Jesus yˈanmääy ja yˈëxpëjkpëty ko käjpxwäˈkxandëbë nety mä “tëgekyë naxwinyëdë” (Apostʉlʉty 1:8). Jyobaa tyestiigëty tyuundëbë mëjääw parë yˈëwäˈkx kyäjpxwäˈkxtë extëmë Jesus ojts tniˈanaˈamë. Per oy duˈun jyakäjpxwäˈkxtë, taanëmë lugäär mä jäˈäy kyaj tmëdowdënëm ja Diosë yˈayuk, extëm mä mëjatypyë siudad mä nimayë jäˈäy tsyëënëdë. Ets mä näägë paˈis kyaj nëgoo nyimayˈattë Testiigëty (Matewʉ 9:37-38). ¿Ti yajtuump parë niˈamukë jäˈäy yajtukmëtmaytyäˈäktë Diosë yˈayuk?

 Parë mbäät duˈun yajtuny, ja Komitee mëdiˈibë yˈijxypy wiˈix ngäjpxwäˈkxëm mëdiˈibë pyudëjkëdëp pënaty Wyoowˈyoˈoytyëbë Jyobaa tyestiigëty, yëˈë kyajxtëbë misioneerë mä niˈigyë tyëgoyˈatyë naybyudëkë. Tyam jaa jyaˈˈattë 3,090 misioneerë mëdiˈibë tuundëp abëtsëmy nyaxwinyëdë. a Nimayë misioneerë të yajtukniˈˈixëdë wiˈix mas oy yˈëwäˈkx kyäjpxwäˈkxtët, extëm ko nyëjkxtë mä Eskuelë parë pënaty kyäjpxwäˈkxtëbë Diosë Kyutujkën. Të tnikaˈaktë jyëën tyëjk ets të nyëjkxtë wiink paˈis. Ko të yˈotstë mä eskuelë ets ko jeky tmëduunëdë Dios, mëjwiin kajaa tyundë mä yˈëwäˈkx kyäjpxwäˈkxtë ets tpudëkëdë ja myëguˈuktëjk mëdiˈibë näämnëm tëjkëdëp ëxpëjkpë.

 Mä tuˈuk tuˈugë Betel, tapë Departamentë mä yajtukniwitsë wiˈix tyuˈuyeˈeyë Diosë tyuunk ets tap tuk grupë nmëguˈukˈäjtëm mëdiˈibë mëët tuˈugyë tyundë Komitee mëdiˈibë Betel parë tˈixtë wiˈix mbäät yajpudëkëdë misioneerëty. Yˈëxtääytyëbë lugäär mä mbäät tsyëënëdë, pyudëjkëdëp ko yubat pyäˈämbattë ets yajmooytyëbë meeny sentääbë mëdiˈibë yajtuundëp. Mä jëmëjt 2020 Jyobaa tyestiigëty, jaa të dyajtundë naa 27 miyongënë dolar parë të yajpudëkëdë misioneerëty. Ets ko duˈun yajpudëkëdë, mbäät jamyë ja xyëëw tiempë dyajtundë mä yˈëwäˈkx kyäjpxwäˈkxtë ets tpudëkëdë ja myëguˈuktëjk.

 ¿Wiˈixë misioneerë tpudëkëdë nmëguˈukˈäjtëm parë mas niˈigyë yajkäjpxwäˈkxëdë Diosë yˈayuk? Frank Madsen mëdiˈibë tuump Komitee mä Betel mëdiˈibë Malaui, tnimaytyaˈaky: “Misioneerëty mëjwiin kajaa tpudëkëdë nmëguˈukˈäjtëm parë kyäjpxwäˈkxtët amëk jotmëk mä lugäärë nidëkëbë, mä jäˈäy kyaj tmëdowäˈändë Diosë yˈayuk o axtë mä yajkajpxyë wiink ayuk. Ets ko ja nmëguˈukˈäjtëm tˈixtë wiˈixë misioneerëty ttundë mëjääw parë tjatäˈändë ja ayuk ets ja kostumbrë mëdiˈibë jäˈäy myëdäjtëp, pudëjkëdëp mëjwiin kajaa. Misioneerëty pyudëjkëdëp nanduˈunë ënäˈktëjk parë tyundët prekursoor. Mëjwiin kajaa ngukäjpxëmë Jyobaa ko jyaˈˈattë misioneerëty”.

 Jatuˈugë nmëguˈukˈäjtëm mëdiˈibë tuump Komitee mä wiinkpë Betel, jyënaˈany: “Ko jyaˈˈattë misioneerë, ta yajxon nyigëxëˈëky ko Jyobaa tyestiigëty tuˈugyë nyayaˈitëdë abëtsëmy nyaxwinyëdë oy mä tsyoondë. Axtë pënaty kyaj yˈëxpëktë, pyëjktëbë kuentë ko tuˈugyë nnayaˈijtëm oy wiˈix ja kostumbrë nmëdäjtëm. Ets päätyën dyuˈunëty mët ko nˈëxpëjkëmë Biiblyë”.

 ¿Ets wiˈixë misioneerëty tpudëkëdë nmëguˈukˈäjtëm mä kyongregasionk? Paulo, mëdiˈibë tsoˈomp Timor Oriental, kyuˈëˈëw kyukäjpxëp wiˈix ja misioneerë tyundë mä kyongregasionk. Yëˈë jyënaˈany: “Mäts ntsëënëdë nëgooyë yˈäänë, per ja misioneerëty duˈunyëm jyantsy yˈëwäˈkx jyantsy kyäjpxwäˈkxtë, oy tsyoondë mä ja it lugäär mä tyitykyëty. Xëmë jopyëp tsyoondë käjpxwäˈkxpë ets axtë kujkxyëëwbäät tkuˈix tkugäjpxëdë jäˈäy, nääk axtë tsuubäät yˈëwäˈkx kyäjpxwäˈkxtë. Të nimayë jäˈäy ttuknijawëdë tëyˈäjtën extëm ëjts. Jamyë dyajtundë ja xyëëw tiempë mä Diosë tyuunk ets mëjwiin kajaa pyudëkëdë nmëguˈukˈäjtëm ko duˈunë tˈixtë”.

 Ketti, tuˈugë prekursoora regulaar mëdiˈibë Malaui, tnimaytyaˈaky wiˈix mëdë fyamilyë yajpudëjkëdë. Jyënaˈany: “Ëjtsë nety jeˈeyë naytyuˈuk ëxpëjkp ko ja misioneerë mëdë kyudëjk jyäjttë mätsë ngongregasionk. Mëjwiin kajaajëts xypyudëjkëdë axtë nnaymyaaybyëjkëdë mëdëtsë nfamilyë. Tyukniˈˈijxëdëts ja nˈuˈunk nˈënäˈk ko mëdiˈibë mbäät yajnayjyawëdë agujk jotkujk, yëˈko tmëdundëdë Jyobaa. Kots duˈun xypyudëjkëdë, tats nidëgëëk tyamë nnëëx tyundë prekursoora regulaar ets tëtsë nmëmëjjäˈäy yeˈeytsyondaˈaky reunyonk”.

 ¿Ets määjën yajpëkyë meeny parë yajpudëkëdë ja misioneerëty? Yëˈë tuump ja meeny mëdiˈibë yajnayäjkp abëtsëmy nyaxwinyëdë ets nanduˈun mëdiˈibë yajˈyäjkp mä donate.pr418.com. Dyoskujuyëm ko duˈun mˈoyjyaˈaytyäˈäktë.