Nuˈun të tyuˈuyeˈeyë julië poˈo 2022, të yajnigajpxy ko oy myääjëty niˈigyë tyam mëk yˈäänë.

•   “Jap China të yajnigajpxy ko mä naa 70 siudad nëgooyë mëk yˈananë mä yäˈädë poˈo” (25 äämbë julië 2022, servicio de noticias de la CNN).

•   “Jap Europa të yˈayoˈonmoˈoyë toyë mët ko mëk jyantsy yˈany” (17 äämbë julië 2022, The Guardian).

•   “Domingë xëëw ojts yajnigajpxy ko jap Estados Unidos mä näägë yˈit lyugäär nëgooyë mëk yˈäänë ets tap tijaty tyëtsëˈknë” (24 äämbë julië 2022, The New York Times).

 ¿Yëˈë yäˈädë yˈandijpy ko mä tiempë myiny kyëdaˈaky kyaj yˈokjaˈˈatanë jukyˈäjtënë yä Naxwiiny? ¿Wiˈixë Biiblyë jyënaˈany?

 Duˈun. Pes ko tyam mëk jyantsy yˈany, yëˈë adëëp extëm ojts yajnaskäjpxë tyunäˈäny jyatäˈänyëty. Extëm nˈokpëjktakëm, Jesus jyënany ko jam ‘tsäjpotm atsëˈëk ajawë jam tijaty yaˈixäˈäny’ (Lucas 21:11, Tios yˈaaw yˈayuk). Mayë jäˈäy tsëˈk jäˈäwëdëp ko nëgooyë mëk yˈäänë, pes wyinmaytyë ko jäˈäy mbäät niˈigyë dyajwindëgoyë Naxwinyëdë.

 Kyaj. Duˈunyëmë jäˈäy yä tsyëënëyäˈändë. Pesë Dios ojts dyajkojˈyë Naxwinyëdë parë jäˈäyëty ttuktsëënëdët (Salmo 115:16; Eclesiastés 1:4). Dios kyaj tnasˈixëyaˈany parë jäˈäyëty niˈigyë dyajwindëgoytyëdë Naxwinyëdë, yëˈë ojts tnigajpxy ko dyajkutëgoyaˈany pënaty “yajmäˈttëp ja naxwinyëdë” (Apocalipsis o Diˈibʉ Jatanʉp 11:18).

 Min nˈokˈijxëm majtsk pëky mëdiˈibë Dios tyunaampy:

•   ‘Waˈan txoondaˈaky ja itjot, tëˈëts it tëˈëts naxpë; waˈan tjamˈaty ja xoondakën, ja jotkujkˈäjtën ets yajˈixëty pëjyjyotypyë ujtsjotypyë’ (Isaías 35:1, Tios yˈaaw yˈayuk). Dios kyaj tnasˈixëyaˈany etsë Naxwinyëdë jyëmbitët tëˈëts it, niˈigyën dyaˈoyëyaˈany jatëgok.

•   “Mijts mguentëˈäjtypyë naxwinyëdë, ko xyaˈity xyajwindëy mëjwiin kajaa ets jantsy xuˈkx” (Salmo 65:9). Dios yajjëmbitaambyë Naxwinyëdë jantsy tsuj.

 Pën mˈaknijawëyaampy niˈigyë wiˈixën ojts yajnaskäjpxë mä Biiblyë ko tiempë tyëgatsy, käjpxë yäˈädë artikulo: “¿Qué dice la Biblia sobre el cambio climático y nuestro futuro?”.

 Mbäät nanduˈun xykyajpxyë yäˈädë artikulo mä jyënaˈany: “¿Quién salvará el planeta?”.