Mä tyäˈädë jëmëjt niˈigyë nmëdatäˈänëmë tiempë parë nnayjyëjpˈijxëm mä yajjamyatsäˈänyë Jesusë yˈoˈkën xëëw. Ko kyäˈäjët sëmäängujky, ta kyaj yajtunäˈänyë reunyonk mä naxyë Wiˈix njukyˈäjtëm ets nDiosmëduˈunëm, ets ko kyäˈäjët sääbëdë domingë kyaj yajtunäˈänyë reunyonk mä nyaxyë diskursë ets mä yaˈëxpëkyë rebistë Diˈib Xytyukˈawäˈänëm. ¿Wiˈix mbäät nyajtuˈunëm oyë tyäˈädë tiempë? Duˈun extëm ttuundë ja Dios mëduumbëty diˈib mä primer siiglë, nanduˈun tyam oy ko ndukniwijtsëm tijaty ndunäˈänëm mä tyäˈädë xëëw diˈib jëjpˈam (Luk. 22:7-13; km 3/15 paj. 1). Per nan tsojkëp kontiempë jam nbëjtakëm ja jot winmäˈäny ets ja jot korasoon. ¿Wiˈix mbäät nduˈunëm?

• Ko nbawinmäˈäyëm nuˈunën jyëjpˈamëty ko jam nyajpatëm (1 Kor. 11:23-26).

• Ko nmënuˈkxtakëmë Jyobaa ets nwinmäˈäyëm wiˈix mëët nyajpatëm (1 Kor. 11:27-29; 2 Kor. 13:5).

• Ko ngäjpxëm ets nbawinmäˈäyëm mä ëxpëjkpajn wiˈix nyikejˈyë Jesusë yˈoˈkën xëëw (Fwank 3:16; 15:13).

Näägë nmëguˈukˈäjtëm yëˈë kyäjpxtëp diˈib miimp mä foyetë Nˈokˈëxpëjkëmë Diosë jyaaybyajtën tuˈuk tuˈugë xëë, mä yajkajpxyë Biiblyë ets tpawinmaytyë. Ets nääk, yëˈë pyanëjkxtëbë tyäˈädë programë diˈib yä miimp. Nan ta diˈib kyäjpxtëbë rebistë Diˈib Xytyukˈawäˈänëm mä yajnimaytyaˈagyë Jesusë yˈoˈkën xëëw ets wiˈixë Jyobaa mëdë Jesus dyaˈijxëdë ko xytsyojkëm. Oy diˈibë xyˈëxpëkët mbudëkëyanëp parë niˈigyë Jyobaa xymyëwingonët mëdë yˈUˈunk.