Domingë 20 äämbë nobiembrë 2022 yëˈë Naciones Unidas ojts tnimaytyäˈäktë wiˈix niˈigyë tyëgäjtsnë ja tiempë (COP27). Yäˈädë jäˈäyëty mëdiˈibë tuˈukmujktë, ojts dyaktë myeeny sentääbë parë tpudëkëyäˈändë ja paˈis mä mbäät tyuny jyatyëty ja ayoˈon mët ko tyëgatsy ja tiempë. Per mayë jäˈäy jyënäˈändë ko oy duˈun tnayaktë ja meeny sentääbë, kyaj mbäät yˈoyë yäˈädë jotmay.

•   “Oy ko yajˈyakyë meeny sentääbë parë yajpudëkëdë pënaty ayoˈonbattëp ets dyajtëgoytyë tijaty myëdäjttëp […]. Per tsojkëp ti yˈakˈyajtunët […]. Pes yäˈädë naxwinyëdë niˈigyë wyindëgoonyë” (duˈun jyënanyë António Guterres, mëdiˈibë tuump secretario general de las Naciones Unidas; 19 äämbë nobiembrë 2022).

•   “Yëˈë it Naxwinyëdë niˈigyë wyindëgooyˈadëtsnë” (Mary Robinson, mëdiˈibë ojts tyuny presidente jap Irlanda ets nanduˈun tyuuny comisionada mä Derechos Humanos mä Naciones Unidas; 20 äämbë nobiembrë 2022).

 Ënäˈktëjkëty yëˈë mëdiˈibë niˈigyë myëmääy myëdäjtëp wiˈix kyugëxëyaˈany yäˈädë naxwinyëdë mä tiempë myiny kyëdaˈaky. ¿Mbäädëdaa gobiernëtëjk tyundë tuˈugyë parë kyaj niˈigyë wyindëgoyët ja it naxwinyëdë extëm të twandäˈäktë? ¿Wiˈixë Biiblyë jyënaˈany?

 Oy nuˈun tjatundë mëjääw parë kyaj wyindëgoyëdë naxwinyëdë, Biiblyë jyënaˈany ko naxwinyëdë jäˈäy kyaj tmëdattë madakën parë tijaty dyaˈoyëdët. Min nˈokˈijxëm majtsk pëky:

•   “Mëdiˈibë yajtuump ney kyaj mbäät nyekytyëy” (Eclesiastés 1:15).

   ¿Ti yˈandijpy? Yëˈë yˈandijpy ko tijatyë gobiernëtëjk tyukniwinmäˈäyëdëp kyaj oy wyimbëtsëmy, pes kyaj të kyojtë parë këˈëm nyayˈanaˈamëdët (Jeremías 10:23). Oyxyëbë gobiernëtëjk jyanayajtuˈugyëdëbë, kyaj mbäät dyaˈoyëdë ja jotmay mëdiˈibë jaˈäjtp yä naxwiiny.

•   “Mët ko ja jäˈäyëty jeˈeyë këˈëm nyaytsyokäˈänëdë, ttsokäˈändë meeny sentääbë [...], kyaj nyayjyaygyukëyäˈänëdë” (2 Timoteo 3:2, 3, Traducción de Nuevo Mundo).

   ¿Ti yˈandijpy? Biiblyë jyënaˈany ko naxwinyëdë jäˈäy yëˈëyë yˈëxtäˈäyandëp mëdiˈibë këˈëm tyukˈoyˈattëp ets ko kyaj mbäät tuˈugyë tyuunmuktë parë wiinkpë tpudëkëdët. ¿Këdii duˈunën tyamë jäˈäy jyaˈayˈattë?

 Oyë gobiernëtëjk ti tjatundë, kyaj mbäät dyaˈoyëdë ja it naxwinyëdë. Perë Dios yëˈë të twinˈixyë Jesukristë parë yëˈë yˈanaˈamët, ets yëˈë mëdiˈibë myëdäjtypyë madakën parë dyaˈoyëdë yäˈädë naxwinyëdë. Biiblyë duˈun tnimaytyaˈagyë Jesus:

•   “Yëˈë myëdataampy ja kutujkënë. Ja nëjkx yajtijy Oybyë käjpxwijpë, Diosë kumëjääwbë, Teety mëdiˈibë ijtp winë xëëw, Anaˈambë mëdiˈibë yajjaˈäjtypyë jotkujkˈäjtën” (Isaías 9:6).

 Jesus yëˈë ja Rey mëdiˈibë anaˈamäämp mä ja Diosë gyobiernë ets jam yajpääty tsäjpotm (Mateo 6:10, TNM). Yëˈë myëdäjtypyë mëjääw, wijyˈäjtën ets yaˈoyëyaambyë yäˈädë naxwinyëdë parë agujk jotkujk tsyëënëdët pënaty yä jukyˈatandëp (Salmo 72:12, 16). Ko netyë Jesus tyëjkënë anaˈambë, yajkutëgoyaampy pënaty “yajmäˈttëp ja naxwinyëdë” ets dyaˈoyëyaˈany (Apocalipsis o Diˈibʉ Jatanʉp 11:18; Isaías 35:1, 7).

 Pën mˈaknijawëyaampy niˈigyë wiˈix yˈoyëyaˈanyë yäˈädë Naxwinyëdë parë kyaj tijaty yˈokˈayoˈonbëjktaknët, käjpxë yäˈädë artikulo “¿Qué dice la Biblia sobre el cambio climático y nuestro futuro?”.