Nuˈun të nyaxyë julië 2022 oy myääjëty yajmëdoyˈäjnë ttujyë jäˈäyë myëguˈuk ets dyaˈooky:

•   “Ko tuˈugë politikë mëdiˈibë xyëwˈäjtypy Shinzo Abe tsyujjë jäˈäy jap Japón, duˈunyë jäˈäy ojts wyëˈëmdë ets kyaj tmëbëkandë, pes mä taabë lugäär kyaj nëgoo jäˈäy nyayaˈoogëdë etsë gobiernë yajkubojkypy ko pënë tujn tmëjjëdity” (10 äämbë julië 2022, The Japan Times).

•   “Jap Dinamarca jyaˈty tuˈugë yetyëjk tujnmëët ets tˈatsëˈëk tˈajawë jäˈäy ets dyaˈooky nidëgëëk mä tuˈugë tiendë jap Copenhague” (4 äämbë julië 2022, Reuters).

•   “Jap Sudáfrica jyäˈttë niganäägë yetyëjkëty tujnmëët ets kyudujjëdë mä tuˈugë bar jap Soweto ets dyaˈooktë 15 jäˈäy” (10 äämbë julië 2022, The Guardian).

•   “Jap Estados Unidos ko nety xyëwdundë 4 äämbë julië, ja ojtsë jäˈäy yajtujtë naxy 220 ets yˈoˈktë” (5 äämbë julië 2022, CBS News).

 ¿Nëjkxëbëdaa näˈä jäˈäy kyaj tˈokyajˈoˈknë myëguˈuk? ¿Wiˈixë Biiblyë tnimaytyaˈaky?

 Biiblyë jyënaˈany ko yëˈë ndukjukyˈäjtëm “ja tiempë mëdiˈibë jëjpkëxanëp”, mä jäˈäy mëk awäˈän jyaˈayˈattë, ttëytyundë ja myëguˈuk ets dyaˈˈayowdë (2 Timoteo 3:1, 3, Traducción del Nuevo Mundo). Ko duˈunë jäˈäy axëëk yˈadëˈëtstë, ta jeˈeyë myëguˈuktëjk tˈatsëˈk tˈajawëdë (Lukʉs 21:11). Perë Biiblyë wyandakypy ko tim tsojkë axëkjäˈäytyëjk kyutëgoyäˈändë, etsë jäˈäyëty jam nëjkx jyukyˈattë ‘mä ja nax kajpnën agujkpë jotkujkpë, jam nëjkx jyuukyˈaty oy tsuj ets katii kyajjoymaytyunëdëty mä jyëën tyëjkën’ (Isaías 32:18, Tios yˈaaw yˈayuk). Per, ¿wiˈix kyutëgoyaˈany ja axëkˈäjtën?

 Dios yajkutëgoyaambyë axëkjäˈäytyëjk etsë tujn pujxn.

•   “Yëˈë axëkjäˈäytyëjkëty nëjkxëp kyutëgoytyë yää naxwiiny” (Proverbios 2:22).

•   “[Dios] yajjëjptëgoyaambyë tsip abëtsëmy nyaxwinyëdë. Tyëjwaˈkxypyë arkë ets pedasë pedasë ttuktëjë lansë; dyajnitoyë karrë mëdiˈibë mëët tsyiptuny” (Salmo 46:9).

 Dios tyukniˈˈixëyaampy ja jäˈäyëty parë tuˈugyë yˈittët ets duˈun nëjkx dyajjëjptëgoy ja axëkˈäjtën.

•   “Nitii kyaˈˈaxëktunäˈäny, nipën axëëk kyaˈˈadëˈëtsäˈäny mäts tukëˈëyë nwäˈäts kopk. Yëˈko naxwinyëdë wyindukäˈäny mëdë Jyobaa yˈëxpëjkën extëmë nëë dyajwindukyë mejny” (Isaías 11:9).

•   Tyam taajënë Dios ttukniˈˈixë jäˈäyëty abëtsëmy nyaxwinyëdë parë kyaj tsyiptundët ets parë kyaj tmëbëdëˈëktëdë tujn pujxn, ets “dyajjëmbittë yˈespäädë extëmë aräädë etsë lyansë extëm mëdiˈibë ujts yajtukwimbujxp” (Miqueas 4:3).

 Biiblyë wyandakypy ko mä tiempë myiny kyëdaˈaky kyaj yˈokjaˈˈatanë nayˈatsëˈëk nayˈajawë, pën mˈaknijawëyaampy niˈigyë käjpxë yäˈädë artikulo: “¿Es posible librarse del miedo?”.

 Pën mˈaknijawëyaampy niˈigyë wiˈix kyutëgoyaˈany ja axëkˈäjtën, käjpxë yäˈädë artikulo: “¡Por fin paz en la Tierra!”.