Nigujkwaˈkxy nyaxyë nmëguˈukˈäjtëm mëdiˈibë kyäjpxnäjxtëbë ëxpëjkpajn kyaj yˈoktuunëdë Betel, të nyëjkxnëdë mä ja yˈofisinë mëdiˈibë yajtijp ORT. ¿Wiˈix pyudëkëdë ko jam tyam tyuunëdë? ¿Tijaty yajtëgoyˈäjttëp ko yajpatnëdë mä ORT? Ets ¿wiˈix pyudëkëdë parë mas oy tkäjpxnaxtë ëxpëjkpajn?

 Ko ja nmëguˈukˈäjtëm të nyëjkxnëdë mä yˈofisinë, mbäädë net tmëdowdë wiˈixë jäˈäy kyäjpx myaytyäˈäktë mä ja yˈayuk. Karin mëdiˈibë kyäjpxnäjxypyë alemán bajo, duˈun tnimaytyaˈaky: “Desde kots ojts nëjkxnëdë Cuauhtémoc jap Chihuahua, mä yajkajpxyë alemán bajo, yëˈëts bom bom ojts ngäjpxnëdë ja nˈayuk. Kyaj yëˈëyëty mëdëts ja nmëguˈuktëjk o mäts nˈëwäˈkx ngäjpxwäˈkxtë, nanduˈunën kots nëjkxtë juuy këbajtpë. Jantsy yajpattëbëts tyam mëdë jäˈäy mëdiˈibë kyäjpxtëbëtsë nˈayuk. Ets nmëdoowdëbëtsë ayuk mëdiˈibëtsë nety të njäˈäytyëgooynyëdë. Tyam nnijäˈäwëdëbëtsë net wiˈixënë jäˈäy kyäjpx myaytyäˈäktë”.

 James mëdiˈibë tsënaapy Ghana ets tyuny mä ofisinë mä yajkäjpxnaxyë Frafra. Jyënaˈany ko pyaˈˈayoopy ja myëguˈuktëjk mëdiˈibë tuundëp Betel. Per nanduˈun jyënaˈany: “Jantsy jotkujkëts nyajpääty mä ORT. Mbäädëts nˈëwaˈkxy ngäjpxwaˈkxy mätsë nˈayuk etsëts nˈixy wiˈixë jäˈäy yˈajäjt jyotjäˈtëdë ja Diosë yˈayuk”.

 ¿Wiˈixë nmëguˈukˈäjtëm tnijawëdë mä mbäät nyaxkëdaˈaky tuˈugë ORT? Joseph mëdiˈibë tuump Warwick (Nueva York) mä Departamentë mëdiˈibë yˈijxypy wiˈixë jëën tëjk yajkojy abëtsëmy nyaxwinyëdë, duˈun tnimaytyaˈaky: “Kanäägëts lugäär nˈixtë parëts nnijawëdë mä mbäät nyaxkëdaˈaky tuˈugë ORT. Pes mä näägë it lugäär amääytyakpë nëë, nëjkxpë jëën ets kyaj nëgoo internet parë nmëguˈukˈäjtëm tyundët”.

 Kyaj nëgoo tsyiptaˈaky ets kyaj nëgoo tyunyë meeny ko nyaxkëdaˈaky tuˈugë ORT mä tyunyëtyë asamblee, reunyonk o mä tsyëënëdë pënaty tuundëp misioneerë parë jap nyëjkxtë tuumbë pënaty kyäjpxnäjxtëbë ëxpëjkpajn. Pën ja nmëguˈukˈäjtëm kyaj duˈumbë lugäär tpäättë, ta tˈamdowdë permisë parë yajjuyëdë jëën tëjk parë japyë nmëguˈukˈäjtëm tsyëënëdët ets tyundët. Per pën ja nmëguˈukˈäjtëm kyaj tˈokˈyajtunanëdë ja jëën tëjk, mbäät pojˈam yajtooky ets wiinktsoow tyunët ja meeny.

 Mä jëmëjt 2020, jaa të tyunyë meeny mäjk tëgëk miyonk dolar mäjaty ORT. Pënaty kyäjpxnäjxtëbë ëxpëjkpajn, yajtëgoyˈäjttëp extëmë komputadoorë, internet, tijaty yajtuundëp parë gryabarattë ets nanduˈun programë. Extëm nˈokpëjktakëm, parë yajjuy tuˈugë komputadoorë ets yajpëjktaktäˈäy ja programë mëdiˈibaty yajtuundëp, jaa tyunyë meeny 750 dolar. Yäˈädë nmëguˈukˈäjtëm yëˈë nanduˈun yajtuundëp tuˈugë programë mëdiˈibë xyëwˈäjtypy Watchtower Translation System, parë ttukniwitsëdë ja tyuunk ets mä tˈixtë tijaty kyäjpxnaxandëp.

