¡NˈOKNAYAˈIJTËM WIJY KEJY!
Ja it Naxwinyëdë taa wyindëgooynyë | ¿Wiˈixë Biiblyë tnimaytyaˈaky?
“Niˈigyë tyam nˈijxëmë Naxwinyëdë wyindëgooynyë. Extëm nˈokpëjktakëm, nëë tuu dyajwindëgoy mëjjatyëtypyë siudad, mëk jyantsy yˈany, yˈayoˈonbëjktaˈagyë tuu poj, yˈamääytyëkë nëë, yˈagëx yˈadëgoyë tuk miyongë ääy ujts etsë jëyujk animal. Kyajëts yam nyajniˈigyë ääw ayuk, tëyˈäjtënëts nmaytyaˈaky. Etsë ëxpëkyjyaˈaytyëjk jyënäˈändë ko pën kyaj ti ttundë gobiernëtëjk, niˈigyë myëjwindëkëyaˈanyë yäˈädë jotmay” (Duˈun jyënanyë António Guterres, mëdiˈibë tuump secretario general de las Naciones Unidas, mä tˈatsoowëmbijty ja ëxpëkyjyaˈayëty mëdiˈibë yˈijxtëp ko Naxwinyëdë wyindëgoy, ko tkëyäjktë ja informë 4 äämbë abril 2022).
“Ëxpëkyjyaˈaytyëjk jyënäˈändë ko mä jëmëjt myiny kyëdaˈaky, windëgoyäämp mayë parke mëdiˈibë yajpatp Estados Unidos, mët ko niˈigyë wyindëgoyë Naxwinyëdë. Pes yäˈädë parke niˈigyë yˈaxëktunëdë ko Naxwinyëdë yˈäämbëky. Mbäät kyutëgoy 423 parke mët ko yˈayoˈonbëjktaˈagyë toyë jëën, nëë tuu, ko jyiiywyaˈkxyë yelë, ko mejny dyajnipeˈetyë Naxwinyëdë ets ko mëk jyantsy yˈany” (“Flooding Chaos in Yellowstone, a Sign of Crises to Come” [Caóticas inundaciones en Yellowstone, un aviso de las crisis que vendrán], The New York Times, 15 äämbë junië 2022).
Ko tyamë Naxwinyëdë wyindëgoy, ¿mbäädëdaa nëjkx näˈä yˈoyë? Pën duˈun, ¿wiˈix? Okˈix wiˈixë Biiblyë tyukniˈˈixë.
Biiblyë ojts tnaskäjpxë ko wyindëgoyaˈanyë Naxwinyëdë
Biiblyë nyigajpxypy ko Dios yajkutëgoyaambyë jäˈäyëty mëdiˈibë “yajmäˈttëp ja naxwinyëdë” (Apocalipsis o Diˈibʉ Jatanʉp 11:18). Yäˈädë tekstë tëgëk pëky mëdiˈibë nyimaytyakypy:
1. Ko jäˈäyëty yajwindëgoyandëbë netyë Naxwinyëdë.
2. Ko oyëyäämbë jotmay mä tyam wyindëgoyë Naxwinyëdë.
3. Ko yëˈëyë Dios mëdiˈibë yaˈoyëyaambyë yäˈädë jotmay.
Kyaj tiko nmëmäˈäy nmëdäjëm ko tyamë Naxwinyëdë wyindëgoy, pes tam pën kyuentëˈäjtypy.
Biiblyë jyënaˈany ko Naxwinyëdë yˈitäˈäny “winë xëëw winë tiempë” (Eclesiastés 1:4). Xëmë yajtuktsëënëyaˈany.
“Pënaty jukyˈäjttëp tëyˈäjtën myëët yëˈë jyaˈˈatandëbë naxwinyëdë, ets ttuktsëënëyäˈändë xëmëkyëjxm” (Salmos 37:29).
Oyëyäämp jatëgokë Naxwinyëdë ets jyëmbitäˈäny jantsy oy jantsy tsuj.
‘Waˈan txoondaˈaky ja itjot, tëˈëts it tëˈëts naxpë; waˈan tjamˈaty ja xoondakën, ja jotkujkˈäjtën ets yajˈixëty pëjyjyotypyë ujtsjotypyë’ (Isaías 35:1, Tios yˈaaw yˈayuk).