Marsë mä jëmëjt 2020 ja mä ojts tnigajpxyë Organización Mundial de la Salud ko të nety jyaˈtyë COVID-19, ets kyaj pën tyimwinmääy ko abëtsëmy nyaxwinyëdë jäˈäy yˈaxëktunäˈänëdë. Mët ko jyaˈˈatyë yäˈädë päˈäm, ta nimayë jäˈäy ets axtë Jyobaa tyestiigëty të yubat pyäˈämbattë, yˈook tyëgoytyë ets axtë të yˈayoowdëkëdë. ¿Ti të ttundë Jyobaa tyestiigëty parë të tpudëkëdë ja myëguˈuktëjk?

 Mä pënaty Wyoowˈyoˈoytyëbë Jyobaa tyestiigëty, yajpatpë Komitee mëdiˈibë yˈijxypy ko ti amay jotmay jyaˈˈaty ets të dyajnaxkëdäˈäktë naxy 950 Komitee mëdiˈibë pyudëjkëdëbë myëguˈuktëjk abëtsëmy nyaxwinyëdë ko jyaˈˈatyë COVID-19. Yäˈädë Komitee të nanduˈun ttukniwitsëdë mä näägë it lugäär parë ak yëˈëyë ja nmëguˈukˈäjtëm nyaybyudëkëdët, ets ta nmëguˈukˈäjtëm mëdiˈibë të tˈaxäjëdë naybyudëkë mëdiˈibë yajkypyë gobiernë. Yäˈädë Komitee mëdiˈibë pyudëjkëdëbë nmëguˈukˈäjtëm, të nanduˈun ttukniwitsëdë wiˈix yajpudëkëdët nimayë nmëguˈukˈäjtëm.

 Min nˈokˈijxëm ti tuun jäjtë Paraguay. Mä tuˈugë perioodikë duˈun ojts yajnimaytyaˈaky ko yäˈädë päˈäm yaˈˈayoowdëjkë nimayë jäˈäy ets agëjxë ja jëˈxy pëky. Per ja Komitee mëdiˈibë pyudëjkëdëp ja nmëguˈukˈäjtëm ojts ttukniwitsëdë parë yajmoˈoytyët tijaty, mëdiˈibë mbäät dyajtundë naa majtsk sëmäänën parë nimäjtaxkë jäˈäy. Mä tuˈuk tuˈugë bolsë mëdiˈibë yajmooytyë, jaa nety të yajnimeenyë naa 30 dolar. Yajpëjktakë jëˈxy pëky, tijaty mëët pyuj jyaˈatstët ets parë tsyiˈiw xyëtstët.

 Pënaty pyudëjkëdëbë myëguˈuktëjk mä jyaˈˈatyë COVID-19, ¿wiˈix nyaygyuentëˈatëdë ets wiˈix nanduˈun tkuentëˈattë ja myëguˈuktëjk? Yajtuundëbë kubrebokë ets kyaj nëgoo tmëwingondë ja myëguˈuktëjk. Nanduˈun tˈix ttundë pën wäˈäts ja lugäär dyaˈittë jäˈäy mä tjuytyë ja jëˈxy pëky ets pën duˈunën nyaygyuentëˈatëdë extëm yajtukˈanaˈamdë. Niˈamukë yäˈädë nmëguˈukˈäjtëm mëdiˈibë të yajtuknipëktë parë nëjkx jyuy kyëbattë, naygyuentëˈäjtëdëp ko tpëjktäˈäktë kyubrebokë ets ko dyajwäˈätstë tijaty jyuuy kyëbajttëp. Nanduˈun dyajwäˈätstë yajxon ja kyarrë ets ja lugäär mä tpëjktäˈägäˈändë ja jëˈxy pëky. Ets pënaty yajwäˈkxtëp ja jëˈxy pëky kyaj twinguwäˈägëdë ja myëguˈuktëjk.

 Eneerë poˈo mä jëmëjt 2021, ja Komitee mëdiˈibë yˈijxypy ko ti amay jotmay jyaˈˈaty, të nety tkupëky parë meeny tyunët naxy 25 miyonk dolar ets yajpudëkëdët ja nmëguˈukˈäjtëm mëdiˈibë të yaˈˈayoowdëkëdë ja COVID-19. Mä tuˈuk tuˈugë Betel ets ja Komitee mëdiˈibë pyudëjkëdëbë nmëguˈukˈäjtëm, yajxon tˈixtë wiˈix mbäät dyajtundë ja meeny sentääbë mëdiˈibë yajnayäjkp. Ets yˈëxtääytyëp mä mbäät tpäättë tijaty kujënaky. Extëm nˈokpëjktakëm, jap Chile ja nmëguˈukˈäjtëm të nety yajtuknipëktë parë tjuytyëdë lentejë 750 kilë, per mä taabë poˈo nëgooyë nety të tsyowbajnë. ¿Ti tyuundë ja nmëguˈukˈäjtëm? Ta tkajpxyˈäjttë ko jyuyandëp duˈun. Per jeˈeyë nyajxy naa majtsk oorën, ta yaˈˈanmääytyë ko të nety tuˈugë jäˈäy dyajjëmbityë jatëgok ja lentejë mëdiˈibë jyuuy kujënaky tyukpoˈojëp. Ja nmëguˈukˈäjtëm kyaj tsooxë yajtukujuuytyë ja lentejë, duˈun yajmooytyë extëmë nety kyujënakyëty tyukpoˈojëp.