 Pënaty tuundëp mä tuˈugë ofisinë yajmooytyëp tijaty mbäät dyajtundë parë gryabarattët. Ko ojts tsyondaˈagyë COVID-19, duˈunyëm dyajtuundë, pes ojts tmënëjkxtë mä tyëjk parë duˈunyëm tgrabaräjttë ëxpëjkpajn etsë bideo.

 Ta nanduˈunë nmëguˈukˈäjtëm mëdiˈibë wingon tsënääytyëp mä ofisinë mëdiˈibë miindëp parë tkäjpxtë ets tmëdowdë wiˈix të yajkäjpxnaxyë ëxpëjkpajn ets tam nanduˈun mëdiˈibë yaˈoˈoyëdëp tijaty. Cirstin, mëdiˈibë tuump Sudáfrica mä yajkäjpxnaxyë ayuk afrikáans, jyënaˈany: “Nimayë nmëguˈukˈäjtëm jam nyëjkxtë tuumbë mëdiˈibë tiiyëm jyäjttëp ttundët”.

 Yäˈädë nmëguˈukˈäjtëm jyantsy tyukxondaktëp ko nyëjkxtë tuumbë mä ORT. Extëm nˈokpëjktakëm tuˈugë nmëguˈukˈäjtëm, jyënaˈany: “Jantsy oyëts xyajnayjyawëty kots jam nëjkxy tuumbë”. Näägë nmëguˈukˈäjtëm mëdiˈibë jamyë tsënääytyëp yäjktëbë yˈääw yoˈkn parë gryabarattë. Juana, mëdiˈibë tsoˈomp Veracruz ets tkajpxyë Totonaco, duˈun jyënaˈany: “Kots yä të nmiinëdë mä ja it lugäär mä yajkajpxy ja nˈayukëts, pojën yajpäätyë nmëguˈukˈäjtëm mëdiˈibë mbäät tgrabaratyë ëxpëjkpajn etsë bideo”.

 Per ¿mas oyëdaa nmëguˈukˈäjtëm tkäjpxnaxtë ëxpëjkpajn ko yajpatnëdë mä tuˈugë ORT? Tiko këdii, pes miyonkˈamë jäˈäy mëdiˈibë kyäjpxtëbë ëxpëjkpajn jyënäˈändë ko mas oy yajmëdoy. Cédric, mëdiˈibë tsoˈomp República Democrática del Congo ets tkäjpxnaxyë ëxpëjkpajn mä yˈayuk, jyënaˈany: “Näägë nmëguˈukˈäjtëm duˈunë nety jyënäˈändë ko yëˈëts ngäjpxnäjxtëbë Congo mëdiˈibë mä ‘Watch Tower’, ja ko kyaj duˈun yajmëdoy extëmë jäˈäy kyäjpx myaytyäˈäktë. Per kots yää ojts nmiinëdë mä yajkajpxy ja nˈayukëts, ta jyënäˈändë ko duˈun tyam yajkäjpxnäjxnë ëxpëjkpajn extëm jäˈäy kyäjpx myaytyäˈäktë”.

 Andile mëdiˈibë tsoˈomp Sudáfrica ets tkäjpxnaxyë ayuk xhosa, nanduˈun jyënaˈany: “Nimayë jäˈäy jyënäˈändë ko mas oy tyam yajkäjpxnäjxnë ëxpëjkpajn. Axtë näägë ënäˈkuˈunk mëdiˈibë nety kyaj tkäjpxäˈändë rebistë Diˈib Xytyukˈawäˈänëm mä yˈayuk, tyam jyantsy kyäjpxandëp. Ets nanduˈunë Traducción del Nuevo Mundo mëdiˈibë jemy të pyëtsëmy, mët ko duˈun të yajkäjpxnaxy extëmë jäˈäy kyäjpx myaytyäˈäktë”.

 ¿Mä yajpëky ja meeny sentääbë mëdiˈibë tuump mä tuˈugë ORT parë yajjuy tijaty tëgoyˈäjtp ets parë yˈaˈoyët tijaty mä jëën tëjk? Yëˈë tuump ja meeny mëdiˈibë yajnayäjkp abëtsëmy nyaxwinyëdë ets nanduˈun mëdiˈibë yajˈyäjkp mä donate.pr418.com.