¡NˈOKNAYAˈIJTËM WIJY KEJY!
¿Mbäädë oyˈäjtën nˈëwxijt njëjpˈijxëm 2023? | ¿Wiˈixë Biiblyë tnimaytyaˈaky?
Mä yäˈädë jëmëjt tsyondaˈaky 2023, niˈamukë nˈëwxijt njëjpˈijxëm parë nyajpatëm agujk jotkujk mëdë familyë. ¿Ti mbäät xypyudëjkëm parë nyajpatëm jotkujk?
Biiblyë xyˈawäˈänëmë jotkujkˈäjtën
Biiblyë xyjyotkujkmoˈoyëm. Pes jyënaˈany ko ja amay jotmay mëdiˈibë tyam nbatëm këxäämp naxäämp ets kyaj yˈokjaˈˈatanë. Nanduˈun jyënaˈany ko tukëˈëyë mëdiˈibë ojts yajkujayë “yajkëxjääy es nnaytyukniˈˈijxëm es nmëdäjtëm ja maˈxtujkën es jotkujk nˈawijx njëjpˈijxëm diˈibë minäämp” (Romanʉs 15:4).
Pën mˈaknijawëyaampy tijatyë Biiblyë wyandakypy, käjpxë yäˈädë artikulo “La esperanza real de un mañana mejor”.
Mëdiˈibë nˈëwxijt njëjpˈijxëm mbäät xypyudëjkëm tyam
Ja jotkujkˈäjtën mëdiˈibë Biiblyë yˈawäˈänëp duˈun yëˈë “extëm ja pujxn diˈibë ja barkë wyoˈonˈijtypy” (Ebreeʉsʉty 6:19). Pes xyajnayjyäˈäwëm seguurë; xypyudëjkëm parë nmëmadakëm ja amay jotmay, parë kyaj mon tuk nnayjyäˈäwëm ets parë nyajpatëm jotkujk. Ix wiˈix näägë jäˈäy të tpäättë ja jotkujkˈäjtën:
Nijawë wiˈix tuˈugë jäˈäy mëdiˈibë nety jantsy ukp pyudëjkë tijatyë Biiblyë wyandakypy. Ixë bideo “Nˈaxëkˈijxëts wiˈixëtsë nety njukyˈaty”.
Ix wiˈix mbäät xypyudëjkëm tijatyë Biiblyë wyandakypy ko yˈooky tuˈugë jäˈäy mëdiˈibë mëk ntsojkëm. Ixë bideo Yajjotkujkmoˈoy pënaty të yˈooktë jyëëky myëguˈuk.
Niˈigyë nmëbëjkëm tijaty nˈëwxijt njëjpˈijxëm
Mayë jäˈäy wyinmaytyë ko oyëyäämp yäˈädë jukyˈäjtën, per kyaj yˈittë seguurë pën jantsy tunan jatanëp duˈun. ¡Tim tëgatsy mëdiˈibë Biiblyë wyandakypy! ¿Tiko? Mët ko yëˈë jap miimbë Jyobaa a yˈayuk, ja Dios “diˈibë kyaj yˈandaˈaky” (Titʉ 1:2). Yëˈëyë mëdiˈibë myëdäjtypy ja madakën parë dyaˈˈadëwët tijaty yëˈë të twandaˈaky, pes yëˈë “tyuumpy tukëˈëyë tijaty yëˈë tsyojkypy” (Salmo 135:5, 6).
Mijts mbäät xytyukjotkujkˈaty tijaty Biiblyë wyandakypy. Ets myaˈˈanmaapy parë xyˈëxpëkët këkpäät “ja Diosë jyaaybyajtën”, net mbäät mas niˈigyë xyajkëktëkë ja mëbëjkën (Apostʉlʉty 17:11). ¿Mˈokˈijxmatsaampy wiˈix yaˈëxpëkyë Biiblyë namayˈäjtën? ¡Tiko xykyaˈijxmatsy mä yäˈädë jëmëjt 2023!
a Dios txëwˈaty Jyobaa (Salmo 83:18).