24 äämbë eneerë 2023, ëxpëkyjyaˈaytyëjk jyënandë ko tyimpatypyën ja oorë a mä kyutëgoyanë yäˈädë naxwinyëdë.

•   “Yäˈädë martës, të yajnimaytyaˈaky ko tyimpatnëp ja oorë mä kyutëgoyaˈanyë yäˈädë naxwinyëdë, mët ko jyaˈˈatyë amay jotmay mëdiˈibë tyam pyatypyë naxwinyëdë jäˈäy, extëm ko tyunyëty ja tsip jap Ucrania, ko dyajtundë bombë ets ko niˈigyë wyindëgoonyë naxwinyëdë” (Servicio internacional de noticias de la agencia AFP).

•   “Ëxpëkyjyaˈaytyëjk të jyënäˈändë yäˈädë martës, ko wingon yˈijnë mä kyutëgoyaˈanyë naxwinyëdë, duˈunxyëp extëm jeˈeyë yˈakwëˈëmy 90 segundë parë myiinët ja kutëgoˈoyën” (ABC News).

•   “Tuk grupë ëxpëkyjyaˈaytyëjk mëdiˈibë tsoˈondëp mä kanäägë paˈis jyënäˈändë ko ninäˈänëmë netyë naxwinyëdë jäˈäy kyayajpäättë jotmay jëjpˈam extëm tyam” (The Guardian).

 ¿Wingonëdaa yˈijnë mä kyutëgoyaˈanyë naxwinyëdë etsë jäˈäyëty? ¿Mbäädëdaa ntsëˈkëm ti miimp këdakp? ¿Wiˈixë Biiblyë jyënaˈany?

 Biiblyë jyënaˈany ko “naxwinyëdë yˈity winë xëëw winë tiempë” ets ko jäˈäyëty “ttuktsëënëyäˈändë xëmëkyëjxm” (Eclesiastés 1:4; Salmo 37:29). Pääty mbäät njënäˈänëm ko naxwinyëdë jäˈäy kyaj dyajkutëgoyäˈändë Naxwinyëdë ets xëmë yajtuktsëënëyaˈany.

 Perë Biiblyë myaytyakypy ko ta mëdiˈibë jëjpkëxäämp. Extëm nˈokpëjktakëm, jyënaˈany ko ‘naxwinyëdë [jäˈäy] këjxnëp näjxnëp’ (1 Juan 2:17, TY).

•   Pën mˈaknijawëyaampy tidënë Biiblyë myaytyäˈägaampy ko duˈun jyënaˈany, käjpxë yäˈädë artikulo “¿Se acerca el fin del mundo? ¿Qué es el apocalipsis?”.

•   Pën mnijawëyaampy ti Biiblyë myaytyakypy tyunäˈäny jyatäˈänyëty tim tsojk abëtsëmy nyaxwinyëdë, käjpxë yäˈädë artikulo “¿Cuándo será el fin del mundo?”.

 Biiblyë yëˈë xypyudëjkëm parë kyaj nëgoo nmëmäˈäy nmëdäjëm ja amay jotmay mëdiˈibë jaˈäjtp yä naxwiiny. ¿Wiˈix xypyudëjkëm?

•   Xymyoˈoyëm oybyë käjpxwijën (2 Timotee 3:16, 17). Extëm nˈokpëjktakëm, pën mˈaknijawëyaampy niˈigyë wiˈix mbäädë Biiblyë mbudëkëty ets kyaj nëgoo ti xymyëmay xymyëdäjët, oy xymyëdatyë amay jotmay, käjpxë yäˈädë artikulo “Qué puedo hacer para no preocuparme tanto”.

•   Biiblyë nanduˈun xyˈawäˈänëmë jotkujkˈäjtën mä tiempë myiny kyëdaˈaky (Romanʉs 15:4). Nyigajpxypy ti ja tyam tuun jäjtëp ets ti tunan jatanëp mä tiempë myiny kyëdaˈaky, yäˈädë yëˈë mëdiˈibë xypyudëjkëm parë nwinguwäˈkëm ja amay jotmay mëdiˈibë tyam jaˈäjtp.

 Pën mˈaknijawëyaampy niˈigyë wiˈixë Biiblyë jyënaˈany, mbäät tyamyë xyˈanëëmë tuˈugë Jyobaa tyestiigë ets myaˈëxpëkëdët.