Ja yaˈëwxity ets tˈixtët naa 5.000 miyongënë jäˈäy ja Copa Mundial mëdiˈibë mä FIFA, ets tyunäˈänyëty 20 äämbë nobiembrë axtë 18 äämbë disiembrë 2022. Mayë jäˈäy jyënäˈändë ko yäˈädë ëyiˈiky kuyaty kyaj yëˈëjëty jeˈeyë tuˈugë ixy jawë, pes mbäät dyajjaˈˈatyë tuˈugyëˈäjtën abëtsëmy nyaxwinyëdë.

•   “Ja ëyiˈiky kuyaty myëdäjtypyë mëjääw parë naxwinyëdë jäˈäy dyajtëgatsët, myëdäjtypyë mëjääw parë tijaty yajtunët ets parë jäˈäy dyajtuˈugyët extëm kyaj pën duˈun ttuny” (Nelson Mandela, mëdiˈibë ojts tyuny presidente jap Sudáfrica).

•   “Futbol […] xyaˈˈagujkˈäjt xyajjotkujkˈäjtëm; xyajxondakëm, xyajtuˈugyëm ets mbäät ntsojkëm oy mä pën tsyoonët” (Gianni Infantino, presidente mëdiˈibë mä FIFA). a

 Ko duˈun kyuyattë mä mundial o mä wiinkpë ëyiˈiky kuyaty, ¿mbäädëdaa yëˈë tjantsy yajjaˈˈatyë tuˈugyëˈäjtën? ¿Mbäädëdaa njantsy pyatëmë jotkujkˈäjtën etsë tuˈugyëˈäjtën?

 Mä të tyunyëtyë mundial mä yäˈädë jëmëjt, kyaj jäˈäy yëˈëyë të tˈoknigäjpx të tˈoknimaytyaknëdë futbol. Pes yëˈë të tnimaytyäˈäktë ko jyaˈˈatyë nayˈaxëkˈixë, ko tnitsiptundë ja madakën mëdiˈibë myëdäjttëp ets ko jyaˈˈatyë ayoobë jäˈäy.

 Ets oy dyuˈunëty, mayë jäˈäy jyënäˈändë ko jyaˈˈatyë mundial ta tpäättë jotkujkˈäjtën. Per oy nuˈun tjatundë mëjääw, kyaj mbäät dyajjaˈˈattë ja tuˈugyëˈäjtën. Pes ko duˈun tyunyëtyë mundial, ja mayë jäˈäy dyajnigëxëˈëktë wiˈix wyinmaytyë, tijaty ttundë ets ta net kyaj jyaˈˈatyë tuˈugyëˈäjtën. Biiblyë jyënaˈany ko tëgatsyë netyë jäˈäy jyaˈayˈatäˈändë mä “ja tiempë mëdiˈibë jëjpkëxanëp” (2 Timoteo 3:1-5, TNM).

 Biiblyë nyimaytyakypy ko miimbë tiempë mä naxwinyëdë jäˈäy yajpäädäˈändë tuˈugyë. Wyandakypy ko niˈamukë mëdiˈibë nety tyuktsënääytyëp ja naxwinyëdë, tuˈugyë yajpäädäˈändë. Pes yëˈë anaˈamanëdëp ja Diosë gyobiernë mëdiˈibë yajpatp tsäjpotm ets ja yajtijy “ja Diosë yˈAnaˈam kyutujkën (Lukʉs 4:43; Mateo 6:10, TNM).

 Ja mëdiˈibë anaˈamäämp mä Diosë yˈAnaˈam Kyutujkën yëˈë ja Jesukristë, ets yëˈë yajjaˈˈataambyë tuˈugyëˈäjtën abëtsëmy nyaxwinyëdë. Biiblyë jyënaˈany:

•   “Mä taabë tiempë ja oyjyaˈay pyëjjëˈëgäˈäny, ets ja tuˈugyëˈäjtën myëjwindëkëyaˈany” (Salmo 72:7).

•   “Yëˈë yaˈˈawäˈätspëtsëmaambyë ayoobë jäˈäy mëdiˈibë pyëjktsoobyë naybyudëkë […]. Mä yajtëytyuny ets mä axëëk yajtuny dyaˈˈawäˈätspëtsëmäˈäny” (Salmo 72:12, 14).

 Mä yäˈädë tiempë taajënë Jesusë dyajtuˈugyë jäˈäy, pes miyonkˈam tkupëktë mëdiˈibë tukniˈˈijxëp ets tsyoondë mä 239 paˈis. Yäˈädë jäˈäyëty tuˈugyë tyam yajpäättë ets kyaj nyaymyëtsipˈatëdë. Pën mˈaknijawëyaampy niˈigyë, käjpx yäˈädë artikulo mëdiˈibë miimp kanäk pëky “Rompamos el ciclo del odio”.