 Per ko ojts tninëjkxtë ja lentejë, kyaj duˈun nyekyyajmoˈoyandë extëmë nety të tkajpxyˈattë. Pes yajniwäämbajttë ja nmëguˈukˈäjtëm ko jeˈeyë winˈixy wingexy tpudëkëdë jäˈäy extëm yˈadëˈëtstë wiinkpë organisasion. Ta niduˈuk ja nmëguˈukˈäjtëm jyodoty wyinmäˈänyoty tmënuˈkxtakyë Jyobaa, ets ta net tˈatsooyë yäˈädë jäˈäy ko të nety yaˈijxtäˈäy mä tuˈuk tuˈugë kongregasionk pënatyën jyantsy yajtëgoyˈäjttëbë naybyudëkë. Ta nanduˈun ttukmëtmaytyaktë ko mä tuˈuk tuˈugë paketë yajkëxjääytyëp ja nmëguˈukˈäjtëmë xyëëw ets ko yëˈë jap yajpëjktakp mëdiˈibë tuˈuk tuˈuk ja familyë yajtëgoyˈäjttëp, mët ko wiˈixëm ja kostumbrë tmëdattë o määyëm tsyoondë. Ets ok ta tˈaktukmëtmaytyaktë ko tukëˈëyë ja meeny mëdiˈibë yajtuundëp, yëˈë mëdiˈibë yajnayäjkp ets ko kyaj pën myëjuyëdë ko duˈun tpudëkëdë myëguˈuktëjk. Ko yäˈädë jäˈäy duˈun yajtukmëtmaytyaktääy, mëjˈixy mëjmëdoy tjäˈäwë. Pääty kyuytyuun ja yˈayuk extëmë nety të tkajpxyˈattë, ets ko jatëgokë nmëguˈukˈäjtëm tjuuytyë ja lentejë axtë ojts tnayaky 400 kilë.

 Lusu tuˈugë nmëguˈukˈäjtëm mëdiˈibë të myëjjäˈäyënë ets të kyuˈoˈknë, jap tsyëënë Liberia mët nimëgoxkë jyëëky myëguˈuk. Tëgok, mientrësë nety yˈajopyˈattë ets tkäjpxtë ja tekstë mëdiˈibë bom bom yajkäjpxp, niduˈuk ja yˈokmäänk mëdiˈibë jyëmëjt wëxtujk, tˈijxy ko të nety yˈagëxë ja käˈäy ukën, ta dyajtëëy ja nyanwelë: “¿Ets ti net tyam njëˈxëm?”. Ta yˈanmääyë ja nyanwelë ko kyaj nëgoo myay tyäjët ko të nety tmënuˈkxtaˈagyë Jyobaa parë pyudëkëdët ets ko ijtp seguurë ko moˈoyanëdëp tijaty yajtëgoyˈäjttëp. Mä taabë tsuu, ta Lusu ojts myëgäjpxëdë ja nmëguˈukˈäjtëm mëdiˈibë tuundëp mëjjäˈäy ets yˈanmääyëdë pën mbäät nëjkx dyajtsoondë ja jyëˈxy pyeky. Lusu jyënaˈany ko yˈokuˈunk myëbëjkypyë net tyam ko Jyobaa myëdoowˈijtypy nuˈkxtakën, mët ko ojts tˈijxy wiˈixë jyaˈa yaˈˈatsoowëmbijty.

 Tuˈugë toxytyëjk mëdiˈibë tsënaapy mä República Democrática del Congo, yˈijx ko Jyobaa tyestiigëty naybyudëjkëdëp nixim niyam, pes yëˈë niduˈuk myëdëjkˈäjtypy. Yäˈädë toxytyëjk jyënany: “Jantsy jeˈeyë nyaxëdë yäˈädë päˈäm, tats ndëkëyaˈany ëxpëjkpë mëdë Jyobaa tyestiigëty, mët ko yëˈëjëty naybyudëjkëdëp nixim niyam ko tpäättë amay jotmay”. Ta ja myëmëjjäˈäy yˈanmääyë: “¿Ti mdestiigëˈatäämp mët ko xytsyoky jeˈeyë tuk kilë mˈarros?”. Ta yˈatsooy: “Kyaj, kyaj yëˈëjëty. Pes taabë arros yëˈë yajnigëxëˈkypy ko jantsy naytsyojkëdëbë duˈun”.

 Dyoskujuyëm ko xynyayaktë ja meeny sentääbë, pes yëˈëjënë Jyobaa tyestiigëty yajtuundëp parë tpudëkëdë myëguˈuktëjk ko jyaˈˈatyë yäˈädë päˈäm. Myajkuˈëˈëw myajkukäjpxëdëp ko xynyayaktë meeny sentääbë mä donate.pr418.com.