Lunës jopy 10 äämbë oktuubrë 2022, Rusia ojts tkugäˈätsë bombë mä kanäägë käjpn jap Ucrania. Pääty duˈun tyuun jyäjtë mët ko myajtsk xëëwëp të netyë Ucrania tjity ja puentë mëdiˈibë mëët nyaybyaatyëtyë Crimea etsë Rusia. Ets të netyë politikëtëjk jyënäˈändë ko tim tsojk tsyondäˈägäˈänyë Armagedón.

•   “Jaayëts jeˈeyë nˈakjamyetsy ko tim wingonë nety yˈijnë Armagedón ko nety yˈaneˈemyë Kennedy [mëdiˈibë presidentë jap Estados Unidos] ets ko jyatunanë ja tsip mëdë Cuba. […] Nwinmayëts ko bombë nuclear tyunët, yëˈë nety tsondakpë Armagedón” (Joe Biden, presidente mëdiˈibë Estados Unidos, 6 äämbë oktuubrë 2022).

•   “Ijtpëts seguurë ko yëˈë tsondakpë Armagedón; ets niˈamukë naxwinyëdë jäˈäy tkuˈayowëyäˈändë” (duˈun jyënanyë Volodímir Zelenski mëdiˈibë tuump presidentë jap Ucrania, ko yajtëëwëdë ja periodistëty wiˈix wyimbëtsëmäˈäny ko tyunëdë bombë nuclear; BBC News, 8 äämbë oktuubrë 2022).

 ¿Yëˈëdaa nety yˈandijpy ko tsondakpë Armagedón ko tyunëdë bombë nuclear? ¿Wiˈixë Biiblyë tnimaytyaˈaky?

 Kyaj. Yäˈädë ayuk Armagedón jeˈeyë myiny tëgok mä Biiblyë ets jap myiny mä Diˈibʉ Jatanʉp o Apocalipsis 16:16. Ets kyaj yëˈë tˈandijˈyë naxwinyëdë jäˈäy tsyiptunäˈändë mëdë wiinkpë nasionk, yëˈëjën yˈandijpy ko Dios tsyiptunäˈäny mëët ja “reyëty mäjatyë naxwinyëdë” (Diˈibʉ Jatanʉp 16:14). Mä ja Armagedón, Dios yajkutëgoyaampy niˈamukë ja anaˈambëtëjk mëdiˈibë yää naxwiiny (Daniel 2:44).

 Parë xyˈaknijawët niˈigyë wiˈix jyatäˈäny ja it Naxwinyëdë ko myinët ja Armagedón, käjpxë yäˈädë artikulo “¿Qué es el Armagedón?”.

 Kyaj. Oyxyëp ja gobiernëtëjk tjatimyajtuundëbë bombë nuclear mä tiempë myiny kyëdaˈaky, Dios kyaj tnasˈixëyaˈany ets dyajkutëgoytyëdë Naxwinyëdë. Biiblyë jyënaˈany:

•   “Naxwinyëdë yˈity winë xëëw winë tiempë” (Eclesiastés 1:4).

•   ‘Yëˈë oyjyaˈaytyëjk nëjkxëp tkumäˈäyënˈattë yëˈë naxwinyëdë, ets xëmëkyëjxm nëjkx tsyëënëdë naxwingëjxy’ (Salmo 37:29, Tios yˈaaw yˈayuk).

 Per tijaty tyam tuun jäjtëp ets tijaty ojts yajnaskäjpxë mä Biiblyë, yëˈë xytyukˈijxëm ko yëˈë ndukjukyˈäjtëm ja tiempë mëdiˈibë tim jëjpkëxanëp (Matewʉ 24:3-7; 2 Timotee 3:1-5). Pën mˈaknijawëyaampy niˈigyë wiˈixë Biiblyë tnimaytyaˈaky mëdiˈibë miimp këdakp ëxpëkë Biiblyë namayˈäjtën.