblyë ets wiˈix mbäädë mfamilyë jyotkujkmoˈoyëty ja kunuˈkxën mëdiˈibë miimp këdakp, anëëmë tuˈugë Jyobaa tyestiigë parë mbudëkëdët.